《台文通讯精选》

 | | | 转寄

啊若无欲按那？

作者 陈柏寿 2007.04.22

~ Ala Moana ê世界~

来去Hawaii，人人拢知有一个最有名ê Shopping Center叫作Ala Moana，咱台湾人嫌pháiⁿ记，拢kā伊念作「啊若无欲按那！」

我调来Hawaii作人ê牧师已经有年半lah。Tú来ê时，看着四界人拢kā咱请安：「Aloha!」 「Aloha!」；清凉ê海风，椰子叶á tī风里摇来摇去，亲像少女hula舞ê姿态；四季如春，无寒无热，早起起床mā m̄免惊去寒着，暗时上床mā m̄免烦恼盖被，一领aloha shirt会使年头穿到年尾，出门一双千拖á穿leh，五只脚指头á拢露显显，穿短裤来作礼拜ê人mā真chē，挂油食粿(领带)来教会ê人差不多是无 。寒着ê人才穿长袖(ńg)ê衫。Tī chia无地动，风台mā真少tī 这粒芋á岛(Oahu)上陆。

我这粒番薯á tòa入来芋á，tòa久真惊会变作芋á番薯。总讲一句，咱台湾gín-á移民来这粒芋á ê历史不过是三十外冬，人口总共差不多六千，包括无身分偷走船ê人在内。大部分拢tòa tī这粒芋á顶。中国人ê新移民日日增加，紧十慢会超过台湾人ê人口。日本人移民大部份是一百三十外冬前明治时代就开始，大部份拢是对冲绳(Okinawa)来ê。日裔人口占全州总人口ê 40%以上。有人讲东京都有23区，Hawaii是属东京都第24区，因为日本人真爱来chia thit-thô。日本ê青年男女beh结婚，无论啥物教，拢会来Hawaii ê基督教会十字架下面，问in有信耶稣无，拢会讲「有！」。In踏出教会后犹会记得这句话iah bē，咱m̄知。

日本文化影响Hawaii真大，chia ê厝拢是日本式ê khah chē，地方ê语言mā掺真chē日语。中国移民虽然有二百外冬ê历史，但是今á日Hawaii ê政治、文化、教育、大众传播、企业经营各方面，日本人拢khah占优先。Tòa tī chia ê白人khah会认同本地文化，in ê人口也无超过总人口ê半数，所以种族对立ê情形比美国东部khah少。中国来ê移民大部份有中国人ê主观性：「夏威夷」也是in原来轻视在地人ê字眼；in叫Honolulu作「檀香山」，全世界ê人无人知in是teh讲啥物所在。In对台湾人ê独立运动也无啥物同情。多年以来，国民党tī chia ê势头真大，用中华航空公司thàn ê私奇钱，tī市中心买一大区叫作「中华文化中心」。但是in tī chia做代志，差不多是tī牛椆内相tak ê步数真gâu;若是对外口人或是外国人，是无半步。

台湾有钱人来chia退休ê人bē少，最近因为台湾地动，koh台湾ê生态环境不良，tùi台湾移民来chia ê人数有增加ê倾向。台湾人社会中，高等ê资产阶级人数无chē，退休养老ê人以外就是医生人。Tī chia有差不多二、三十位台湾医生，其中有三、四位基督徒医生tī台湾教会内真热心；其他医生若m̄是属慈济就是kap教会无关系。中产阶级ê部分是教授、工程师、农场主人(以青菜菜农为主，供应全岛需要)、小贸易商等。人数mā无chē｡绝大部分生活tī chia ê台湾人差不多拢属tī劳动阶级、小工阶级、ABC Store(杂货店)店员、旅社服务生、计程车司机，以及领社会救济金生活ê人。 这种完全资本主义化、消费主义化、观光主义化ê世界，真正是一个「啊若无欲按那！」ê世界。资本家主宰一切，所有最高大楼差不多拢是观光旅馆。Tī chia无啥物工业，无大ê商业，无高科技，甚至连农业也无法度生存。有限ê农地只有生产资本家指定ê经济作物，供应美国大陆；地方需要ê民生作物，完全无teh照顾 。Hawaii ê天气是出产根蕉及檨（soāiⁿ）á上好ê所在，但是去市á买着ê真 chē是南美产ê根蕉kap檨á。In ê经济结构我想一定有问题。Chia ê生活费用kap美国任何都市比起来，最少贵三分之一以上。Chia ê土地kap不动产可能是美国第一贵ê所在。对人口就业ê分析来看，咱就知绝大部分ê人是生活tī散乡边缘，(全国平均国民所得是属最低ê一州之一)。人人拢只好用笑面，用Aloha，用最低ê工资，来维持最有限ê生活。人人无其他ê选择，也无发展ê空间。真正是「啊若无欲按那！」

「牧师啊！我早起去Sandwich工场切菜，八点切到下晡二点，khiā六点钟，一点钟thàn 5kho͘ 75sián (US$5.75/hour)；下晡二点半到暗时十点去顾店卖gín-á衫，bē使坐，koh khiā 七点钟，一点钟六kho͘ ，扣税金剩5.50。一日khiā 十三点钟，我giōng giōng beh晕去lah！为着顾家饲kiáⁿ....。」我听着阿雪姊ê艰难，心内真艰苦。

你若去到Ala Moana，全世界第一流ê名牌，所有贵森森ê高级品拢tī chia，你若有钱，全世界啥物好孔ê拢tī chia！海风温温á吹，亲像少女teh跳Hula !

你若有一日真正beh来这个「啊若无欲按那」ê所在，请你tio̍h一定chhōe来这间岛上唯一ê台湾基督长老教会heh！咱thang作伙来唱hit条「啊若无欲按那？！」