《巴克礼普世版圣经「汉罗+Ruby」试读本》

 | | | 转寄

第六章

作者 巴克礼普世版小组 2012.02.05

关 系(koan-hē) 行 善(kiâⁿ-siān) ê 教示(kà-sī)

1 Lín tio̍h 谨慎(kín-sīn)， m̄-thang 为(ūi)tio̍h boeh hō͘ 人(lâng) 看(khoàⁿ)，tiâu-kang tī 人(lâng) ê 面 前(bīn-chêng) 展(tián) lín ê 敬 虔(kèng-khiân)。若(nā) án-ne 做(chò)，lín bē-tàng 得(tit)tio̍h 天父(thiⁿ-pē) ê 报赏(pò-siúⁿ)。
2 所以(só͘-í) 你(lí) 赈 济(chín-chè) ê 时(sî)，亲 像(chhin-chhiūⁿ) 假(ké) 好(hó) ê 人(lâng) tī 会 堂(hoē-tn̂g) kap 街路(ke-lō͘) 所(só͘) 做(chò) ê ài hō͘ 人(lâng) o-ló。我(goá) 实 在(si̍t-chāi) kā lín 讲(kóng)：In 已经(í-keng) 得(tit)tio̍h in ê 报赏(pò-siúⁿ) à。
3 只有(chí-ū) 你(lí) 赈 济(chín-chè) ê 时(sî)，m̄-thang hō͘ 你(lí) ê 倒 手(tò-chhiú) 知(chai) 你(lí) ê 正 手(chiàⁿ-chhiú) ê 所(só͘) 做(chò)；
4 你(lí) 若(nā) 恬 恬(tiām-tiām) 赈 济(chín-chè) 人(lâng)，tī 暗 中(àm-tiong) teh 鉴 察(kàm-chhat) 人(lâng) ê 天父(thiⁿ-pē) 会(ē) 报赏(pò-siúⁿ) 你(lí)。

关 系(koan-hē) 祈祷(kî-tó) ê 教示(kà-sī) (Lk 11:2~4)

5 Lín 祈祷(kî-tó) ê 时(sî)，m̄-thang 亲 像(chhin-chhiūⁿ) 假(ké) 好(hó) ê 人(lâng)；因为(in-ūi) in ài khiā tī 会 堂(hoē-tn̂g) kap 大(toā) 街面(ke-bīn) ê oat角(kak) 祈祷(kî-tó)，boeh hō͘ 人(lâng) 看(khoàⁿ)tio̍h。我(goá) 实 在(si̍t-chāi) kā lín 讲(kóng)：In 已经(í-keng) 受(siū)tio̍h in ê 报赏(pò-siúⁿ) à。
6 只有(chí-ū) 你(lí) 祈祷(kî-tó) ê 时(sî)，tio̍h 入去(ji̍p-khì) 你(lí) ê 房 间 内(pâng-keng-lāi)，门(mn̂g) 关(koaiⁿ) 起来(khí-lâi)，求(kiû) 你(lí) ê 父(pē)，tī 暗 中(àm-tiong) teh 鉴 察(kàm-chhat) 人(lâng) ê 天父(thiⁿ-pē) 会(ē) 报赏(pò-siúⁿ) 你(lí)。
7 Koh lín 祈祷(kî-tó) ê 时(sî)，话(oē) m̄-thang ta̍uh-ta̍uh 重 复(têng-ho̍k)，亲 像(chhin-chhiūⁿ) 未 信 者(bī-sìn-chiá)；因为(in-ūi) in 想(siūⁿ) 讲(kóng) 真(chin) chē 话(oē)，chiah 得(tit)tio̍h 听(thiaⁿ)tio̍h。
8 所以(só͘-í) lín m̄-thang 学(o̍h) in；因为(in-ūi) lín bē 求(kiû) 他(I) ê 事 先(tāi-seng)，lín ê 父(pē) 已经(í-keng) 知(chai) lín 所(só͘) 欠 用(khiàm-ēng) ê。
9 所以(só͘-í) lín tio̍h án-ne 祈祷(kî-tó):阮(goán) tī 天 顶(thiⁿ-téng) ê 父(pē)，愿(goān) 你(lí) ê 名(miâ) 圣(sèng)。
10 你(lí) ê 国(kok) 临 到(lîm-kàu)。你(lí) ê 旨意(chí-ì) 得(tit) 成(chiâⁿ)，tī 地里(tē-ni̍h) 亲 像(chhin-chhiūⁿ) tī 天 顶(thiⁿ-téng)。
11 阮(goán) ê 日食(ji̍t-si̍t)，今(kin) á 日(ji̍t) hō͘ 阮(goán)。
12 赦 免(sià-bián) 阮(goán) ê 辜负(ko͘-hū)，亲 像(chhin-chhiūⁿ) 阮(goán) 也(iā) 有(ū) 赦 免(sià-bián) 辜负(ko͘-hū) 阮(goán) ê 人(lâng)。
13 M̄-thang chhōa 阮(goán) 入(ji̍p) tī 试(chhì)，tio̍h 救(kiù) 阮(goán) 脱 离(thoat-lî) hit-ê pháiⁿ-ê。
14 因为(in-ūi) lín 若(nā) 赦 免(sià-bián) 人(lâng) ê 过 失(koè-sit)，lín ê 天父(thiⁿ-pē) 也(iā) boeh 赦 免(sià-bián) lín。 15 Lín 若(nā) 无(bô) 赦 免(sià-bián) 人(lâng) ê 过 失(koè-sit)，lín ê 父(pē) 也(iā) 无(bô) boeh 赦 免(sià-bián) lín ê 过 失(koè-sit)。

