《台文通讯精选》

 | | | 转寄

春天ê花

作者 萧莉莉 2007.07.28

我tú tùi台湾过来，台湾chit-má是春天。阳明山规山ê花开kah足súi，我ê妈妈选tī这个日子来离开，相信是上帝替伊选ê日子，妈妈真亲像春天。妈妈ê笑声是春天ê溪水，chiah-ni̍h开朗、乐观，hō͘人听了真欢喜。妈妈ê歌声是春天ê鸟á，规日teh唱，唱无停，唱kah真快乐。妈妈ê感情chiah-ni̍h丰富，不管是对人抑是做代志，拢是用伊全心全意ê感情，亲像春天ê花蕊，用in全部ê性命teh开花。

人讲一个艺术家一定ài有丰富ê感情。妈妈就是一个艺术家，伊tùi台北第三高女毕业了后，就去日本东京体育音乐大学读册。伊tī大学四年内，非常拍拚。伊tùi m̄-bat摸过琴，学到会晓弹世界名曲。妈妈真爱跳舞，大姨mā讲，妈妈ê国际标准舞有职业ê水准。伊上大ê天份是编舞剧。有时为着编舞剧，规日听音乐，灵感一来，半暝peh起来，比看māi赶紧写落来。妈妈编ê舞剧，真现代，有创意，有艺术ê眼光。

伊大学毕业了后，去京都ê女子学院做讲师，后来转来台湾，tī长荣女中教册。Hit时长荣女中英国籍ê女校长，真欣赏妈妈，推荐伊去英国进修，因为阿妈保守反对才去无成。Tī长荣女中教册hit段日子，妈妈有真chē好朋友。伊kap后来长荣中学ê校长刘子安先生，台大ê张采湘教授，koh一kóa当时ê少年人常常做伙peh山，in去peh几nā摆玉山。Hit时ê玉山犹无路，in tō家己开路、peh山、hip相。转来了后、家己设暗房，洗相片。In ê生活充满文化kap艺术。

对一个爱艺术ê人，灶脚ê代志tō真食力。妈妈bat对我讲，伊做一个家庭主妇实在真无彩。爸爸对妈妈ê疼，妈妈mā真清楚。伊做一个主妇比别人koh khah拍拚。妈妈生阮ê时，因为年岁khah大，阮三个gín-á体质拢无好，妈妈chhōa阮比别人加倍辛苦，但是伊教阮真chē道理。细汉ê时爸爸不时出差，无tī厝，伊kā阮讲，恁第一ài感谢ê是上帝，第二ài感谢是爸爸ê辛苦。因为按呢，结婚了后，我会晓体贴尊重我ê翁婿。妈妈kap我ê阿婶、阿姑，感情拢真好，亲像亲姊妹。细汉阮认为是当然，大汉才知影beh做到chia真无简单。

妈妈是有福气ê人，伊上大ê福气就是认bat上帝，也因为按呢，伊bē欣羡这个世界ê奢花。伊食bái，穿衫过日子拢真简单。Tī新竹ê时，爸爸有参加扶轮社。Hit时伊kap许金德先生、严家淦先生，koh一kóa有名人士ê夫人，大家拢有斗阵。Hit时阵新竹女中ê女校长曹金英女士bat讲，tī chiah chē夫人内底m̄-bat挂珠宝ê，只有伊kap萧局长夫人。妈妈无欣羡这个世界ê奢花，tī基督ê路，伊行了真欢喜。

妈妈第二大ê福气是认bat咱多伦多教会ê兄弟姊妹。这段日子，不管透风落雪，不管路远，恁拢不时去探访伊，饲伊食饭，kā伊安慰，m̄惊麻烦。恁做tī我妈妈身躯顶ê，上帝拢会记念恁。妈妈带着大家ê疼去上帝ê厝，伊会真平安。

我tī chia介绍我ê妈妈，我感觉我是一个真幸福ê gín-á。｡