《押韵启应诗篇》

 | | | 转寄

台语押韵启应诗篇 96

作者 Tīⁿ Jî-gio̍k 2007.12.17

96

1a　Lín tio̍h ǹg Iâ-hô-hoa chhiùⁿ sin ê koa,
　　恁 着 向 耶 和 华 唱 新 的 歌，

1b　　　Choân-tōe lóng tio̍h ǹg Iâ-hô-hoa chhiùⁿ-koa.
　　　　全 地 拢 着 向 耶 和 华 唱 歌。

2a　Tio̍h ǹg Iâ-hô-hoa chhiùⁿ-koa, chiok-siā I ê miâ bô soah,
　　着 向 耶 和 华 唱 歌， 祝 谢 他 的 名 无 息，

2b　　　Ji̍t-ji̍t thoân-pò I ê kiù-un khui-khoah.
　　　　日 日 传 报 他 的 救 恩 开 阔 。

3a　Tī lia̍t-pang ê tiong-kan kóng-khí I ê êng-kng;
　　在 列 邦 的 中 间 讲 起 他 的 荣 光；

3b　　　Tī bān peh-sìⁿ ê tiong-kan
　　　　在 万 百 姓 的 中 间
　　　　kóng-khí I kî-biāu ê só͘-chòe chiâu-chn̂g.
　　　　讲 起 他 奇 妙 的 所 做 齐 全。

4a　In-ūi Iâ-hô-hoa chòe tōa, eng-kai siū ke̍k-tōa ê o-ló chun-kùi,
　　因为 耶 和 华 做 大，应 该 受 极 大 的赞美 尊 贵，

4b　　 I tī chèng sîn-bêng ê téng-bīn eng-kai siū kèng-ùi .
　　　　他 在 众 神 明 的 顶 面 应 该 受 敬 畏。

5a　In-ūi lia̍t-pang ê sîn-bêng lóng sī hu-ké ;
　　因为 列 邦 的 神 明 拢 是 虚 假；

5b　　　To̍k-to̍k Iâ-hô-hoa chhòng-chō chiah-ê thiⁿ kap tē .
　　　　独 独 耶 和 华 创 造 诸 些 天 与 地。

6a　Tī I ê bīn-chêng ū chun-kùi kap ui-giâm pho͘-chng,
　　在 他 的 面 前 有 尊 贵 与 威 严 铺 妆，

6b　　　Tī I ê sèng-só͘ ū koân-lêng kap êng-kng.
　　　　在 他 的 圣 所 有 权 能 与 荣 光。

7a　Peh-sìⁿ-tiong ê ta̍k-cho̍k ah ,
　　百 姓 中 的 各 族 啊，
　　lín tio̍h chiong koân-lêng êng-kng bô ún-môa,
　　恁 着 将 权 能 荣 光 无 隐 瞒，

7b　　　Kui hō͘ Iâ-hô-hoa; kui hō͘ Iâ-hô-hoa.
　　　　归 给 耶 和 华； 归 给 耶 和 华。

8a　Ēng I ê miâ só͘ eng-kai tit-tio̍h ê êng-kng, kui hō͘ Iâ-hô-hoa:
　　用 他的 名 所 应 该 得 着 的 荣 光， 归 给 耶 和 华：

8b　　　Tòa lé-mi̍h lâi ji̍p I ê īⁿ kám-siā bô soah.
　　　　带 礼 物 来 入 他 的 院 感 谢 无 息。

9a　Tio̍h ēng sèng-kiat ê chng-thāⁿ kèng-pài Iâ-hô-hoa;
　　着 用 圣 洁 的 妆 饰 敬 拜 耶 和 华；

9b　　　Choân-tōe tī I ê bīn-chêng ngia̍uh-ngia̍uh-chhoah.
　　　　全 地 在 他的 面 前 蠕 蠕 惙。

10a　Tī lia̍t-pang-tiong tio̍h kóng,
　　　在 列 邦 中 着 讲，

10b　　　Iâ-hô-hoa chòe ông,
　　　　　耶 和 华 做 王，

10c　Sè-kài kian-kò͘, bōe iô-tāng kàu thiⁿ-piⁿ;
　　　世 界 坚 固，不 摇 动 到 天 边；

10d　　　I beh chiàu kong-pêng sím-phòaⁿ bān peh-sìⁿ.
　　　　　他 要 照 公 平 审 判 万 百 姓。

11a　Goān thiⁿ hoaⁿ-hí, tōe khoài-lo̍k móa siâⁿ;
　　　愿 天 欢 喜，地 快 乐 满 城；

11b　　　Goān hái kap kî-tiong só͘ chhiong-móa--ê lóng chhut tōa-siaⁿ;
　　　　　愿 海 与 其 中 所 充　　满 的 拢 出 大 声；

12a　Goān chhân-hn̂g kap kî-tiong só͘-ū--ê , lóng khoài-lo̍k o-ló I ê miâ;
　　　愿 田 园 及 其 中 所有 的, 拢 快 乐 赞美 他的名；

12b　　　Hit-sî chhiū-nâ-lāi ê chhiū-ba̍k,
　　　　　彼 时 树 林 内 的 树 木，
　　　　lóng beh tī Iâ-hô-hoa ê bīn-chêng chhut hoaⁿ-hí ê siaⁿ; 　　
　　　　　拢 要 在 耶 和 华 的 面 前 出 欢 喜 的 声；

13a　In -ūi I lâi lah,
　　　因 为 他 来 啦，

13b　　　I lâi beh sím-phòaⁿ choân-tōe lah,
　　　　　他 来 要 审 判 全 地 啦，

13c　I beh chiàu kong-gī sím-phòaⁿ sè-kài,
　　　他 要 照 公 义 审 判 世 界，

13d　　　Chiàu I ê sìn-si̍t sím-phòaⁿ bān peh-sìⁿ bô hun kok-kài.
　　　　　照 他 的 信 实 审 判 万 百 姓 无 分 国 界。