《林茂生博士论文》

 | | | 转寄

[推荐序七] 理想主义教育家ê代言者

作者 城仲模 2017.07.16

今年是公元2000年，全世界人民lóng以无比兴奋ê心情迎接chit-ê千载难逢ê新纪元，各国mā lóng安排带有本国文化特色ê活动来庆祝chit-ê特殊历开始ê时序来到。当千禧年第一道曙光（sú-kng）照tī纽西兰查塔姆群岛ê时，咱观赏tio̍h当地ê原住民毛利人欢欢喜喜，又歌（ko）又舞了后，其他国家mā陆续呈现in原住民ê自然日常生活kah文化祭典。
Chiah-ê画面经过卫星传送到世界各国，chit种用现代科技文明ê方式，传达人类siōng真实koh原始ê律动，正正显示科技文明kah传统文化是ē-tàng融合koh无冲突ê，mā突显世界各国对文化传承ê重视。无论科技文明án怎精进，传统文化深深钉根tī人类ê心灵，是影响咱人动能ê大力量，mā是绝对无法度轻视ê。讲tio̍h文化ê绵延，就需要由教育来传达；两者lóng是为tio̍h国家百年之大计，是国家立国kah发展ê两块大基石，bē容允得有小khóa ê偏废。

历史上，台湾bat kúi-nā pái tú-tio̍h外来政权ê统治，koh加上本身to̍h是一个移民社会，所以，台湾文化本身真自然就渐渐形成涵盖丰富koh扎实ê多元新文化体系。M̄-koh，mā因为kúi-nā pái统治者ê交替，台湾人民tī高压ê殖民、剥削、愚民，á是甚至流血ê thún踏之下，对台湾文化ê价值，ē-sái讲是iáu未凝聚（gêng-chū）共识kah认同。所以，咱一定tio̍h tùi历史中来回溯到源头，chiah ē-tàng根本了解问题ê所在。1890年，台湾通史作者连横（雅堂）先生ê老父连永昌先生开二两黄金买一本《续修台湾府志》送hō͘伊，并且kā伊训诫讲：「你是台湾人，bē-sái m̄知台湾事」。日本人tī台湾51年ê统治固然免讲，国民政府迁台，一开始to̍h koh khah变本加厉，tī教育措施上，大肆（tāi-sù）灌输koh宣扬华夏沙文ê思想，以及革命建国ê艰辛kah蒋氏ê丰功伟业，soah轻视台湾ê精神文化，而且到处压制乡土意识ê绍介机会，致使人民渐渐对家己国家ê感情，以及共同分享光荣kah见笑ê情操，变成想像bē到ê低沈（kē-tîm）。Iáu会记得我tú到日本留学ê时，有人问我讲：「你来自台湾，台湾ê历史、文化、地理、民俗、风情，你知gōa-chē？」经过án-ne一问，我chiah发见对家己成长ê故乡竟然是hiah-ni̍h生份（chheⁿ-hūn），所以，虽然我主修律法，m̄-koh tāi先读完ê册却是外国人笔下ê「台湾四百年史」kah「国民党史」。这to̍h是今á日teh困扰台湾政治、社会、国家认同、教育kah文化等等深层发展ê祸首（hō͘-siú）：做一个台湾人，却m̄知台湾事。

因为自细汉to̍h m̄-bat接受任何一点á学校所教ê台湾史话，致使对四kho͘ 围ê人地事物mā bē-tàng怀抱深刻ê关怀，所以，对故乡台湾ê记忆是肤浅ê，是懵懂（bóng-tóng）ê，mā是目nih-á久ê；因为tī chia ê土地kah人民对台湾欠缺带有性命共同体ê坚定信仰，致使任何古迹、史料、图书、画册等等，对咱来讲lóng无任何特别ê意义，mā无法度引起咱特别ê关注之情，所以台湾真chē重要ê遗产典故就án-ne tī咱ê历史记忆中渐渐消失，留落来ê kan-taⁿ是少数人无尽ê乡愁，kan-taⁿ ē-tàng tī暗瞑一到to̍h想起ê时，tùi心灵深处唤起ná亲像记忆中ê故乡kah生活点滴；chit种空虚kah断chām，是写bē出ē-tàng感动台湾人ê共同历史。1921年，台湾先贤蒋渭水先生tī kah林献堂先生等人组成ê台湾文化协会成立大会ê时，伊bat讲：「台湾人chit-má实在是有病à….，文化运动是对chit种病ê唯一治疗法」，而且mā bat kúi-nā pái强调教育ê重要性。所以，咱今á日想beh为台湾chhōe一个自主ê立足点来努力ê时，一定tio̍h跳出所有kā台湾kho͘-tiâu ê框架kah围篱，tùi教育kah文化着（tio̍k）手，彻底翻转所有ê思维（su-ûi）方式，积极改用正港以台湾为出发点ê自主角度kah自信ê胸怀（heng-hoâi）来看中国，看亚洲，看全世界。

