《台文通讯精选》

 | | | 转寄

走chhōe台湾kap我ê主体性

作者 庄佩芬 2007.04.29

我是台湾人，我讲Hō-ló台语，我写母语文。

真chē人问我tī美国主修啥？我定定会kā问ê人讲滚笑，我tī美国主修台湾学。我会按呢讲是因为来美国二冬lah，我开始重新熟sāi我以前大汉ê所在--台湾。虽然我无读过『认识台湾』ê教科书，m̄-kú自从 1995 年我去DC chhōe一个台湾同乡ê阿伯，hō͘阿伯掠去参加针对中国向台湾试射飞弹ê示威活动，我就开始修我台湾学ê学分ah。

阿伯是30年前来美国ê台湾留学生，hit时台湾ê政治犹koh足禁闭ê。Hit时ê留学生若是chhìn-chhái去讲着有关台湾ê议题，就真有可能入去乌名单内底。95年我第一摆kap阿伯见面， 阿伯讲话拢是用Hō-ló台语，hō͘我感觉真亲切。台语是我ê母语，虽然我讲bē辗转。『国语』虽然m̄是我ê母语，m̄-kú自入学了就一直teh讲ah，后来变做我主要ê语言。阿伯ê台语无掺kah半句华语，而且伊若是讲着『大陆』ê时，伊拢讲『中国』；讲着『国语』ê时，tō讲『北京话』。Chia ê现象hō͘我感觉真奇怪，我无法度理解阿伯是台湾ê高才生，讲话无掺华语，而且伊ê语词『中国』kap『北京话』ham 我所熟sāi ê『大陆』kap『国语』无相仝。Chia ê疑问到后来阿伯the̍h册hō͘我看，koh chhōa我去kā中国示威了，我才完全了解。

台湾是经过历代殖民者thún踏ê所在，我所知影ê历史是现此时ê殖民者所编纂出来ê｡Chia ê改造ê历史m̄-tāⁿ是tī教科书里，mā经过媒体无所不在teh 重复。了解家己是台湾人，就亲像kā我规个人反过来，我开始想beh训练我讲bē辗转ê台语，追求有关台湾各方面ê新知识。我参与学校ê台湾同学会，参加有关台湾人团体ê活动。其中，我tī 96年去加州参加世界台语文化营hō͘我真大ê刺激。每一个讲者拢用滑liu ê台语发表无仝主题ê论文。论文用台语发表，我从来to m̄-bat想过。Tī这个营队里，有真chē hō͘我刺激ê代志。亲像讲：有一个日本记者用台语演讲台语文ê重要性。一个日本人竟然kā我ê母语讲kap写kah chiah-ni̍h好，hō͘我感觉真pháiⁿ势。Ùi hit chām开始，我意识着kan-taⁿ会晓讲母语已经是无够ah。

另外，若beh tī政治上ham文化上kap中国做区分，若无chhōe出台湾人家己ê主体性，恐惊á真pháiⁿ做会到。台湾人ê主体性是啥，我也m̄知。不而过，我知影台湾本底是有真chē讲无仝母语ê族群所组成ê社会。母语文学本来是teh 记载人类上深ê感情ê文学。伊tī台湾是有时代意义ê,除了纪录台湾人每族群ê感情，koh会使hō͘台湾人ê语言保存落来，甚至是kap中国tī文化上区分上好ê旗á。台湾文学长久以来一直真pháiⁿ脱离中国文学ê阴影。台湾人若是建立独立ê母语文学，相信台湾文学beh脱离中国文学成做历史ê路应该m̄是真远a。

出国这几年，我讲我主修台湾学应该是bē siūⁿ超过。因为台湾ê特殊国情、国际地位hō͘我时时拢想beh掠机会kā外国人讲我是台湾人kap咱台湾ê状况。譬如讲，tī阮系里，所有ê教授拢知影台湾kap中国无仝。有一摆，阮一个查某教授叫我写汉字ê『危机』hō͘看，我讲beh写汉字hō͘看除非伊了解我m̄是中国人。阮系里ê教授对台湾人认同真有兴趣。有一摆，有一个查甫教授kā一个新来ê台湾学生问第一个问题：你是台湾人抑是中国人。上课中，我mā不时会发言有关台湾ê情形。虽然我是读家庭婚姻治疗科ê，m̄-kú理论相通ê所在真chē。上基本ê tio̍h是转来看家己是啥，为啥teh 活。我ê美国同学真chē人拢真会tàng接受我ê讲法，而且祝咱台湾以后会tàng独立成功。这摆总统大选了，我按台湾转来，我几个美国同学kap另外一个查甫教授kā我恭喜我支持ê党所推派ê总统候选人当选。我对in hō͘我ê祝福感觉真趣味，因为我事先无kā in讲我支持ê候选人。阮教授讲伊ioh tio̍h知a，hō͘我感觉真欢喜。

美国虽然有chē chē ê种族问题，m̄-kú伊也是一个有民主基础ê国家。一般来讲，美国人会尊重你为家己争取权利。留学美国对我来讲m̄-tāⁿ是the̍h学位niā-niā。伊特殊ê时空背景hō͘我重新体会我出国进前ê台湾经验。而且tī这个时空背景，mā hō͘我 有机会kap美国朋友交流咱ê台湾经验。心理学内底有teh讲，转来了解家己是『siáng』，beh按怎用家己这个『siáng』kap别人斗阵而且无失去家己。清楚ê主体性tī美国社会是真重要ê。若是无这个主体性真容易就hō͘主流社会食去，m̄-tāⁿ失去自我koh hō͘人看bē起。台湾国ê主体性是啥，tio̍h-ài靠你kap我共同来走chhōe。目前我kap一kóa人仝款、按咱本底所有ê chhōe起：讲母语kap写母语文。