《林茂生博士论文》

 | | | 转寄

[推荐序六] 台湾文化本位ê开山之作

作者 曾志朗 2017.07.09

咱常常讲：「做人不可忘本」。Chit句话用来观照台湾教育，道理尤其是真切实。罗马m̄是一工造成ê，台湾教育mā m̄是三两工内忽然爆出来ê。教育是「百年树人」的大业，过去整体教育ê发展，无论远近，lóng有它ê历史轨迹，有咱民族ê共同记忆。咱今á日谈教育改革，一定bē-tàng bē记得现在ê历史座标，除了充分尊重kah了解历史，以及不管时to̍h会记得咱怎样行过早前以外，koh khah tio̍h ài记取历史ê教示，才ē-tàng鉴往知来，行出一条光明大道。

Tī林茂生博士chit本《日本统治下台湾ê学校教育》以前，己经有两本有关「台湾教育」ê专着。M̄-koh，阿诺用英文所着ê「台湾教育」，tī 1908年出版ê时，现代化教育tú开始发芽，所以thang提供论述参考ê资料真有限。另外，日本人吉野秀公tī 1927年用日文所着ê「台湾教育史」，资料己经非常丰富，只是khah可惜ê是，它所反映ê是日本人ê观点，所以欠缺对文化问题ê深入探讨。林茂生chit本有关台湾教育发展ê论文，致力tī历史kah文化ê分析，ē-sái讲是台湾文化本位ê开山之作。 Chit本册kā日治时期台湾教育发展ê筋脉，整理kah非常清楚，真chē ê论述lóng有具体ê数据撑（thèⁿ）tiâu-.leh，非常难得。Koh khah难得ê是，作者身为理想主义ê教育家kah知识份子，伊专注ê是自由、开放、民主kah创造性，以及文化ê自觉kah重建，伊chit方面ê真正知bat，khǹg tī teh beh进入新世纪ê今á日，照常是真有份量，ē-sái讲是「放诸四海而皆准」。

本册koh对日治时期两个民族之间ê教育无平等、同化教育、国语教育kah教育经费不足等等ê问题，再三致意，反复论证。M̄-koh，伊mā kā咱讲，日本人bat为殖民教育付出相当ê努力；当第一位总督beh启程来台ê时，伊同时拣选当时tī日本真杰出ê教育家伊泽修二，来担任学务部长。
Taⁿ，台湾人民已经当家做主，咱已经无需要koh再为tio̍h族群ê无平等，á是同化政策来伤神，m̄-koh，详细阅读chit本册了后，咱一定会问：咱对教育ê付出kám有够额？咱对家己ê母语是m̄是有认真teh传承？咱是m̄是已经采取正确ê文化观去规划咱ê原住民教育？是m̄是应该有人kā林茂生博士ê棒(pāng)接落来，kā日治时期1929年以后台湾教育史ê缺口填hō͘ 满？

我想，咱iáu有真长ê路ài行。
〈作者为教育部部长）