《押韵启应诗篇》

 | | | 转寄

台语押韵启应诗篇 97

作者 Tīⁿ Jî-gio̍k 2007.12.24

97

1a　Iâ-hô-hoa chòe ông; tōe tio̍h khoài-lo̍k;
　　耶 和 华 做 王； 地 着 快 乐；

1b　　　Chèng hái-sū tio̍h hoaⁿ-hí hō͘ I chiok-hok.
　　　　众 海 屿 着 欢 喜 受 他 祝 福。

2a　Ba̍t-hûn kap o͘-àm tī sì -ûi ûi I ,
　　密 云 与 黑 暗 在 四 围 围 他，

2b　　　Gī -lí kap kong-pêng sī I pó-chō ê tōe -ki .
　　　　义 理 与 公 平 是 他 宝 座 的 地 基。

3a　Hé kiâⁿ tī I ê bīn-chêng,
　　火 行 在 他 的 面 前，

3b　　　Sio I sì-ûi ê tùi-te̍k bia̍t-chéng.
　　　　烧 他 四围 的 对 敌 灭 种。

4a　I ê sih-nà chiò-kng sè-kài;
　　他的 闪 电 照 光 世 界；

4b　　　Tōe khòaⁿ-kìⁿ, chiū tín-tāng lâi ai .
　　　　地 看 见， 就 振 动 来 哀。

5a　Tī Iâ-hô-hoa ê bīn-chêng, chiū-sī choân-tōe ê Chú ê bīn-chêng,
　　在 耶 和 华 的 面 前 ， 就 是 全 地 的 主 的 面 前，

5b　　　Chiah-ê soaⁿ siau-iûⁿ chhin-chhiūⁿ la̍h bô hêng.
　　　　诸 些 山 消 溶 亲 像 腊 无 形。

6a　Chiah-ê thiⁿ hián-bêng I ê gī ,
　　诸 些 天 显 明 他 的 义，

6b　　　Lia̍t-pang khòaⁿ-kìⁿ I ê êng-kng bû-jī .
　　　　列 邦 看 见 他 的 荣 光 无 二。

7a　Hoān-nā ho̍k-sāi tiau-khek ê ngó͘-siōng--ê ,
　　凡 若 服 侍 雕 刻 的 偶 像 的，

7b　　　Ēng hu-ké ê sîn chū-khoa--ê ,
　　　　用 虚 假 的 神 自 夸 的，

7c　Lóng tio̍h siū kiàn-siàu tò-thè,
　　拢 着 受 见 诮 倒 退，

7d　　　Lín chiah-ê sîn-bêng ah , lóng tio̍h kèng-pài Chú éng-sè .
　　　　恁 诸 些 神 明 啊，拢 着 敬 拜 主 永 世。

8a　Iâ-hô-hoa ah, in -ūi Lí ê phòaⁿ-toàn kong-gī ,
　　耶 和 华 啊，因 为 你 的 判 断 公 义，

8b　　　Sek-an thiaⁿ-kìⁿ chiū hoaⁿ-hí ,
　　　　锡 安 听 见 就 欢 喜，
　　　　Iû-tāi ê siâⁿ ia̍h lóng khoài-lo̍k bô pí .
　　　　犹 大 的 城 亦 拢 快 乐 无 比。

9a　In-ūi Iâ-hô-hoa Lí sī chì-koân pôaⁿ-kè choân-tōe;
　　因为 耶 和 华 你 是 至 高 pôaⁿ 过 全 地；

9b　　　Lí sī chì-chun, pôaⁿ-kè chèng sîn-bêng bô-hān pōe.
　　　　你 是 至 尊， pôaⁿ 过 众 神 明 无 限 倍。

10a　Thiàⁿ Iâ-hô-hoa ê jîn-sū,
　　　爱 耶 和 华 的 人 士，

10b　　　Lín lóng tio̍h oàn-hūn pháiⁿ-sū .
　　　　　恁 拢 着 怨 恨 歹 事。

10c　I pó-hō͘ I sèng ê peh-sìⁿ ê sìⁿ-miā kiâⁿ chín-kiù,
　　　他 保 护 他 圣 的 百 姓 的 性 命 行 拯 救，

10d　　　I chín-kiù in thoat-lī pháiⁿ-lâng ê chhiú.
　　　　　他 拯 救 伊 脱 离 歹 人 的 手 。

11a　Kng-bêng sī ūi-tio̍h gī-lâng lâi pī-pān,
　　　光 明 是 为 着 义 人 来 备 办，

11b　　　Hoaⁿ-hí sī ūi-tio̍h sim chèng-ti̍t ê lâng lâi pī-pān.
　　　　　欢 喜 是 为 着 心 正 直 的 人 来 备 办。

12a　Gī-lâng ah , lín tio̍h in-ūi Iâ-hô-hoa lâi hoaⁿ-hí ;
　　　义 人 啊， 恁 着 因 为 耶 和 华 来 欢 喜；

12b　　　Kì-liām I ê sèng-miâ lâi chàn-bí .
　　　　　纪 念 他 的 圣 名 来 赞 美。