《林茂生博士论文》

 | | | 转寄

[解读] 追chhōe个人kah民族ê尊严

作者 李筱峰 2017.08.06

有一pái，中国国民党ê秘书长张宝树，对台湾学者陈少廷先生讲：「Lín台湾人无啥物人才。」陈少廷先生无经过思考，to̍h随时回答：「台湾m̄是无人才，台湾ê人才，tī二二八事件ê时lóng kiông-beh hō͘ lín刣了了à！」

讲tio̍h顶面ê对话，我禁bē-tiâu联想起前总统李登辉先生ê一句话：「做一个台湾人ê悲哀」。若是讲tio̍h二二八事件中遇害ê台湾人才，前台大文学院代理院长林茂生博士ê形影，mā会随时浮上我ê脑海。

林茂生教授是台湾第一位哲学博士，伊tī 1927年（日本昭和二年）初，接受台湾总督府ê遴选，成做「在外研究员」，公费去美国留学，进入纽约哥伦比亚大学ê Teacher’s College，投入当时出名ê教育哲学家杜威（John Dewey）kah门罗（Paul Monroe〉ê门下。隔tńg年（1928年）4月，伊先得tio̍h哥伦比亚大学ê文学硕士，然后继续koh攻读博士学位。Tī 1929年11月，伊完成博士论文，得tio̍h哲学博士学位，成做台湾人获得文科博士学位ê第一人。

林茂生博士出世tī 1887年，8年后，台湾被清国出卖hō͘日本，注定了林茂生以后ê性命史脱离不了台湾人ê生存kah尊严ê课题。1904年林茂生进入长老教会中学；1908年去日本读同志社中学；1910年进入京都第三高校；1913年进入东京帝国大学，1915年被推选做「高砂青年会」（台湾留学生组织）ê首届会长；1916年tùi东京帝大毕业，成做台湾第一位文学士。

林茂生教授tī去美国深造chìn前，早to̍h有非常好ê成就kah表现。伊担任过长老教中学ê教务主任、理事长；兼任台南师范学校ê教授；1920年转任台南商业专门学校教授。Hit当时台湾ê siōng koân学府只有三个，一个是医学专门学校，一个是师范学校，另外一个to̍h是商业专门学校。Chit时，台南商业专门学校ê教员有二、三十名，m̄-koh，只有两名是台湾人教员，林茂生是其中之一。Bat读过台南商业专门学校ê出名医师作家吴新荣，伊bat án-ne回忆讲：「众学生对chit两位台湾人ê教师特别爱戴，....林茂生教授，伊是日本siōng koân学府东京帝国大学文学部哲学科出身ê，当然是台湾人得tio̍h日本文学士siōng早ê人。日本人为tio̍h怀柔政策，随时任命伊做高等文官，来担任chit间学校ê英语科教授。当时ê世人以『北有杜聪明，南有林茂生』并称，m̄-koh，杜聪明是一位纯粹ê科学者，林茂生却是一位多才ê思想家。」

二○年代初，林献堂等人所推动ê 「台湾议会设置请愿运动」当teh积极展开，为二○年代台湾ê民族运动kah自治运动掀开序幕；「台湾文化协会」mā掀起文化启蒙运动kah民族运动。林茂生受文化协会总理林献堂推荐，担任文化协会ê评议员，并tī 1929年起，连续三年担任台湾文化协会夏季学校讲师，讲授哲学、论理哲学，以及西洋文明史ê课程。以林茂生一介知识精英，投入带有民族色彩真厚ê台湾文化协会阵营，自然会引起日本政府当局非常ê注目，官方ê报纸，甚至用明褒暗贬ê文章来讽刺伊参加文化协会ê活动。M̄-koh八年后，林茂生tī伊ê博士论文中，勇敢指出1920年代台湾人民族意识ê觉醒，而且koh khah肯定二○年代台湾ê社会kah政治运动，伊讲：「In（按：指从事政治社会运动ê台湾知识份子）无满意田总督（按：田健治郎）新政府ê结果，因为伊无带hō͘台湾人民kah日本人平等ê立足点。In mā无满意田总督努力设置ê地方议会，因为它ê议员m̄是由人民普选出来ê，所谓ê『自治』kan-taⁿ是有名无实。所以in开始进行政治平等运动。」

有相当成就kah声望ê林茂生教授，以四十岁之年，koh khah上一层楼，出国去美国深造。虽然伊是the̍h总督府ê公费去美国留学，m̄-koh，伊ê所学、所想kah所讲的，却无kā扶tháⁿ统治当局当做要紧。伊ê博士论文却颠倒对日本tī台湾ê殖民地教育提出无客气ê检讨。我tī拙着《林茂生、陈圻kah in ê时代》ê写作过程中，to̍h有读过林博士ê博士论文原文，当时读tio̍h伊批判日本tī台湾殖民教育ê言论ê时，真是心有同感。Chit pái，林茂生ê博士论文ê华语译本beh正式出版，我to̍h有机会koh再拜读一pái，感觉koh khah欣慰kah感慨。

