《台文通讯精选》

 | | | 转寄

自由ê光火

作者 Bruce McLeod 2007.11.25

＜罗益世出狱10周年庆祝会演讲＞

真想bē到罗益世转来加拿大已经有10冬ah！10冬ah...自从碧玲kap益世hō͘人tùi机场接出来... Tī hia欢迎ê布条写讲「欢迎加拿大ê民主、人权斗士罗益世转来」... Hit一日是礼拜日，in hō͘人直接送去教会... Tī pho̍k á声欢迎了后，礼拜继续进行，一位长老读hit日ê经节，其中包括这句：「上帝已经拍折压迫者ê拐」。

Tùi hit阵开始到taⁿ，已经有chiah-nih chē ê代志发生... 本底tī土里teh beh lian去ê脆弱ê民主草木，已经tī hit块美丽岛长大、开花。

Keysen、Cayton kap Serena已经出世。Kap所有ê gín-á仝款，in是上帝无放弃咱这个世界ê信号。In ê出世ná亲像是teh预报一个koh khah好ê未来。

益世hō͘人剃光头，kap一个老人做伙关tī一间细细ê牢房，一个水槽kap thàng光ê便所（toilet）... 电火24小时拢to̍h leh，每日kan-taⁿ 会tàng出去外口运动10分钟，每礼拜只有5分钟有电视银幕监视ê探访... Hia ê日子这阵来看ká-ná是一个恶梦，m̄-koh这种恶梦犹tī真chē所在teh发生。

咱m̄ thang bē记得... 益世khiā tī乌暗中，乌暗并无拍倒光明... tī hit张真赞ê相片顶，伊ê面有一chōa光...

碧玲ê面上（chiūⁿ）kap内心也有一pha火... 伊每日fax消息去监狱，m̄惊厌siān... 亲像耶稣ê故事内底hit个无停teh要求ê寡妇... 一摆koh一摆，拢无beh放弃... 伊去拜访国会议员，有ê议员无亲像Joe Clark（编注：当时ê加拿大外交部长）kā伊拒绝，in有回应... 伊继续拍电话，推动请愿书ê连署，来联合教会总会ê大会... tī hia演讲5分钟，大家拢真感动... soah落来全场表示支持... koh来是恁送我亲身the̍h联合教会ê声明去台北... 朱宝山保护我，hō͘我无去hō͘ “胡蝇（hô͘-sîn）”（编注：爪爬á）沾着。

这pha火tùi koh khah深ê所在照出来... 台北ê义光教会tō是tī hia照顾、滋养这pha火。这间教会ê牧师tī狱中kā益世洗礼...

这pha火也tùi台湾基督长老教会发光出来。虽然人数m̄是kài chē，m̄-koh tī过去乌暗ê年月有发挥真大ê影响力... 1971年tī真危险ê情形之下，教会勇敢khiā出来发表「上帝赏赐人民有决定家己命运ê权利」... 台湾基督长老教会ná亲像是盐... 伊ê影响超过伊ê人数... 伊支持教会URM（城乡传道）非暴力抗争ê训练... 几nā百人接受Ed File（编注：加拿大ê牧师兼社会学教授）ê训练... chia ê改变kap新生ê奇迹之一 tō是无用着ĀK ê枪或是爆炸桥梁。无使用暴力...

这pha火也tī Toronto台湾联合教会发光出来，tī hia台湾ê民主、人权一直受着关心。一个真好ê例tō是这间教会ê会友林哲夫教授ê人生... 伊ê信仰引chhōa伊tùi主日学老师kap圣歌队队员到转去台湾以及世界各地。林哲夫慈悲ê精神hō͘伊不管去到tó位拢有留着一chōa光明ê道路。

伊tō是34冬前来lòng我ê门ê hit个人，伊kā我介绍台湾民主ê花蕾tng teh开花、奋斗ê情形。

伊chhōa施明德来我ê办公室，hō͘我kap伊见面... 我听着hō͘人着惊ê长期坐监ê故事，以及伊拒绝为着伊无犯ê罪来接受释放... （因为伊认为，真正ê罪恶是in阻挡民主草木ê生长... 是in对伊侵犯，m̄是伊侵犯in）... Tī深坑ê所在继续生长，行向khah好ê未来，结果施明德tī掠伊去坐监ê国家当选担任公职...

林哲夫安排我kap前台湾基督长老教会总干事高俊明牧师见面... 伊bat来Toronto kap Tutu主教做伙。后来我tī伊台湾ê办公室kap伊见面... 伊亲像钢铁hiah-nih坚强... 伊kā我讲起伊tī一间细细ê牢房四冬ê情形... 因为伊拒绝讲出hit位逃犯tī tó位... 我也有见着伊ê太太... 伊然后chhōa我去义光教会... 我永远bē去bē记得ê一日。

Tī咱替罗益世庆祝ê这个暗暝，我回想所有chia ê代志...我真感动，我beh按呢问我家己kap我ê教会...

咱若是去坐监，咱是会为着啥物原因？是啥物原则对咱hiah-nih重要，咱敢会比一phiân石壁koh khah ngē，bē去受着感动？

有啥物光会hō͘咱有气力来坚强khiā起？咱若hō͘两位警卫掠tiâu leh，咱ê面顶敢会恬静？Tī乌暗ê梦中，咱会写出啥物诗？

高牧师tī狱中有写这首诗：

「我求主hō͘我一束鲜花
M̄-koh 伊hō͘我一丛koh pháiⁿ看koh有刺ê仙人掌
我求主hō͘我几只美丽ê蝴蝶
M̄-koh 伊hō͘我真chē koh bái koh惊人ê刺毛虫
我着惊 我失望 我怨叹！
但是 经过真chē日子
我忽然看着hit丛仙人掌盛开真chē鲜艳ê花
Hia ê刺毛虫也变做美丽ê小蝴蝶 飘舞tī春风里
上帝ê旨意是最美善ê ！」

所以tī圣诞节ê时阵，当咱想着hit pha火tī乌暗中teh to̍h，乌暗无kā伊拍hoa... 咱用感恩ê心来回想益世tùi乌暗中转来ê时，伊ê面上有一chōa光。

Tī这个季节里，咱祈求咱拢会tàng tùi这pha火学习着物件，也浸浴tī hin内底，hō͘这pha火经过咱ê努力愈传愈远，一直到这个自由ê花蕾tī台湾hit块美丽岛、tī加拿大这块美丽ê土地、以及其他所在，tī hia花蕾ê球根犹koh tâi tī乌暗ê所在，会tàng真有尊严自由盛开，一直到上帝所疼惜但是受破坏ê世界变做一个家庭。

注：Bruce McLeod牧师是前加拿大联合教会ê议长kap前加拿大教会协会ê主席。伊也是一位专栏作家，经常tī加拿大ê报纸写专栏。McLeod牧师是台湾人长期ê朋友，非常关心台湾民主kap人权ê情形。1989年，罗益世转去台湾为立法委员选举助选ê时受掠，以违反国家安全法被判刑10个月。1990年，McLeod牧师代表加拿大联合教会去台湾，要求国民党政权释放罗益世。这篇文章是伊tī 2000年12月初8庆祝罗益世出狱10周年ê演讲，台文通讯编辑室翻译做台文。