《台文通讯精选》

 | | | 转寄

『当医生遇见Siki』

作者 阿秀 2007.11.18

【读册心得】

阮ê读册会，这个月读ê册是赖其万医生ê『当医生遇见Siki』，犹未开始讨论，就有人讲起「最近医生nái拢会写册？」是啊！读册会讨论过ê医生作家，tùi王溢嘉、候文咏、陈雷、王智弘到chit-má ê赖其万，写册ê医生确实愈来愈chē，但che并无表示医生无顾正业，医生ê khang-khòe所接触ê，有in无仝ê一面，koh加in个人ê感情kap思考，表达hō͘咱ê是专业、丰富、koh有人情味ê故事，『当医生遇见Siki』就是一本按呢ê册。

Siki是一字Indian ê单话，意思是「我关心你，你也关心我」。册中描写一个印地安女诗人介绍in印地安ê文化遗产ê时，伊讲beh向世界各地ê人挑战，tó一个文化会tàng亲像in ê Siki，一个单字就会tàng表达「互相关怀」。赖医生讲伊想真久，确实无办法tī台湾话、中国话、日本话、抑是英语chhōe着一个单字有chiah深ê意思。我想che mā是咱保存母语ê意义，相信tī台湾话中间，mā有简简单单ê一个字，无办法用别种语言来代替。

「我关心你，你也关心我」，是这本册ê第一主题。Tī咱ê日常生活，有病chhōe医生，医生关心咱，咱拢认为是真自然ê代志。事实上，医生有时mā需要咱ê关心。故事tùi赖医师家己身体欠安，tī病院beh接受检查讲起。一个患者khà电话来，引出chē chē Siki ê故事，有美国ê，有台湾ê，有人物、有亲情，mā有转去台湾ê感想，。…

赖医师tī美国23冬。当伊决定beh转去台湾服务ê时，有真chē选择，后来伊决定beh去慈济医学院。上大ê原因，是「生命ê老师」这段故事，读册会ê朋友特别提出来分享。医学院ê毕业生，大家拢会记得人体解剖ê时，ho͘h-ma-lin（formaline）ê重味，浮浮肿肿ê尸体，有人想beh吐，有人久久m̄敢食bah-tah（butter）。慈济ê解剖科，每四个学生就有一具尸体实习，听讲是全世界医学院上好ê比例。In 对尸体ê处理，无用ho͘h-ma-lin，用高科技ê方法，直接喷一层化学药品，kā尸体包一层薄膜（coconing）。每一个解剖台拢用kòa khàm起来，顶面贴一张死者ê相片kap一生ê介绍。慈济师生拢称呼尸体「老师」，tī学期结束ê时，每一个学生拢写一张批hō͘老师，报告in ê学习心得。Koh kā尸体一针一线thīⁿ（缝）倒转去，最后用白布包起来，换清气ê长衫，tī家属ê面前由四位学生入木，一张批、一束花，tī学生感恩、崇敬kap祝福中火化。有一位太太讲，甘愿hō͘学生tī伊ê身躯划错一百刀，也无爱in将来tī病人ê身上划错一刀。伊koh讲，当学生tī伊ê身躯划第一刀ê时，就是伊心愿圆满ê时。慈济是一个尊重生命ê所在，莫怪慈济医学院会tàng得着chē chē ê尸体捐献，甚至西方国家也tòe bē着。

赖医师是神经科ê专科医师。Tī这本册内底几nā摆提起「癞痫病」，我对这个病无真清楚，心内想敢是bat听过ê羊癫疯」，后来koh看落去才知影kā癞痫病」kap羊，抑是其他ê动物连作伙是真无好，真藐视ê讲法。赖医师借用金恩博士（Dr. Martin Luther King）有名ê一句话「我有一个梦」讲：「我有一个梦，tī我ê故乡台湾，大家bē koh用「疯癫」、「羊癫疯」抑是「猪母癫」这种轻视ê字眼。大家拢叫这种脑神经病作「癞痫病」，也mài认为che是遗传病、精神病、抑是鬼魂附身，夺走癞痫患者ê社交机会」。Ti chia咱看会出赖医师m̄是kan-na医病，伊mā医病人ê心灵。伊认为帮助病人除去所受ê误解kap排斥，kap hō͘病人正确ê治疗，仝款重要。

「妈妈的脸儿」这篇文章，赖医师回想伊ê老母，虽然是真平常ê故事，但是真有感情。文章内底有一首诗就叫做「妈妈的脸儿」，读册会ê阿惠特别爱这首诗。

犹会记得吴医师the̍h这本册借我ê时，伊讲：「这本册借你看，相信你会真爱，内底有真chē鸡汤。」确实che是一本心灵鸡汤ê册，非常温暖。赖医师目前是慈济医学院kap人文社会学院副院长，相信伊转去台湾，除了医病、医病人ê心灵，mā是台湾社会ê一股暖流，读册会ê朋友大家真欢喜读着这本好册。