《台文通讯精选》

 | | | 转寄

一间阿拉伯ê店

作者 清风 2007.08.12

Tī我khiā家ê巷á口，有一间杂货店，是一kóa中东ê人teh经营。起头，in接手ê时，是向白人买ê，所卖ê物件，kap一般超级市场所卖ê，并无啥物差别，牛奶、pháng、汽水、日用急须品，生理真冷淡。后来，看in开始24小时分三班营业，而且开始排列一kóa中东ê杂货，米粮、菜蔬。我心内真正佩服in ê勇气kap魄力，m̄-koh，心肝底常常为着in ê生理着急。这附近，真罕得看着中东ê顾客，in是beh卖hō͘啥人leh？我真罕得去买，kan-na有tang时欠糖、欠pháng、抑是牛奶才会去。M̄-koh，每遍去拢有看in teh改变，虽然无啥生理，顾店ê人拢是笑嘻嘻，细腻替人客包装，态度也真诚恳，hō͘你感觉伊m̄是kan-taⁿ卖你物件nā-tiāⁿ，也关心伊ê物件品质。

上hō͘人oh理解ê，不管in生理按怎冷淡，架á顶ê货色永远齐全充足，店内店外ê环境也无马虎，甚至常常有新意。Tī hit个一kóa少年人爱乱乱喷汽水、囤粪埽ê所在，in kā围起来，起一个小小ê花园，优雅美丽，hit堆hō͘人头痛ê粪埽，就按呢渐渐消失。Koh几个月了后，店里ê货色也渐渐进入中东化，tī chia我thang看着直径15寸ê圆圆薄饼kap ham我ê手骨平长ê长饼；各款各样ê米；无仝色ê冰糖；五花十色ê豆类，奇形怪状ê干果；橱á内底也排tīⁿ tīⁿ典型ê中东甜点；生理也愈来愈ka-ia̍h，每一摆koh欠啥物物件去买ê时，拢着ài排队lah 。店员虽然有chhiàⁿ khah chē，总是服务ê态度拢真好。三月日前，连对面ê店也hō͘ in买落来，beh扩充khah大ah。

Tī替in欢喜ê当时，这个小小生理ê发展故事，hō͘我一个启示，m̄知是啥物力量hō͘ in tī 起初hiah-nih冷淡ê生理中，犹原会tàng看着美丽ê远景？是啥物信念hō͘ in，tī这个过去完全无属tī in ê文化ê社区，会tàng预见着现在ê发展，无计较一切ê拍拚，最后创出一个属in ê天地。

我真pháiⁿ用短短ê话句来形容这种ê精神。不过，我相信tī in ê心肝底，确实有一个ǹg望，就是因为这个ǹg望，in tùi完全m̄-bat有过ê生活历炼中，照这个ǹg望，勤勤劳劳去做，m̄惊失败，也m̄惊无伴。In ê心内有一pha灯，teh照头前ê路，就按呢，向hit个目标一直前进。

前日，当我看着in欢欢喜喜将in囤kah规店ê货，搬去对面ê新店，koh beh设立第二间店ê时，我心内非常感动。因为我知，这间店所经营ê m̄是kan-taⁿ中东稀罕ê杂货nā-tiāⁿ，in所经营ê是人类最宝贵ê资产，就是tùi无生有ê信念。