《台文通讯精选》

 | | | 转寄

巢 (Siū)

作者 阿雅 2007.04.15

Chēng我ê阿爸第三次中风了后，m̄知是病情ê关系，抑是心情郁卒，变kah无爱讲话。大部份拢是用摇头kap tìm头来表示beh kap m̄，久久á才会出声讲一句话。也因为一摆koh一摆ê中风，致到「失禁」，行动koh khah无方便。我teh想，m̄知是m̄是按呢hō͘阿爸心情无好，才无爱讲话leh？请教医生也无有真正确ê答案。

有时我tiām-tiām看着伊teh食饭，食kah真好势，实在看bē出伊是一个「失禁」koh m̄讲话ê病人，我深深感受着人ê有限。过去爱讲话，对人亲切，好脾气ê阿爸，变成今á日ê状况，hō͘我感觉真心酸。（兄弟中间有人认为阿爸已经无意识ah）

有一日，我khà电话转去ê时，大兄kā我讲，已经kā阿爸送去安养院ah。当时我听着，心艰苦流目屎，却m̄敢hō͘阿兄知。因为我身处外地，tī经济上也无法度斗saⁿ-kāng，所以也无发言ê余地，实在是真m̄甘阿爸就按呢hông送去安养院，一方面koh ài感谢大兄、大嫂in辛苦ê付出kap照顾。

每一摆若tī食饭ê时，就想着阿爸家己tiām-tiām teh食饭ê情景，我就流目屎，我知影阿爸绝对无爱hō͘人送去安养院。心内只有祈祷上帝hō͘阿爸会tàng表达伊ê意思。时间经过一个月，阿爸tī安养院发生感冒bē食ê情形，二工ê时间就送去病院检查，医生讲已经有营养不良ê情形。Tī病院疗养一段时间，有一工，大嫂问阿爸，明á chài beh出院ah，koh chhōa你去山顶好无？（安养院tī阳明山顶）阿爸就开始摇头koh流目屎，大嫂问讲：「你ná m̄去leh？」阿爸就出声讲：「我无巢（siū ）！」虽bóng是短短ê三字，却表达对家己ê「巢」pa̍k bē开ê感情。感谢上帝，阿爸m̄是无意识，伊犹原真清楚，伊只是无爱讲话。佳哉伊有tī这个要紧ê时刻表达出来，若无，就koh hō͘人送去「山顶 」ah。

不管tī北美抑是今á日ê台湾社会，拢有kā老人送去安养院ê趋势。若是对一个已经无意识或是痴呆、昏迷ê老人来讲，he对in就无啥物心理上ê影响。但是，对一个犹有意识ê老人，实在对in ê病情无好ê帮助。

「巢」对一只动物来讲，伊代表着安全kap亲情ê所在，免讲是万物之灵ê人类，对感情ê倚靠是khah嬴过其他ê。Tī人生ê上尾段ê时间，kā伊khǹg tī一个完全生份 ê所在，无亲人tī边a，所看着ê拢是病人，一点á活气to无，按呢敢bē郁卒，甚至失去求生ê意志leh！若是我，我m̄甘hō͘我ê亲人tī人生ê路尾站，来活tī这种ê情境。

续后，我ê计画是家己ài俭一kóa钱，交待序细，后摆我若食老犹有意识（虽然行动不便），ài 请一个人陪我，m̄-thang kā我送去安养院，至少是tī家己ê「巢」，死了mā khah自在。

可能是我ê想法khah古板，请大家m̄-thang见怪。