《林茂生博士论文》

 | | | 转寄

[推荐序二] Kā台湾人ê声音放送到国际上

作者 吴密察 2017.06.11

林茂生先生自从进入东京帝国大学了后，伊to̍h是台湾siōng被瞩目的学者、文化人。二0年代初期，文化协会举办「夏季学校」ê时，伊kah连雅堂差不多to̍h hông当做是岛内有关西洋文化kah台湾文化ê代言人，二人分别讲授「西洋文明史」kah「台湾通史」。Chit款ê林茂生先生，伊以后到美国哥伦比亚大学留学，伊ê博士论文竟然to̍h是chit本《日本统治下台湾ê学校教育—它ê发展kah有关文化之历史分析kah探讨》。林茂生先生án-ne tī西洋ê大学中，用台湾ê新式教育史为题，撰写博士论文，到底真正ê意义是啥物？这真正是值得以后大家讨论ê问题。我想林茂生先生有可能是有意beh kā伊对日本殖民政府教育ê批判，透过chit种外国管道传扬出去，mā to̍h是beh kā台湾人ê声音放送到国际上去lah。

另外，我个人颠倒是特别注意tio̍h chit-ê当时台湾ê「西洋通」（已经通过基督教ê信仰来得tio̍h西方ê文化，koh接受过大学教育），伊tī chit篇论文中间，虽然正面评价日本殖民政府三十年间tī台湾所积极teh展开ê近代西方式教育建设，m̄-koh，却mā非常土直teh批判日本殖民地教育中ê差别待遇kah同化主义。尤其是tī「近代教育原则考验下ê同化政策」hit节中，伊koh khah是慎重teh批判chit种来自外部ê同化主义教育。Tī chit节中间，林茂生有引述亨利・亚当斯（Henry Adams)、约翰・杜威（John Dewey)、霍普豪斯（Hobhouse)等西洋哲学家ê话做家己ê凭据，对同化主义ê反民主性质提出批评。Tī chia，咱看tio̍h一个tī当时有代表性ê台湾近代知识份子所认知ê，甚至用来做论事ê价值标准，mā看tio̍h林茂生先生ê思想koân度。Chiah-ê想法准讲tī今á日mā lóng iáu有启发性，因为án-ne，我kā其中ê一个片段引述出来，当做chit篇简短序文ê结束。

近代教育ê目的，在tī tùi个人内部去发展，却m̄是kā发展tùi外面强 压tī个人，因为担心这可能会阻碍儿童ê创造能力。同化ê出发点，在tī伊家己ê标准，tùi外部beh强加hō͘人，he m̄是人所渴望ê，因为同化ê需要是无必要ê，mā是无hō͘人所认知ê。
（作者为台湾大学历史系副教授）