《台文通讯精选》

 | | | 转寄

火车

作者 罔想 2007.12.02

细汉ê时，阮tòa tī台南，台北是远远ê所在。我有阿伯tī台北做医生，有时阿妈beh去台北看in，爸爸tō chhōa阿妈去坐火车。Tī火车头，我看火车拖长长，一直驶远去，希望有一日我mā会tàng坐火车去远远ê所在。

读小学ê时，阿兄kap阿姊开始去台北读大学，in坐火车去，坐火车转来。我去车头接in，in讲火车票无好买，火车便当无好食，in讲khah爱坐快车，m̄免停真chē站。我心内想，停khah chē站，慢慢á驶，慢慢á到，敢m̄是khah好？

10岁ê时，第一摆坐火车，火车叫做「光华号」，一路摇来摇去，驶4点外钟到台北。Tùi火车ê窗á，我这个都市gín-á第一摆看着一片一片ê田园、作穑（sit）人ê稻á，看着青瓦红墙ê厝，看着水牛、白鴒鸶，看着咱ê美丽岛。

大学ê时流行peh山、行路，hit时阵上热ê路线是tùi阿里山行到溪头。行tī山路，有时行tī铁枝路顶，有时mā有小火车对面驶过来，hō͘恬恬ê山加添趣味。

后来，火车去，火车来。火车带来有甜甜、酸酸、涩涩ê滋味。有一摆tùi潮州恁ê厝出来，你ê老pē送我去车头，买车票beh hō͘我转去台南，心头纷纷乱乱，火车来就peh起lih坐，等我心定ê时，火车已经到枋寮。

出国了后，北美洲公路发达，无啥物机会坐火车。有一摆去Mississauga chhōe朋友，时间已经真赶，无想到koh hō͘一列火车挡tiâu leh，挡真久，头前ê车有ê等bē落，开始越头。算看有几节，哇！超过100节，koh加算无着ê，应该有200节，che是载货ê火车。我想tī北美洲，火车拖真长，用来载货ê功用比载人khah大。

前二工，tùi台湾送出来ê卫星新闻，看着一台小火车慢慢驶到集集车站，知影集集线ê小火车恢复通车，心里感觉真欢喜。咱受伤ê故乡一节一节，一段一段ê恢复，引起我对火车ê回想，希望后摆转去台湾，有机会koh去坐火车。