《林茂生博士论文》

 | | | 转寄

《日本统治下台湾ê学校教育》—其发展以及有关文化ê历史分析kah探讨

作者 英语：林茂生, 华语：林咏梅, 台语：林俊育 2017.04.23



Tī欣喜中参杂tio̍h hō͘人phut-phut-tiô ê圆满情绪，我提笔为先父林茂生博士ê博士论文写序。Chit篇论文是tī 1929年完成，先父mā因为án-ne来获（he̍k）得哥伦比亚大学ê博士学位。Tī论文完成七十一年后ê chit时chit刻，终于ē-tàng出版面世，hō͘ 我koh khah感受tio̍h深刻ê欣慰之情。

会延chhiân hiah-ni̍h久，tio̍h归因tī台湾经过将近一世纪久ê殖民统治，连连被日本（1895到1945年）kah中国国民党两个外来政权所占领统治。Chit篇论文tī日本统治时期无法度出版ê原因，是因为它对殖民地政府ê教育政策提出严正ê批评。林茂生博士本来认为1945年日本战败了后，伊ē-tàng达成本册得tio̍h出版ê心愿，mā tī伊1947年死tī蒋介石所领导ê中国国民党手中了后，有「昙花一现」。

发生tī 1947年2月28 ê「二二八事件」，tī经过长时间ê查禁了后，今á日已经是众人lóng知，并且已经记载tī史料中。「二二八事件」发生了后，真chē台湾ê知识菁英lóng续接「失踪」，á是被杀害，林茂生博士to̍h是其中之一。事实上，tī现在台湾人一般所提起ê「二二八事件」发生了后，国民党ê军队kah情治单位为tio̍h beh巩固权力，方便掌控kui个台湾，开始进行铲除（sán -tî）任何可能ê反对势力；为tio̍h án-ne，至少有三万个台湾人民无辜遭遇tio̍h杀害。Chit-ê恐怖时期开启一党独裁ê统治，并且藉tio̍h三十八年久ê戒严法来厉行专制，直到1987年chiah废除戒严法。林茂生博士ê论文tī台湾历史ê乌暗时期无法度得tio̍h出版，一直到1987年台湾民主政治发芽了后，chiah终其尾tī伊心爱ê家乡重见曙光（sú-kng）。

我认为，chit篇论文用各种方式，beh tī群众认知kah讨论上做出重要ê贡献。我想beh特别借chit-ê理由，提出两项真有价值ê所在。第一，chit篇论文对台湾学校教育ê形成kah沿革，提出重要ê历史解释kah说明。Tī chit-ê超过半世纪ê期间，台湾人头一pái体验tio̍h现代化ê力量。

第二，chit篇论文teh强调文化认同tī任何教育层面，特别是tī发展kah落实学校教育体系所强调ê价值观上，有不可取代ê重要性。若对家己ê文化缺乏认知kah参与感，就无可能产生自信，thang进一步tī kah-ná春风ê支持群体中来培养自我独立思考ê能力；这to̍h是真正ê教育所必备（pit-pī）ê要素。总是，日本政府tī台湾所施行ê殖民地教育政策却长期否认chit点。国民党统治下ê教育政策，照常延续过去一贯压制台湾文化ê做法，一直到无gōa久以前lóng是án-ne。台湾未来ê教育一定tio̍h手牵手，行向台湾文化ê更新kah复兴之途，这mā是林茂生博士tī伊ê论文中一再强调ê，并且是终其一生奋斗ê原动力。阮诚恳希望伊ê论文ē-tàng激励教育工作者，以及hiah-ê一向致力tī chit项重要任务，希望渐渐kā台湾推向国际社会ê有志之士。我想，he mā会是林茂生博士siōng强烈ê渴望。

Tī chia，我一定tio̍h对我唯一ê小妹，mā常常是阮老父欢乐ê来源ê徐林咏梅女士，表达我心内siōng深ê感谢。因为她ê文学恩赐、毅力kah投入，chiah ē-tàng完成chit本论文ê华语译本；阮lóng真感谢她ê付出。最后，尽管阮过去承受真chē ê悲剧、失落kah不幸，m̄-koh，我iáu是愿意thí开希望ê翼（si̍t），迎向未来。所以，tī chia我beh用丹麦哲学家齐克果（Sőren Kierkegaard）ê铭言来kah大家分享：「暴君一死，暴政必亡；殉道者虽亡，伊ê影响力却beh启动。」（The tyrant dies and his rule ends, the martyr dies and his work begins。）

（作者是林茂生爱乡文化基金会创办人）