《林茂生博士论文》

 | | | 转寄

[推荐序一] 《建立殖民地教育史研究ê标竿》

作者 吴文星 2017.04.30

近二十年来，台湾历史ê研究大发彩（华语「蓬勃发展」），渐渐成做台湾历史学界重要ê研究领域，其中，对日治时期ê研究尤其呈现激增ê趋势，探讨范围大大扩张，研究态度无koh固守僵化ê意识形态，转变到讲求实证、理性kah客观，史料ê整理（华语「爬梳」）力求（le̍k-kiû）有所突破，对相关ê研究就án-ne力求周至掌握，处处lóng是thang欢喜ê现象。

就研究史来看，早期研究日治时期ê人差不多lóng是日本人，台湾人非常少，近代台湾思想家兼教育家林茂生博士ē-sái讲是先行者。林氏tī 1927年六月以台湾总督府在外研究员身分，出发去美国留学，进入哥伦比亚大学深造；1929年十一月，以《Public Education In Formosa under the JapaneseAdministration: A Historical and Analytical Study of Development and the Cultural Problems)（编按：to̍h是本册）ê论文得tio̍h博士学位。Hit-ê论文乃是探讨台湾殖民教育ê第一本学术性论着，可惜因为长期bē-tàng正式出版问世，知影ê人非常少。M̄-koh，详细看它ê内容，真chē论述kah看法相当值得咱来重视kah参考利用。Taⁿ约略举它ê要点，绍介如下：
其一、问题意识有符合时代精神。伊用近代民主主义ê教育理念来检视日本tī台湾ê殖民教育，强调近代教育ê目的在tī tùi学生ê内在启发伊ê创造力，却m̄是tùi外在hō͘伊强制性ê灌输，若无，kan-taⁿ会破坏学生ê创造力。伊指出日本固然用她本国现代化ê经验，致力tī台湾ê现代化，m̄-koh，用同化做依归ê教育显然违反民主ê精神。所以，伊ê研究目标除了tùi教育制度本身、发展过程kah主导发展ê方针做历史ê探讨以外，并且分析教育活动中ê文化冲突kah和谐ê原因kah影响，chhōe出建设性ê改善之道。真显然，林氏希望藉tio̍h实证ê研究来提出改进意见，提供hō͘ 总督府采用。
其二、用比较方法观察台湾、朝鲜、菲律宾等殖民教育制度kah措施ê异同，提出有khah客观ê看法。
其三、资料ê掌握kah利用非常周至。虽然碍tī规定，无法度利用基本档案，m̄-koh，伊充分利用英、日文ê官方出版品kah研究论着，甚至有用报纸、杂志ê相关文字。伊ê研究thang讲是一定有依据，论述十分顶真、扎实。
其四、针对同化教育、用日语为教育基础、台日共学、差别待遇、义务教育、中等以上教育机会严重不足等等ê重大教育问题，伊一一进行实证性ê检讨kah批判。伊认为小学低年级应当以母语当做教学ê用语，中年级以上chiah渐渐用日语当做教学ê用语。开放台日共学固然值得赞扬，m̄-koh，台湾人所渴望ê乃是「仝一个制度，m̄-koh学校分别」，来保留in ê文化。伊表示用同化做依归ê教育ê结果，并bē改变台湾人ê本质，m̄-koh，bē-tàng否认ê是：现代化有明显ê发展。伊指出台湾ê殖民教育远不如美国ê殖民地波多黎各、海地、菲律宾等等。伊呼吁总督府tio̍h尽量赶紧解决台、日人ê教育机会不平等ê问题，并且废除差别待遇。Tī结论中，林氏强调有（iú）意ê、强制ê同化教育是无适当ê，台、日人tio̍h互相尊重彼此ê文化，以及tio̍h实施教育机会完全平等ê政策，án-ne，建设性ê教育chiah有可能实现。

Tùi顶面thang知，林氏虽然身处殖民地环境下，却ē-tàng无受环境所束缚。伊ê论着用普遍ê价值观念，来实证而且理性检讨殖民教育，提出真chē宝贵ê意见，thang讲有建立殖民地教育史研究ê标竿。今á日，伊ê论着m̄-nā是研究林氏教育思想kah伊对殖民教育批判重要ê素材，同时mā是有志tī研究日治时期教育史ê人bē-tàng欠缺ê参考用册；根据这，á是印证林氏ê论述，á是用林氏ê意见做起点，进一步来深入探讨。

本册虽然是译本，m̄-koh，译文正确koh流利，充分传达原着ê意思，而且hō͘人有真大ê兴趣，相当有可读性。本册译本终于ē-tàng出版，这ē-sái讲是台湾研究界hō͘人欢喜ê大盛事（sēng-sū）。咱thang预期ê是，chit本册对未来ê台湾教育史研究，一定有重大ê影响。出版之余，爰缀(华语)数语，略抒所感，是为序。
（作者为台湾师范大学历史系教授）