《押韵启应诗篇》

 | | | 转寄

台语押韵启应诗篇 45

作者 Tīⁿ Jî-gio̍k 2006.11.19

45　　Khó-la̍h hō͘-è kà-sī ê si, koh sī ài-bō͘ ê koa, kau hō͘ Ga̍k-koaⁿ, tiāu, sī ēng “Pek-ha̍p-hoe.”

1a　Góa ê sim chhèng-chhut hó ê ōe ,
　　我 的 心 凊 出 好 的 话，

　　góa kóng-khí góa ūi-tio̍h ông só͘ chòe,
　　我 讲 起 我 为 着 王 所 做，

1b　　　Góa ê chi̍h sī bín-chia̍t ê lâng ê pit-oe̍h.
　　　　我 的 舌 是 敏 捷 的 人 的 笔 划。

2a　Lí pí sè-kan lâng khah hó-khòaⁿ,
　　你 比 世 间 人 较 好 看，

2b　　　Tī lí ê chhùi ū un-hūi móa-móa,
　　　　在 你 的 嘴 有 恩 惠 满 满，

2c　Só͘ -í Siōng-tè sù-hok teh koan-khòaⁿ,
　　所 以 上 帝 赐 福 在 观 看 ，

2d　　　Ti̍t-kàu éng-oán bô piàn-ōaⁿ.
　　　　直 到 永 远 没 变 换。

3a　Tōa koân-lêng--ê ah , lí tio̍h pē kiàm tī io--ni̍h,
　　大 权 能 者 啊，你 当 背 剑 在 腰 里，

3b　　　Hián-chhut lí ê êng-kng kap ui-giâm tī sin--ni̍h.
　　　　显 出 你 的 荣 光 及 威 严 在 身 里。

4a　Koh tī ui-giâm ê sî ,
　　又 在 威 严 的 时，

4b　　　Ūi-tio̍h chin-lí , khiam-pi , kong-gī ,
　　　　为 着 真 理、谦 卑、 公 义，

4c　Lí chē-chhia chìn-chêng khì,
　　你 坐 车 进 前 去，

4d　　　Bô m̄ sèng-lī ,
　　　　无 不 胜 利，

4e　Lí ê chiàⁿ-chhiú beh chòe thang kiaⁿ ê tāi-chì,
　　你 的 右 手 要 做 通 惊 的 代 志，

4f　　　Thang hō͘ lí khòaⁿ-kìⁿ.
　　　　通 让 你 看 见。

5a　Lí ê chìⁿ-bah chin lāi koh kim-kim,
　　你 的 箭 肉 真 利 又 金 金，

　　siā-tio̍h ông ê tùi-te̍k ê sim,
　　射 着 王 的 对 敌 的 心，

5b　　　Lia̍t-pang tó tī lí ê ē-bīn siong chin chhim.
　　　　列 邦 倒 在 你的 下面 伤 真 深。

6a　Siōng-tè siúⁿ-sù lí ê pó-chō, sī éng-éng bô thêng,
　　上 帝 赏 赐 你 的 宝 座，是 永 永 没 停，

6b　　　Lí ê kok ê koân-pèng sī chèng-ti̍t ê koân-pèng.
　　　　你 的 国 的 权 柄 是 正 直 的 权 柄。

7a　Lí oàn-hūn put-hoat hoaⁿ-hí kong-gī ,
　　你 怨 恨 不 法 欢 喜 公 义，

7b　　　Só͘-í Siōng-tè, lí ê Siōng-tè , ēng hoaⁿ-hí ê iû boah lí ,
　　　　所以 上 帝, 你的 上 帝，用 欢 喜 的 油 抹 你，

　　　　iâⁿ-kè lí chiah-ê ông-phōaⁿ bô pí .
　　　　赢 过 你 这 些 王 伴 没 比。

8a　Lí ê i -chiûⁿ lóng ū bu̍t-io̍h, tîm-hiuⁿ, jio̍k-kùi ê phang-bī ,
　　你 的 衣 裳 拢 有 没 药，沉 香， 肉 桂 的 香 味，

