《林茂生博士论文》

 | | | 转寄

[作者小传] 台湾教育思想家—林茂生博士

作者 苏进安 2017.07.30

林茂生先生是一代名牧林宴臣秀才ê长公子，tī 1887年（清光绪13年）10月30日，出世tī台南府城。

林宴臣（后来称做「燕臣」）秀才是府城ê名儒，1898年受聘tī新楼教英国宣教师读汉文kah讲台语。Tī in早暗tàu阵ê中间，伊深受宣教师崇高ê传教精神所感动，就开始慕道、读经，后来tùi巴克礼牧师领洗礼，进入教会。仝hit年，伊进入中学（to̍h是现今ê长荣中学）教册并担任舍监，koh不时出外布道，尤其是tī主日，一定kah学生同齐到乡村ê礼拜堂讲道。

林茂生先生自细汉to̍h天资聪敏，tī第二任费仁纯校长ê时代就读本校，成绩lóng占头前，尤其英语是全校ê冠军。因为成绩超群，校长请伊做助教，教第三班kah第四班（siōng koân年称做头班，续落来是二班）ê地理kah算术，学生称伊做「半仙」。本校优待chit位半仙，hō͘ 伊kah一般学生无仝；每工hō͘伊三顿白米饭，koh加菜一碟(ti̍h)，hō͘全校学生非常欣羡。

林茂生先生tī本校毕业了后，tī 1908年正月由英国教士会资助去到日本，进入京都「同志社中学」深造，毕业了后考入去「第三高等学校」；hit间学校毕业了后，伊koh顺利考入去日本siōng出名ê学府—「东京帝国大学」，主修东方哲学，专攻「阳明学说」。

1916年，林茂生先生tùi东京帝大文学部哲学科毕业，成做台湾人第一个荣获日本siōng koân学府ê文学士学位ê人。仝年九月，林茂生先生学成归乡，tńg来母校，立志beh献身tī台湾ê基督教教育。当时ê万荣华校长聘伊做教头（教务主任），hō͘伊施展抱负。Tī学校ê期间，伊成立「学校后援会」并且担任会长，大力推展「学校基金募捐活动」，为学校ê立案铺路。

1927年，林教头〈当时mā兼任台南高等商业学校教授）由台湾总督府授命，奉派以研究员名义赴欧美深造。林茂生教头tī美国哥伦比亚大学研究所研究教育kah哲学，1928年热天，伊得tio̍h文学硕士学位，koh继续攻读博士课程。林教头身tī美国，心却m̄-bat离开母校，时常写phoe关心学校ê「认定」（立案）问题。

1929年11月，林茂生先生以优异ê成绩得tio̍h哥伦比亚大学ê哲学博士学位；伊是台湾人tī美国荣获哲学博士ê第一人。伊ê博士论文题目是「日本统治下台湾ê学校教育—它ê发展kah有关文化之历史分析kah探讨」。

林茂生先生tī回乡chìn前bat顺续去欧洲，到德国考察。Tī德国柏林大学，伊用德语演讲，向hit-ê市ê市长、大学校长、教授、学者，用李白kah歌德ê诗为例，比较东西文化ê异同，hō͘在座ê德国名流甘拜下风，感佩无停。

1930年正月，林教头衣锦还乡，继续tī本校服务，m̄-koh，伊tī五月间奉派任「台北高等商业学校教授」。林教头心中十分无愿意他就，m̄-koh，因为伊是公费留学，不得不从命。总是，伊ê厝iáu tī台南，因为án-ne，伊犹原留tī本校担任理事kah负责「后援会」ê工作。（后来担任理事长，to̍h是现在ê董事长）。

1931年，林茂生先生奉派担任「台南高等工业学校教授」，教英文kah德文。伊ê授课chiok受学生欢迎，每pái上课lóng座无虚席。Tī日据时代，以林茂生先生ê经历、学识、才华，ē-tàng担任大学校长是理所当然ê，只是因为生不逢时，tī日本统治下ê台湾，chit位杰出ê才子iáu无法度担任一官半职。

根据林茂生博士ê大kiáⁿ林宗义博士（bat担任台大医学院教授，现任世界心理卫生联盟主席kah终身总裁）提起伊ê令尊tī日本统治台湾时代所做ê诗，所有ê年号lóng是用「民国××年」，m̄是用「昭和××年」，因此可见，林茂生博士是gōa-ni̍h-á热爱家己ê祖国，koh认同祖国。

台湾光复了后，林茂生先生对国民政府ê领导bat有殷切期待，mā m̄-nā一pái bat流露出oh得形容ê欢喜。1945年10月，伊bat tī台北ê中山堂，为tio̍h台湾重回祖国ê怀抱（hoâi-phō），发表庆祝演讲。11月koh tī游弥坚ê台湾文化协进会邀请之下，tī台北第一戏院kah陈逢源以及廖文毅同齐发表演讲，题目是「台湾文化ê革命」。

仝hit年12月，林茂生先生tī当时ê台湾大学校长罗宗洛ê邀请之下担任台大预科（to̍h是先修班）主任，然后koh出任台大文学院院长。

当时ê行政长官公署教育处处长范寿康mā请伊担任教员甄选委员会委员。伊为tio̍h beh启发民智，来顺应新时代ê来临，终其尾决心beh办报纸。1946年3月，林茂生先生用日据时代ê「兴南新闻」ê班底为主，创办《民报》；伊家己担任社长，陈旺成做总主笔。《民报》立场不偏，言论公正，批评时弊lóng无惊畏，得tio̍h社会ê喝采，却mā得罪bē少当时ê权贵，为林茂生先生日后ê不幸遭遇埋下危机。

《民报》ê言论除了无法度得tio̍h当时ê行政长官公署ê容允以外，tī 1946年八、九月之间，林茂生先生为tio̍h抗议选举不公，辞去伊已经当选ê「国民参政会」参政员一职，表现出「耿介率真」ê个性。1947年，tī政府一连串ê错误措施kah人民失望所引起ê不满情绪致使发生冲突了后，台湾发生二二八事件，真chē台湾ê知识菁英因为án-ne，soah遭遇灾难，其中包括伟大ê教育思想家—林茂生博士。
今á日，咱tī chia举行追思礼拜，记念出身本校ê siōng杰出校友林茂生先生，一方面缅怀（bián-hoâi）chit位伟大ê教育家为学校、国家、社会所付出ê心血，一方面mā略á尽棉薄之力，为二二八事件蒙冤受辱ê英才洗清冤屈，期待早日行出chit幕历史ê阴影，hō͘凡若为tio̍h chit块土地奉献心力，却受尽屈辱ê英灵ē-tàng安息，hō͘ chit-ê社会迈向koh khah有包容性ê新局面。
（作者为前长荣中学校长）