《台文通讯精选》

 | | | 转寄

阿母

作者 傅瑛惠 2008.02.10

我ê老母离开世间，已经有十外冬lah，m̄-kú我犹原真数念伊。 我常常teh想，现在所选出来 ê“模范母亲” 是beh按怎样kap古早每一位老母相比phēng leh？现在“好妈妈” ê定义，是讲，伊ê kiáⁿ儿有受着好ê教育，tī社会有好ê头路，好ê地位，koh是真有钱，有名声hō͘人thang欣羡ê。若是tī四、五十冬前，gín-á若会thang食三顿饱，koh有thang读册，有清气ê衫thang穿，人就知这个gín-á真好命，有伟大、勤俭koh勇敢ê老父、老母teh培养、扶持。

我ê老母是一个真平凡ê妇仁人。伊出世tī一个真普通ê家庭，顶面有一个兄哥、一个大姊，下脚有三个小弟。六个gín-á tī以前ê家庭来讲，mā是一个bē细ê负担。所以我ê老母tī细汉差不多 5、6 岁ê时阵，就送hō͘人做养女。真佳哉ê，是伊ê养父、养母mā算真疼伊。伊bē thang受真chōe ê教育，只有读1、2 年ê册，bat几字á nā-tiāⁿ。伊tio̍h-ài去园里做khang-khòe，也tio̍h煮饭、洗衫 。日子按呢过去几nā年。有一日，tī园里teh做khang-khòe ê时，远远看着一个青年人tùi hit头走óa来。伊hit阵已经是一个少女，虽然对这个人真好奇，m̄-kú pháiⁿ势看siuⁿ久，就紧紧头壳lê-lê，koh àⁿ teh做khang-khòe。无拍算，这个青年人行到伊ê面前，就停落来。伊听着一个声对伊讲：“阿銮，是我阿哥lah。我beh来kā你chhōa倒转去lah !” 我ê老母gia̍h头，一下看tō是伊ê大兄，伊欢喜kah bē讲得。我ê老母，就按呢tī伊家己ê兄哥受高等教育毕业、家庭生活khah好以后，会得thang倒转去伊家己ê tau。我ê四个阿舅拢受真koân ê教育，却无因为我ê老母长年tī外面生活，无受好ê栽培，来看轻伊。也因为按呢，我ê老母得着真大ê安慰。Tī兄哥ê主意，小弟祝福之下，伊嫁hō͘我ê老父。

我ê老父是一个真古意ê人。战乱中生活ê辛苦，我bē tàng体会，因为我是tī战后才出世ê。Tùi我bat代志，有印象以来，我就m̄ bat饿着。我有皮鞋thang穿，虽然我tio̍h-ài khioh阮阿姊ê旧衫来穿，(阮tau有5个姊妹á，只有一个查甫ê!) 但是我ta̍k年犹原有新衫thang穿过年。Che ham别人相比起来，实在是好到有chhun lah。

Tī以前，查甫人若是有teh食头路，园里ê khang-khòe查某人tio̍h去做。我ê妈妈，伊透早起来，tio̍h-ài煮饭、洗衫、饲鸡á、鸭á、切猪菜，sa̍h-lia̍p来饲猪，koh清猪tâu。伊也tio̍h-ài去园里，m̄是挽土豆、甘á蜜、绿豆，无tō是ài割稻á。印象中，阮tau ê埕，m̄是teh pha̍k稻á，就是pha̍k土豆，有时阵也有绿豆á。我mā是bat去园里挽绿豆á，抑是甘á蜜。总是chia ê khang-khòe拢是“插花á ” nā-tiāⁿ。每一遍，去园里转来，我ê脚手皮肤拢会痒，真bē爽快。这阵á kā想起来，实在真钦佩我ê老母。伊是怎样teh拖磨，阮兄妹á才会thang chiah-nih á好命过日。

伊tùi m̄ bat上帝ê家庭嫁入来tī基督教ê家庭。Tùi m̄ bat上帝到bat，tùi懵懂（bóng-tóng）到完全ê交托信靠，全力支持koh鼓励伊ê kiáⁿ儿致意tī教会ê事奉，chia ê信仰过程mā留hō͘阮真thang学习ê所在。Tī阮姊妹á拢嫁出去以后，若是有闲，就会转去看伊。常常，阮一人一旁，倒tī眠床teh讲话。伊犹原不时teh提醒阮，tio̍h-ài尽本份tī家己ê角色。我想伊一生最大ê安慰，是看着伊ê kiáⁿ儿、查某kiáⁿ拢行tī正路。伊ê辛苦阮chia ê序细看kah真清楚，也知影阮所回报伊ê，m̄值得伊付出tī阮身上百分ê一分。

我ê老父退休年老ê时，续带着“老人憨呆” ê症头。我ê老母，犹koh有做bē完ê代志。M̄是tio̍h-ài kā我ê老父换衫裤，也tio̍h-ài清伊所放落来ê屎尿。Tī hit时阵，大部份ê人拢m̄知有这种ê症头，mā无法度谅解，是按怎我ê老父thài chiah-nih á pháiⁿ服侍。我ê老母tī我ê老父过身以后，无2年，就发现生癌。经过2冬ê治疗，伊就离开世间。

我感谢上帝，hō͘我有chiah-nih伟大ê老母。虽然伊有做bē了ê khang-khòe，也流真chē目尿，总是阮m̄ bat听着伊teh怨叹。伊行过辛苦ê人生路，总是he是真súi ê脚迹。伊已经争战好ê争战。我用讲bōe尽ê感恩，时时the̍h出伊送我“祈祷ê手” hit条金链á，teh数念伊。