关 系(koan-hē) 禁 食(kìm-chia̍h) ê 教示(kà-sī)

16 Koh lín 禁 食(kìm-chia̍h) ê 时(sî)，m̄-thang 亲 像(chhin-chhiūⁿ) 假(ké) 好(hó) ê 人(lâng) 面(bīn)带(toà) 忧 愁(iu-chhiû)；因为(in-ūi) in 将(chiong) in ê 面(bīn) 变(piàn) pháiⁿ 看(khoàⁿ)，boeh hō͘ 人(lâng) 看(khoàⁿ)tio̍h in teh 禁 食(kìm-chia̍h)。我(goá) 实 在(si̍t-chāi) kā lín 讲(kóng)：In 已经(í-keng) 受(siū)tio̍h in ê 报赏(pò-siúⁿ) à。
17 只有(chí-ū) 你(lí) 禁 食(kìm-chia̍h) ê 时(sî)，tio̍h 抹(boah) 你(lí) ê 头(thâu)，洗(soé) 你(lí) ê 面(bīn)；
18 无(bô) hō͘ 人(lâng) 看(khoàⁿ) tio̍h 你(lí) teh 禁 食(kìm-chia̍h)，只有(chí-ū) hō͘ 看(khoàⁿ) bē tio̍h ê 天父(thiⁿ-pē) 知 影(chai-iáⁿ)，án-ne hit 位(ūi) 暗 中(àm-tiong) 看 见(khoàⁿ-kìⁿ) 你(lí) 所做(só͘-chò) ê,天父(thiⁿ-pē) 会(ē) 报赏(pò-siúⁿ)你(lí)。

天 顶(thiⁿ-téng) ê 财 宝(châi-pó) (Lk 12:33~34)

19 M̄-thang 为(ūi)tio̍h 家己(ka-kī) 积 聚(chek-chū) 财 宝(châi-pó) tī 地里(tē-ni̍h)，tī-hia 有(ū) 虫(thâng) 会(ē) 咬(kā), 会(ē) 生(seⁿ)sian, 也(iā) 有(ū) 贼(chha̍t)á 会(ē) iah孔(khang) 来(lâi)偷(thau)the̍h。
20 只有(chí-ū) 为(ūi)tio̍h 家己(ka-kī) 积 聚(chek-chū) 财宝(châi-pó) tī 天 顶(thiⁿ-téng)无(bô) 虫(thâng), 也(iā) bē 生(seⁿ)sian, 也(iā) 无(bô) 贼(chha̍t)á 会(ē) iah孔(khang) 来(lâi)偷(thau)the̍h。
21 因为(in-ūi) lín ê 财宝(châi-pó) tī hia，lín ê 心(sim) 也(iā) boeh tī hia。

身 躯(sin-khu) ê 灯(teng) (Lk 11:34~36)

22 身 躯(sin-khu) ê 灯(teng) 就是(chiū-sī) 目 睭(ba̍k-chiu)；你(lí) ê 目 睭(ba̍k-chiu) 若(nā) 金(kim)，全(choân) 身 躯(sin-khu) 就(chiū) 光(kng)。
23 你(lí) ê 目 睭(ba̍k-chiu) 若(nā) 花(hoe)，全(choân) 身 躯(sin-khu) 就(chiū) 暗(àm)。你(lí) 内面(lāi-bīn) ê 光(kng) 若(nā) 暗(àm)，hit-ê 暗(àm) jōa 大(toā) ah！

上 主(siōng-chú) kap 钱 财(chîⁿ-châi) (Lk 16:13；12:22~31)