林博士ê论文题目是："Public Education in Formosa Under the Japanese Administration: A Historical and Analytical Study of the Development and the Cultural Problems"（《日本统治下台湾ê学校教育：它ê发展kah有关文化之历史分析kah探讨》）林茂生tī论文ê研究宗旨中讲：「本研究ê宗旨，事(tāi)先是teh调查教育制度本身ê历史kah它发展ê过程，以及决定它发展ê原则；其次，tī分析教育活动中ê文化冲突以及融合ê因素kah影响，而且chhōe出改进ê结构性ê方法。」论文全册共分九章，除了tī绪论中有绍介台湾岛屿ê自然位置kah人文景观之外，续落去koh叙述tùi荷兰据台以后，经过郑氏王朝kah大清帝国，一直到1920年代日本统治下ê教育理念kah制度ê发展过程。特别tī最后两章，伊分做理论kah实际两部分，提出近代民主主义ê教育理念，检讨日本同化教育ê谬误，koh指出它违反人类学习kah成长所tio̍h遵守ê个体自由kah社会进化原理。

林茂生ê论文tī 1929年完成，tùi台湾教育史ê立场来讲，chit时ê台湾教育，已经经历两pái「台湾教育令」ê颁布—1919年1月4日，台湾总督府以敕令第1号颁布「台湾教育令」，tī台湾ê一切教育设施，lóng以此为根据，各级教育机关ê系统，到chia就án-ne确立；1922年2月，总督府另外颁布新ê「台湾教育令」，明订中等以上学校（师范学校除外）取消台湾人kah日本人ê差别待遇kah隔离教育，实施所谓ê「内台共学」。这是为tio̍h beh配合chit时期所谓ê 「同化政策」，认为「内台共学」是同化siōng好ê途径。形式上，台湾人ē-tàng接受kah日本人程度仝款ê中等以上教育，m̄-koh实际上，「共学」ê结果，kan-taⁿ是提供tī台湾ê日本人子弟koh khah chē ê教育机会，台湾子弟因为tī起跑点iáu是占劣势，所以oh得kah日本人子弟竞争。Koh再讲，tī所谓ê 「内地延长主义」kah「同化」政策之下，台湾ê语言kah历史遭遇tio̍h抹消kah摧残。所以，tú亲像林茂生博士所讲ê，「共学ê理想是基于两个民族接受平等ê教育机会为假设ê前提；m̄-koh tī真正ê操作中，共学ê结果，chit种假设并无实现。」

所以林茂生ê论文及时产生，针对chit种殖民地教育提出批判kah检讨，伊ê评论，主要有以下数点：一、近代教育ê目的在tī tùi个人内部去发展，却m̄是tùi外在强制性teh kā伊灌输，因为担心这可能会损害受教者ê创造能力。同化ê出发点在tī以家己ê标准，tùi外部强加hō͘ 别人，he m̄是人所渴望ê，因为同化是无必要，mā是无hō͘人所认知ê。同化教育kah日本国语教育，tú好是一种看无台湾人文化ê差别来强制执行ê教育；二、近代教育ê特质，是在tī kā教育当做目的，却m̄是手段，用来实现另外一个kah被教育者关系遥远ê目的。同化教育tú好违背chit-ê原理，它kan-taⁿ是要求受教者去接受一个家己从来m̄-bat经验tio̍h ê异质文化；三、近代教育强调尊重学习者ê个性kah天赋能力，而且chit种教育理念ê起源是民主主义ê精神。所以，伊引用伊ê老师杜威ê观点：「学校教育siōng重要ê工作，在tī它一定tio̍h肯定心智自由ê原理」；四、近代教育ê重点，在tī kā正确而且对学习者ê生活有直接必要ê知识传授出来。M̄-koh，同化教育却teh引chhōa学习者偏离生活，而且koh再吸收一kóa完全无必要ê内容。Tī chit种教育之下，学习者ê生活以及hit-ê原本kah伊「息息相关」，并且是伊tī群体生活中时时刻刻ê经验得tio̍h ê真实世界，soah变kah jú来jú疏远。

