《林茂生博士论文》

 | | | 转寄

[推荐序四] 台湾教育史ê研究先锋

作者 林玉体 2017.06.25

林茂生先生，台湾台南人，美国哥伦比亚大学教育学院毕业，荣获博士学位；伊ê学历kah胡适之ê仝款。Tī哥大ê期间，伊koh深受当时ê名师Paul Monroe, I. L. Kande1, L. M. Wilson) kah G. S. Counts，以及W. H. Kilpatrick ê指导，tī 1929年撰写《日本统治下台湾ê学校教育—它ê发展以及有关文化ê历史分析kah探讨》为博士论文。Chit-má译做中文，tī林茂生ê故乡台湾出版。

以台湾为主体性所做ê学术研究kah论文，tī过去ê戒严时代，非常冷门。其实，台湾ê一切lóng thang用学术ê角度做深度ê探讨。以台湾ê教育史为例，深入研究台湾教育史，m̄-nā内容丰富，而且真有意义，它ê阔度kah深度lóng bē khah输中国教育史á是西洋教育史。而且台湾学者关心台湾，这是义不容辞ê，mā是理所当然ê，koh khah是无应该推辞ê。

根据台湾四百gōa年ê可靠文字资料，chit-ê美丽岛早to̍h有本来存在ê传统风俗kah文化，西洋两大宗教ê强势国家又koh bat经营台湾一段时间—新教ê荷兰统治南台湾，旧教ê西班牙占领北台湾；然后，明郑kah大清帝国代表中国儒家思想ê文教措施，mā深入tī台湾居民ê心中；日本koh khah是用西方现代文明ê教育制度kah内容，有系统性正式实施tī台湾。台湾学校教育ê开始，to̍h是以1895年算起；大家lóng知，hit年to̍h是日本占有台湾hit年。目前台湾有bē少学校当teh庆祝立校一百周年，可见日本人一到台湾，to̍h兴办学校；日本政府对台湾教育ê贡献，比其他统治者加真chē。 撰写台湾日治时期ê教育史，siōng完整ê应该是日本人鹤见tī哈佛所撰写ê博士论文，题目是“Japanese Colonial Education in Taiwan”（1895年~1945年），hit篇论文早to̍h已经发表。林茂生先生tī哥大ê博士论文，评述日治时代ê学校教育史，只到1929年，tī时间范围ê涵盖上，khah不如前者。M̄-koh，林先生ê论文，mā提供bē少ê历史事实，表达特殊ê历史知识，是研究台湾教育史bē-tàng欠缺ê材料。尤其tī chit篇论文ê第三部分，林先生有先列出发人深省ê问题kah评论。

台湾ê正式教育是由日本人奠基。M̄-koh，日本人m̄是台湾人，ná亲像西班牙人kah荷兰人m̄是台湾人。日本政府tī台湾ê教育措施，并无kā台湾子弟ê潜能发展列做siōng要紧ê tāi-chì，chit种教育ê偏差心态，mā是殖民ê意识，不幸lóng长期罩tiâu tī台湾学生ê心上，甚至到二十世纪结束ê时，犹原án-ne；这是台湾人ê悲哀。以「教育史」ê研究为例，师生kan-taⁿ知影「中国教育史」kah「西洋教育史」，m̄-koh却无看tio̍h「台湾教育史」，这是台湾教育学术界ê见笑tāi kah大侮辱。若beh弥补chit种缺憾，林茂生先生ê大作是一个示范作用。

Ǹg望chit本册ê出版，thang hō͘台湾教育史ê研究成做研究教育史ê主流，án-ne，林先生七十年前所写ê论文，对台湾教育史就koh khah有意义ā。
（作者为台湾师范大学教育学院院长）