《台文通讯精选》

 | | | 转寄

两个语言，一间教会

作者 Graham Dickie 牧师 原作 南荣译 2007.08.19

亲像哈拿(Hanna)kap撒母耳(Samuel)第一次来到示罗(Shiloh)教会敬拜，阮相信上帝当teh tī这间细细ê教会创造一个奇迹。这间教会是tī Vancouver(温哥华)市郊，New Westminster市ê Sapperton社区内。

差不多五年前，两个无仝ê文化(加拿大ê台湾移民kap在地ê加拿大人)做伙聚集。In ê做伙，一个原因是互相ê需要，另外一个原因是奇迹。Che是奇迹，因为我m̄知影是按怎发生ê。

阮ê教会(差不多有70个家庭)目前用两个语言来做主日崇拜、教育、行政、关怀kap联谊ê事工。这群小数人所teh做ê，对我来讲亲像是第一个圣灵降临节ê经验。因为in每一个人拢用in家己ê语言来了解福音ê道理。

Hō͘每一个人会tàng选择家己ê语言是非常重要。Tī Shiloh联合教会，新来ê人tī礼拜早来教堂ê时，in会tàng选家己ê语言做礼拜；也会使tī礼拜中学习英语。Tī这方面，特别是对青年人，有奇妙ê效果发生。

阮ê礼拜是用两个语言进行，tī读圣经、儿童信息kap讲道ê时，同时kā英文翻译做台湾话。有两位90几岁ê老阿妈，一位ê第一语言是台湾话，另外一位ê第一语言是英语，虽然言语bē通，m̄-koh常常hō͘人看着in手牵手，互相关怀kap交陪。

阮hit阵活泼ê青少年，带领教会ê人唱圣诗，in唱ê曲真阔，tùi Bach到Natalie Sleeth ê圣诗，到hō͘人tī脑海内定定唱ê khah早真súi ê台湾调。最近圣歌队ê指挥为着beh完成伊ê医学院ê学业来离开，另外一位接落来做指挥ê，也有仝款真好ê表现。圣歌队ê 22位队员中间，至少有一半以上是青年人。In常常会用小提琴、flutes、oboes抑是其他ê乐器来伴奏。

教会ê主日学mā加真有活气，由青、少年负责协调kap教学ê工作。青少年每礼拜五暗拢会tī教会集会。突现出台湾人社区真心适ê一面。In ê家庭tī做礼拜kap交谊ê时拢讲台湾话，m̄-koh青少年家己做伙ê时，常常讲ê是北京话；he是中国ê官方语言，也是tī Vancouver ê华人社区通用ê语言。

Chia ê tī Shiloh联合教会ê新移民，虽然决心beh tī加拿大ê主流社会khiā起，in mā想beh继续保留家己ê文化。In kap in ê故乡犹保持密切ê联系。In ê故乡台湾目前当teh经历政治上ê变化，也常常受着中国军事ê威胁。旧年台湾发生大地动，Shiloh教会ê新旧会友同齐ê募款超过3000 kho͘加币，通过联合教会ê救济事工送去台湾。

虽然阮教会是属加拿大联合教会(United Church of Canada)，m̄-koh阮kap台湾ê长老教会kap伊ê议长mā拢有联系。

Kap主日崇拜仝款，联谊交陪ê时间mā是文化ê综合。每一摆礼拜soah，教会ê人会sóa去一间khah细ê房间，tī hia有泡ê茶心茶，mā有英国式ê茶kap咖啡。常常tī Chiok-kho͘-leh-to͘h鸡卵糕ê边a，会khǹg 几盘sushi。旧ê kap新ê lām lām做伙，两个无仝ê文化ê人慢慢享受tùi无仝ê厨房做出无仝ê点心。

当然beh做到按呢是真无简单，需要真大ê互相吞忍，m̄-koh我感觉阮ê挣 扎是真有创作性，mā真忠实阮ê目标。特别是tī这个多元文化ê世界，这款ê聚集做伙是真重要ê。

我定定teh奇怪，che是按怎达成ê?敢会是另外一种无仝ê语言(钉根tī基督，一种对全人类ê相疼kap尊重ê文化)ê出现？我真心希望是按呢。

(本文「Two languages，one congregation」原刊tī 2000年4月份ê加拿大联合教会会刊「The Observer」。作者是Shiloh联合教会ê牧师。)