《台文通讯精选》

 | | | 转寄

阿母a

作者 多城客 2007.09.02

顶礼拜tī教会，阿母a the̍h 200 kho͘ ê加票hō͘我，讲是beh捐hō͘｢台文通讯」做共同发行人ê基金。伊是读着「台文通讯」80期，聪美基金会ê紧急呼吁，知影基金会ê经济发生困难，tō自动the̍h钱出来。我本来有一点á踌躇，感觉hō͘伊老大人出钱无啥好，m̄-koh伊ê查某kiáⁿ寿惠讲：「无要紧，阿母a有钱leh。」，而且che也是阿母âe一片心意，所以我tō代替「台文通讯」kā钱收起来。

阿母a名叫李刘鸾，是多伦多台湾联合教会ê会友，tī教会真受大家ê敬疼，拢叫伊「阿母a」。阿母a今年已经满96岁，若是算台湾岁应该是98岁lah。伊虽然行动无啥方便，m̄-koh身体真勇健，精神真好，不时拢笑眯眯。伊对人真亲切，tú着人拢会讲平安。阿母a ê头脑真清楚，记池mā真好，无输少年一辈ê人，教会每一个人ê名伊拢知影，记kah tiâu tiâu tiâu。

阿母a真心适，若tú着我，伊会tiāⁿ tiāⁿ讲，恁第二小弟名做啥teh做啥，第三小弟名做啥teh做啥，第四小弟是李淑德ê学生....。实在真趣味，因为伊m̄-taⁿ m̄-bat in，mā m̄-bat见过in，伊kā听过ê代志拢记记tī头壳内。Tī教会，伊会恬恬坐tī hia注意人，关心别人。有一摆，我连续两礼拜无去教会，hit下晡，阿母a随时tō拍电话来，问讲：「你是按怎几nā礼拜无来教会？」。

阿母a是台南市人，出世tī一个基督教家庭。细汉ê时bat tī太平境教会读主日学，老师是高俊明牧师ê母亲。后来读东门女学校，koh进入新楼女学校，tō是这时ê长荣女中，tī hit阵是真koân ê学历。阿母a自细汉tō开始读罗马字圣经，所以伊讲罗马字是伊ê本行。

阿母a ê先生是前屏东女中ê校长李志传先生。李先生是一位音乐家，tī庄永明ê「台湾纪事」第830页有介绍李先生，讲伊是「台湾新音乐」ê第二代音乐家，kap林进生、陈招治、陈泗治、吕泉生等人，拢是tī教育岗位推广音乐教育真有成就ê音乐家，tī台湾ê新音乐史有占一席ê地位。李先生bat组织过台北市ê｢教师交响乐团」，mā bat领导「台北市立交响乐团」，伊有作真chē曲，上出名ê一首是蔡培火作词ê｢咱台湾」。阿母a真爱唱这条歌，人若请伊唱，伊tō真欢喜ná唱，ná拍pho̍k á，手koh ná比，真古锥。

阿母a有四男六女，有ê是医生，有ê过去是老师，有ê食头路，拢真有成就。In分散tòa tī台湾、日本、美国kap加拿大，大家拢真有孝。阿母a tiāⁿ tiāⁿ会kā人讲：「我ê gín-á拢对我真好。阮大kiáⁿ ta̍k礼拜拢会tùi日本khà电话来kap我讲话。」看会出伊是真满足，真幸福。若是有人kā伊讲：「阿母a，你真福气，真好命。」，伊tō真欢喜讲：「感谢上帝。」

因为有坚强ê信仰，阿母a真乐观，伊讲：「万事拢交托主。」，所以无烦无恼，日子过了真快乐。伊每一日ê khang-khòe tō是读圣经，唱圣诗。每一页圣经读了后，伊tō会用笔giauh一leh做记号，表示读过 。仝一页ê圣经已经hō͘伊giauh过 6、7摆ah。阿母a对台湾ê情形mā非常关心，伊ta̍k日拢会看电视新闻，注意时事。过去伊mā tiāⁿ tiāⁿ读「台湾公论报」kap「自立周报」，了解台湾ê代志。

「台文通讯」是阿母a每个月真期待爱beh读ê刊物。有时á伊若khah慢接着，伊会按呢问：「这期ê台文通讯是tang时会出来？」。伊因为年岁chē,目睭雾，所以拢ài用hàm镜，一字一字un-un á读。阿母a也时常捐款hō͘｢台文通讯」，伊应该是「台文通讯」年纪上大ê读者kap共同发行人。伊讲：「咱m̄ thang bē记得咱ê母语。做一个台湾人bē晓讲台湾话，敢m̄是真làu-khùi?」。

阿母a对台文ê关心kap支持，实在hō͘人真感动，伊是咱大家ê好模样。Tī chia beh特别祝伊身体健康，食百二！