8b　　　Tùi chhiūⁿ-gê ê ông-kiong, ū si-hiân ê ga̍k-khì hō͘ lí hoaⁿ-hí .
　　　　对 象 牙 的 王 宫， 有 丝 弦 的 乐 器 让 你 欢 喜。

9a　Ū ông ê cha-bó͘-kiáⁿ tī lí chun-kùi hū-lú ê tiong-kan,
　　有 王 的 查 某 子 在 你 尊 贵 妇 女 的 中 间，

9b　　　Ông-hō͘ ēng Gô-hui ê kim chng-thāⁿ,
　　　　王 后 用 俄 斐 的 金 装 饰，

　　　　khiā tī lí ê chiàⁿ-pêng chhéng-an .
　　　　站 在 你 的 右 傍 请 安。

10a　Cha-bó͘-gín-á ah, lí tio̍h thiaⁿ,
　　　查 某 囝 子 啊，你 着 听，

10b　　　Tio̍h àⁿ hī-khang lâi thiaⁿ.
　　　　　着 俯 耳 孔 来 听。

10c　Tio̍h khòaⁿ i ,
　　　着 看 他，

10d　　　M̄-thang kì-tit lí ê peh-sìⁿ, kap lāu-pē ê sin-piⁿ.
　　　　　不 通 记 得 你的 百 姓，和 老 父 的 身 边。

11a　Ông chiū beh him-bō͘ lí ê súi,
　　　王 就 要 欣 慕 你 的 美，

11b　　　In -ūi i sī lí ê chú, lí tio̍h kun-sûi .
　　　　　因 为 他 是 你 的 主，你 着 跟 随。

12a　Chhui-lô ê peh-sìⁿ beh lâi sàng lé-mi̍h kui tùn,
　　　推 罗 的 百 姓 要 来 送 礼 物 归 吨，

12b　　　Peh-sìⁿ-tiong ê hó-gia̍h-lâng beh tùi lí kiû un .
　　　　　百 姓 中 的 好 额 人 要 对 你 求 恩。

13a　Ông ê cha-bó͘-kiáⁿ tī ông-kiong-lāi, ke̍k-kî êng-hôa,
　　　王 的 查 某 子 在 王 宫 内，极 其 荣 华，

13b　　　I ê i- ho̍k só͘ siù--ê , sī ēng kim-sòaⁿ.
　　　　　她 的 衣 服 所 锈 的，是 用 金 线。

14a　I beh chhēng siù-hoe ê i- ho̍k, siū chhōa kàu ông ê bīn-chêng,
　　　她要 穿 锈 花 的衣 服，受 导 到 王 的 面 前 ，

14b　　　Chòe-phōaⁿ kun-sûi i ê chāi-sek-lú ū hok,
　　　　　作 伴 跟 随 她 的 在 室 女 有 福，

　　　　ia̍h beh siū chhōa kàu lí ê bīn-chêng,
　　　　　亦 要 受 领 到 你 的 面 前，

15a　In beh hoaⁿ-hí khoài-lo̍k siū ín-chhōa,
　　　伊 要 欢 喜 快 乐 受 引 导，

15b　　　In beh chìn-ji̍p ông-kiong tī hia tòa.
　　　　　伊 要 进 入 王 宫 在 彼 住。

16a　Lí ê kiáⁿ-sun beh sòa-chiap lí ê lia̍t-chó͘ heng-ōng,
　　　你 的 子 孙 要 续 接 你 的 列 祖 兴 旺，

16b　　　Lí beh siat-li̍p in tī choân-tōe chòe ông.
　　　　　你 要 设 立 伊 在 全 地 作 王。

17a　Góa beh hō͘ lí ê miâ tī bān-tāi hō͘ lâng kì-liām i ,
　　　我 要 使 你 的 名 在 万 代 让 人 记 念 它，

17b　　　Só͘ -í bān peh-sìⁿ beh éng-éng oán-oán kám-siā lí .
　　　　　所 以 万 百 姓 要 永 永 远 远 感 谢 你。