24 无(bô) 人(lâng) 会(ē) 服 事(ho̍k-sāi) 两(nn̄g) 个(ê) 主 人(chú-lâng)；因为(in-ūi) 伊(i) ē 怨 恨(oàn-hūn) chit-ê，疼(thiàⁿ) hit-ê;á是(sī) 会(ē) 尊 重(chun-tiōng) chit-ê，看 轻(khoàⁿ-khin) hit-ê;lín bē-tàng 服 事(ho̍k-sāi) 上 主(siōng-chú) 续(soà) 服 事(ho̍k-sāi) 钱 财(chîⁿ-châi)。
25 所以(só͘-í) 我(goá) kā lín 讲(kóng)：M̄-thang 挂虑(khoà-lū) lín ê 性命(sìⁿ-miā) boeh 食(chia̍h) 甚么(sím-mi̍h)，boeh lim 甚么(sím-mi̍h)，á是(sī) lín ê 身 躯(seng-khu) boeh 穿(chhēng) 甚么(sím-mi̍h)。Lín ê 性 命(seⁿ-miā) kiám m̄是(sī) 比(pí) 食 物(chia̍h-mi̍h) khah 要紧(iàu-kín), 身 躯(seng-khu) kiám m̄是(sī) 比(pí) 衫 裤(saⁿ-khò͘) khah 要紧(iàu-kín)？
26 试 看(chhì-khoàⁿ) 空 中(khong-tiong) ê 飞 鸟(poe-chiáu)，无(bô) 种 作(chèng-choh)，无(bô) 收 成(siu-sêng)，无(bô) 积 聚(chek-chū) tī 粟 仓(chhek-chhng)，lín ê 天父(thiⁿ-pē) 也(iā) teh 饲(chhī) in。Lín kiám 无(bô) 比(pí) hiah-ê khah 贵 重(kùi-tiōng) mah？
27 Lín 甚么(sím-mi̍h) 人(lâng) ē 用(ēng) 挂 虑(khoà-lū) hō͘ 性命(seⁿ-miā) khah 长(tn̂g) 一(chi̍t) 刻(khek) 久(kú)？
28 啥事(siáⁿ-sū) 为(ūi)tio̍h 衫 裤(saⁿ-khò͘) 挂虑(khoà-lū) ah？你(lí) 想(siūⁿ) 看(khoàⁿ) bāi lè, 山 里(soaⁿ-ni̍h) ê 百 合 花(pek-ha̍p-hoe)，怎 样(cháiⁿ-iūⁿ) 大(toā) 丛(châng)；in 无(bô) 劳苦(lô-khó͘)，无(bô) 纺 织(pháng-chit)；
29 m̄-koh 我(goá) kā lín 讲(kóng)：当(tng) 所罗门(só͘-lô-bûn) 荣 华(êng-hoâ) 富贵(hù-kùi)ê 时(sî)，伊(i) 所(só͘) 穿(chhēng) ê m̄ 值(ta̍t)tio̍h chiah-ê 花(hoe) ê 一(chi̍t) 蕊(lúi)。
30 Taⁿ 山 里(soaⁿ-ni̍h) ê 草(chháu)，今(kin)á日(ji̍t) tī-teh，明(bêng)á日(ji̍t) hiat tī 火 炉(hoé-lô͘)，上 主(siōng-chú) hō͘ 伊(i) 穿(chhēng) 到(kàu) án-ne，何 况(hô-hóng) lín，小(sió) 信(sìn) ê 人(lâng) ah？
31 所以(só͘-í) m̄-thang 挂 虑(khoà-lū) 讲(kóng)：阮(goán) boeh 食(chia̍h) 甚么(sím-mi̍h)？Boeh lim 甚么(sím-mi̍h)？Boeh 穿(chhēng) 甚么(sím-mi̍h)？
32 因为(in-ūi) chiah-ê lóng 是(sī) 未 信 者(bī-sìn-chiá) 所(só͘) 追求(tui-kiû) ê;lín ê 天 父(thiⁿ-pē) 也(iā) 知(chai) chiah-ê lóng 是(sī) lín 欠 用(khiàm-ēng) ê。
33 只有(chí-ū) 事 先(tāi-seng) 求(kiû) 他(I) ê 国(kok) kap 他(i) ê 义(gī)，他(I) 自 然(chū-jiân)会(ē) 将(chiong) 其他(kî-tha) 一切(it-chhè)ê 物(mi̍h) lóng 赏赐(siú-sù) hō͘ lín。
34 所以(só͘-í) m̄-thang 为(ūi)tio̍h 明(bîn)á日(ji̍t) 挂 虑(khoà-lū)；因为(in-ūi) hit-ê 明(bîn)á日(ji̍t)，伊(i) boeh 家己(ka-kī) 挂 虑(khoà-lū)。一日(chi̍t-ji̍t) ê 艰 苦(kan-khó͘) 一 日(chi̍t-ji̍t) 当(tng)。