《台文通讯精选》

 | | | 转寄

名片

作者 徐来 2008.02.03

「阿光，你有看着作咖哩饺ê钟先生ê电话无？」阿碧一面翻手摺簿á，一面问。「无ah。」阿光对册堆hia gia̍h头应讲，「你tō是物件拢无beh khǹg tī固定ê所在。」阿碧a koh去péng名片簿á，名片簿á真大本，内面ê名片五花十色，有ê是真熟ê朋友，有ê是kan-na见过一摆ê人。有ê名片真幼秀，有ê印kah全全是头衔(hâm)，有ê真朴素、简洁，有ê利用中西头衔名称ê差别，膨风kah hō͘人看着会起爱笑。Hit个tī多伦多市作咖哩饺真chē年，品质永远保持一流，派送时间永远准时ê钟先生ê名片chhōe bē着，阿碧心内暗暗着急。Eng-暗，有一kóa朋友beh来厝里开会，伊自认厨艺无精，买kóa咖哩饺来补充，会减少心理负担。Tī péng chhōe ê中间，作头毛ê亚伯ê名片，出现tī眼前，伊安心微微á 笑一下。

顶礼拜六就是因为beh参加餐会，chhōe无亚伯ê名片thang约时间作头毛。中文‘黄页’广告又koh hō͘阿光sóa走，只好无约时间强去。亚伯ê生理真好，伊ê太太teh替伊预约。Hit工，规间发廊全全是人，等不止一khùn á 才轮到伊。亚伯kap另外一个少年家作伙经营这间美发店，店面无大，总是布置kah真幽雅。伊ê手艺精，而且koh不断求新求进步，所以客户拢自自然然爱chhōe伊。Hit日，碧a作好头毛了后，真慎重kā伊ê名片袋入手袋，转去了后，马上khǹg tī名片簿。确实也真心适，平时tī名片the̍h出the̍h入ê中间，碧a也无感觉特别啥物。M̄-kú，ùi这摆ê经验，伊认为名片the̍h出去就是传达一种信息，讲出名片者ê功用kap服务范围。设使写kah规大堆，印kah真súi，真高尚，却无半项实质ê效能，mā无啥意思。或者，讲khah严格一点á，当收名片ê人，失去这张名片ê时，若是bē感受着一种损失kap不安，按呢，这种名片就是无路用，che只不过是一张白纸，而且这张白纸是teh浪费空间，制造pùn-sò niā-tiāⁿ。

想着eng-暗ê开会，伊又koh烦恼起来。减采，上盖好ê办法就是拍电话去介绍钟先生ê朋友ê厝，koh再kā伊问一摆lah ！