林茂生爱乡文化基金会有看tio̍h chit点，所以筹划几nā年，终其尾kā台湾先贤林茂生博士tī美国哥伦比亚大学ê博士论文翻译做华语，希望经由本册ê出版，ē-tàng重新省思教育改革kah提高对台湾文化ê重视。林茂生博士是第一位得tio̍h日本东京帝大文学士kah美国哥伦比亚大学哲学博士ê台湾人，bat亲身受tio̍h教育理论名家杜威kah门罗ê教导，身受东西文化ê薰陶，通晓各国语文ê精髓，毕生献身tī台湾教育kah文化ê启蒙，提倡自由kah民主精神，是日治时期台湾社会文化ê菁英，却不幸tī二二八事件中遭遇灾难。本册并m̄是专门阐述（chhián-su̍t）教育理论ê册，m̄-koh，tī字缝内作者lóng用深厚ê理论做基础，koh用tī台湾ê ta̍k种实务统计数据做辅助，无一丝á ê扶tháⁿ，充满读册人ê自信kah稳健；用成熟ê学术研究素养kah优异ê研究方法，检视分析教育制度ê发展kah文化之间ê关连，除了对日治时期ê教育政策收集大量资料当做素材，提出理论ê分析以外，mā真务实检讨教育制度ê变革对台湾社会ê影响；这以外，mā论到教育行政机关ê沿革，包括中央政府行政kah地方政府教育行政在内，用宏观ê角度审视kui个日治时期ê教育行政kah教育制度体系。本册中所提出，koh严厉批判ê日治时期教育政策ê真chē缺失，后来却lóng被国民党政权所沿用，尤其tī同化教育kah普及「国语政策」方面；无仝ê是，同化ê内容是tùi日本文化转变做大中国主义思想文化，「国语」tùi日语换做「中国普通话」；仝款ê是，台湾本土文化kah语言严重受tio̍h扭曲kah破坏，以及受教大众ê创造力受捏死（ni̍h-.sí）。

做一个理想主义ê教育家kah知识份子，作者思思念念ê to̍h是教育ê自由、开放、民主kah创造性，以及文化ê自觉kah重建。1945年tī政权ê移转中间，问题ê本质照常无得tio̍h实质上ê重视kah解决。由小见大，观古思今，今á日teh倡议教育改革、文化重建ê时，咱tio̍h知教育kah文化ê重建实在m̄是时行(sî-kiâⁿ)ê术语，是今á日台湾历史待决，m̄-koh却iáu未决ê使命kah梦想，m̄-nā不止á任重，mā实在是路途遥远。Tī chia所推介ê博士论文虽然是tùi日治时期ê教育文化分析着（tio̍k）手，实在是有关当时教育kah文化问题ê本质，m̄-koh却kah今á日相差无远；阅读本册，m̄-nā ē-tàng为今á日台湾ê社会文化理出另外一条历史ê延长线，亦ē-tàng hō͘咱teh思考今后ê教育方针、文化行向ê时，thang有所根据。Án-ne，mā可能ē-tàng不负林茂生博士过去认真着作tī不断克服困难中求得知识，有了知识就勉力实行，心系本土ê良情美意。

今年(2000年) 3月初2下晡，我bat受邀参加tī中山先生记念馆举行ê「台湾书画三百年展」ê开幕仪式，ē-tàng欣赏tio̍h林茂生博士亲笔所写ê书法作品。伊ê诗文语意深藏若虚，笔力苍劲，ná行云流水。Tī伊ê作品前我停脚真久，kah-ná超越时空，teh kah林博士做一场心灵感应，以及乡情相吸ê对话。Tī本册teh beh出版ê时，林茂生博士ê大kiáⁿ林宗义教授kah cha-bó͘-kiáⁿ咏梅女士希望我ē-tàng为本册写序文，个人因为十分感佩台南ê先辈林茂生博士一生追求台湾民主、教育kah文化启蒙ê行踏（kiâⁿ-ta̍h）kah贡献，谨特以敬虔kah追思ê心，写几句做序。
（作者为司法院副院长）