总讲一句，林茂生ê教育哲学，是建立tī带有民主主义、自由主义kah实用主义ê人本教育上，chit种人本精神，hō͘ 伊发见殖民统治者所宣扬ê「同化」政策，虽然标榜一视同仁，其实是对被殖民ê民族〈台湾kah朝鲜）ê一种伤害，这是违背人本精神ê。所以，做一个殖民统治下ê知识份子，林茂生发出良心ê声音。伊tī论文中无顾情面批评讲：「用同化做目的ê坦白正直声明，致使chit两方ê人民（指台湾kah朝鲜）tī心理上lóng仝款感受tio̍h民族尊严受伤害。」「对一个拥有文化自尊ê民族，亲像台湾人，教育ê缺失是hiah-ni̍h明显，....做一个有心智kah文化ê个人á是民族，对家己努力ê范围被强迫设限，一定会振作koh超越限制，á是至少会向设限者要求发展ê机会。」「丧失一个人ê文化是真不利ê，因为这预示tio̍h性格ê粉碎kah个人生存根基ê损伤，尤其是受tio̍h外来ê压迫。....」

阅读林茂生批判日本tī台湾殖民教育ê论述，siōng hō͘我感慨ê是，伊举出台湾ê母语kah历史受tio̍h摧残ê例。林茂生对「利用国语当做日本化ê工具」提出批判，伊讲：「相信语言同化表示种族同化是荒谬ê见解」「完全放弃使用台湾语言来辅助它家己ê机会，kan-taⁿ会减弱却bē助长它ê立场；它kan-taⁿ会损害，bē改善教育ê结果；结局，这会引起语言意识ê情感，to̍h是对屈从立场ê反感。」「无人会否认政治上、经济上kah社会上lóng需要tī全岛传播国语。当地人民并无反对日语tī岛上成做官方kah教学语言。问题在tī当地语言是m̄是应当kah现在仝款，tùi所有ê教育活动中完全消除。」林茂生无客气án-ne指出：「三百五十万台湾人，á是thang讲是总人口百分之九十五ê人，并无感觉欠缺一个共同语言....若是in m̄-bat日语，tī社会上kah经济上mā bē产生严重ê不便。」「虽然新语言tī真chē方面真有路用，m̄-koh，对一个细汉gín-á来讲，实际上tī厝里并无需要它，个人通信mā无需要它，反tńg，教授当地ê语言是有需要ê，hō͘当地语言幼路化会带来社会价值。用仝款客观态度来看待日本母国历史，却忽略当地历史ê学习，chit种对语言kah历史ê态度，m̄-nā隐含强迫性，mā隐含文化自卑感。」

林茂生koh再三强调：「Tī学校使用当地语言，会有帮助伊对固有文化尊重ê感情。」「台湾语kah日本语tio̍h应该互相提携（thê-hê）」，所以林茂生tī论文中建议，tī公学校ê课程中，汉文应该成做必修科，无应该kan-taⁿ是选修科；通过汉文，thang精练台湾语言。

看了林茂生当年tī日本殖民统治下为台湾ê语言文化请命呼唤ê言论，我感慨万千kah忍bē-tiâu。因为日本殖民统治下，固然对台湾ê语言、历史kah文化采取歧视政策，m̄-koh，林茂生万万无想tio̍h ê是，日本人走了后，号称「祖国」ê中国国民政府来到台湾了后，对台湾ê语言、文化kah历史所采取ê歧视态度，却比日本殖民统治有khah加，无khah减。台湾人换了一个新ê统治者，mā随时koh被换上一套新ê「国语」。Tī国民党政权ê「国语政策」之下，台湾ê本地语言受tio̍h比日本时代koh khah严厉、koh khah无情ê摧残。直到今á日，咱ê下一代，ē-tàng用家己本地母语流利交谈ê，已经无chē loh。可悲ê是，真chē本地kiáⁿ儿，甚至以讲家己ê母语来感觉见笑；这正是一个应验林茂生博士tī论文中所提出ê警讯：Chit种对语言kah历史ê歧视态度，「m̄-nā隐含强迫性，mā隐含文化自卑感。」

Koh khah thang怨叹ê是，林茂生tī伊心目中ê「祖国」—中国政府来临了后，出仕一年四个月(编按：从1945年12月至1947年3月，林茂生受聘为台大教授，koh以校务委员身分代理台湾大学文学院院长。)，却tī二二八事件中丧命tī「祖国」ê枪下。

Tī林茂生博士屈死ê五十三年后ê今á日(编按：2000年)，mā是tī伊得tio̍h博士学位ê七十年后ê今á日，伊ê博士论文ê华语译本chiah tī台湾正式出版，我想它m̄-nā是一位教育家思想ê「吉光片羽」（译注：白话意思「残余仅见」），mā是台湾知识精英ê良知呼唤，koh khah是台湾人苦难历史ê显影。读完了后，咱应该发一个愿：M̄-thang koh做悲哀ê台湾人！Tio̍h做有尊严ê台湾人！
（作者为世界新闻大学教授）