《林茂生博士论文》

 | | | 转寄

[推荐序五] 一位热爱母校ê教育家

作者 高俊明 2017.07.02

林茂生先生是一位伟大ê教育家。伊是第一位tī美国哥伦比亚大学完成博士课程，来得tio̍h哲学博士学位ê台湾人。

林博士bat担任台湾大学ê文学院院长。伊tī少年ê时mā bat tī台湾台南市担任过长荣中学ê教务主任；hit时，tú好是日本统治台湾ê时代。有一pái，台湾总督府ê民政长官下村宏来到长荣中学访问。Hit时，下村长官捐赠真小额ê金钱hō͘长荣中学，并且做一首日语ê和歌（短诗）来表达伊ê感想。伊ê意思如下：
「M̄是松树，mā m̄是樱花，我送你chit-ê小花ê盆栽，请你khǹg tī你ê小窗边。」

林博士听了后，真敏感to̍h随时感受tio̍h下村长官看bē起当时ê长荣中学；建设简陋，学生无chē，m̄值得伊koh khah大力支持帮助ê意思。就án-ne，伊随时用真súi ê日语做和歌回应下村长官，讲： 「我tùi细窗á眺望校园，桃花李花四界盛开，有眼光ê人就ē-tàng看见。」Tī chit首短诗内面，ē-tàng看出林博士ê洞察力、智慧、才能、远见、勇气、正义感kah对母校ê真爱。

林博士ê博士论文「日本统治下台湾ê学校教育—它ê发展及有关文化ê历史分析kah探讨」，chit本册是tùi台湾ê文化、地理、历史等等ê角度来评论日本tī台湾所施行ê教育ê特色kah缺点。

林博士mā tùi政治上ê平等kah文化上ê平等，以及经济上ê平等各方面来看日本tī台湾ê教育，koh kā chit种教育制度kah教育理论the̍h来kah当时ê先进国家ê殖民地教育比较。然后，林博士mā提出日本政府tī台湾ê教育方面应该有ê改革方案。

若咱用心阅读林博士ê论文，就一定ē-tàng得tio̍h真chē ê启蒙kah帮助。
（作者为台湾基督长老教会牧师）