《台文通讯精选》

 | | | 转寄

受祝福ê人生

作者 翠华口讲 秀满整理 2007.04.08

我ê kiáⁿ逸民，出世tī 1976年11月24日。伊出世ê时kap一般ê gín-á无啥物无仝款，目睭大大蕊，真古锥，七坐八爬，伊mā拢照步来。因为我ài上班，就kā伊交hō͘我ê老母照顾。阿妈讲这个gín-á真乖，炮á声砰砰叫，伊mā真好困，拢bē精神。逸民一岁ê时，虽然伊会tàng发真简单ê音，无定着是做老母ê顶真，我感觉我ê gín-á亲像bē晓讲话。一日我chhōa伊去长庚病院检查，医生用真肯定ê口气kā我讲，你ê gín-á臭耳。就按呢，我抱我ê逸民离开病院，无一个医生、护士、抑是社工人员kā我安慰、教我以后ê路ài按怎行，ài如何来教育我ê gín-á。

逸民细汉ê时，身体真弱，不时破病。两岁ê时有一摆伊规身躯软kô kô，kā我mo͘h tiâu-tiâu。我chhōa伊去台大、长庚做真chē检查，拢查无出原因。真无办法，有一日听讲汐止有一间医生馆开幕，患者无真chē，医生比较khah有耐心听我讲逸民ê病情。伊听了开药á hō͘我，叫我转去观察gín-á食药了后ê反应，随时kap伊连络，就按呢我kap hit个医生通一日ê电话。到下晡5点，医生kā我讲：「我真确定你ê gín-á是糖尿病，你ài马上chhōa伊去台大病院，我已经连络我ê同事kā伊检验。」

隔转日，早起九点，我接着台大病院khà来ê电话，通知逸民马上入院。入院了后，马上kā注射「胰岛素」，真想bē到，一个月来软kô kô ê gín-á，注射了后，hit日下晡就会tàng落来行路。病院ê医生kā来探访ê亲成讲：「若是koh拖一日，这个gín-á tō无命。」

因为是先天性糖尿病，逸民需要继续注射胰岛素来控制病情，剂量是台大病院开hō͘我。伊虽然大部份ê时间好好，每三、四个月tō休克一摆。后来，伊tī美国芝加哥ê儿童病院做检查ê时，才发现伊所注ê剂量是所需要ê四倍chē。经过调整，伊tō m̄ bat koh有休克、晕倒ê毛病，总是che是以后ê代志。

臭耳、bē晓讲话、糖尿病、时常休克、晕去，但是逸民真乖，阮对伊ê疼爱仝款无减少。有一个拜六，伊有一蕊目睭红红，我随chhōa伊去hō͘医生看，医生讲：「Hō͘ lah-sap 手摸着，无要紧，真紧tō好。」但是我bē放心，我kap我ê头家规暝无困，看这个gín-á因为目睭疼，家己用手一直拍头，我ê头家也m̄甘，提绵á ùn黄药水kā sip，至少凉凉，hō͘伊khah快活。隔转日礼拜，医生馆无开，拜一透早我tō赶紧chhōa逸民去hō͘医生看，想bē到，医生讲：「恁真假gâu，你ê gín-á已经青瞑a！」伊无爱koh讲，就kā阮赶出来。我无相信这个事实，直接坐车去台北上出名ê林眼科。林医师仝款讲gín-á ê目睭已经青瞑。我m̄相信koh再chhōa逸民去台大病院，koh一摆确定逸民ê目睭青瞑，也查出伊另外一蕊有严重ê白内障需要开刀。对青瞑ê原因in无确定，但是ioh内面生bái物件。后来开刀检查ê结果，发现目睭内面并无bái物件，只是急性ê青光眼，无紧急处理转成ê青瞑。

一路行来，我开始对台湾ê医生、医疗ê品质kap制度失望。台大病院本来有排手术白内障ê日期，经过考虑，我决定kā取消。另外一个失望是台湾ê特殊教育。虽然我ê gín-á臭耳、哑口、有糖尿病、一蕊目睭koh青瞑，我mā希望伊会tàng受教育。我知影海伦凯勒ê故事，我mā相信我ê gín-á真聪明，会tàng学习。我四界探听哑口学校、kap一kóa教手语ê场所， 只要有人报，koh khah远我tō chhōa逸民去。但是所有ê学校拢kā阮拒绝。In讲：「拍bē赢人，beh按怎来读册？」「学校是beh收有成绩会进步ê gín-á，你ê gín-á身体to顾bē好，阮bē-tàng收。」这个时阵ê逸民真sán、真弱，也莫怪无一间学校愿意收，阮做父母ê看着真艰苦，真m̄甘。

1982年，逸民六岁，阮chhōa伊去日本，希望日本khah进步ê医学对伊有帮助。Tī东京市郊外ê一间专门病院，我停留二个月。医生做真chē检查kap研究，因为无十分把握，in m̄敢开刀，带着真失望ê心情，阮koh倒转来台湾。

Tī真m̄知影beh按怎ê时，有二个互相无熟sāi ê人kā阮介绍仝一位医生，伊就是宜兰真出名眼科医生陈五福ê kiáⁿ婿，林逸民医师。伊tī美国圣路易附近ê Woodriver Township Hospital服务。就按呢，阮chhōa逸民tī 1983年来到美国。

Tī Woodriver Township Hospital，林逸民医师kā逸民开刀，治好伊ê白内障。伊用冷冻治疗ê方法治好逸民久久以来ê目睭ê疼。大家知影美国ê医药费真贵，逸民住院二、三日，差不多需要5万kho͘美金，但是病院hō͘阮分期付款，一个月付100kho͘。手术了后，mā有真chē社工人员来访问我，问我ê需要kap讨论逸民受教育ê问题，in提供真chē特殊ê课程。我tī hia看着我ê gín-á ná来ná健康，有学习，有进步。日子过了真快乐，我就决定beh留落来，无爱koh转去台湾。

Tī Woodriver虽然治好逸民ê目睭，总是所在生份，既然有beh留落来，我决定beh搬去芝加哥，至少有朋友tòa hia。Tī芝加哥我前后tòa三年，虽然阮无移民ê身份，但是美国政府认为阮需要特殊ê医疗照顾，阮拢继续有提着移民局ê签证。Hit时阵因为有外汇管制，汇美金出国真困难，阮ê生活并无富裕。母á kiáⁿ租一间小小ê房间tòa，总是精神上得着真大ê安慰，无论是tī医疗，抑是tī教育，逸民拢得着真好ê照顾。

我ê头家因为做生理ê关系，常常tī北美洲走，mā熟sāi真chē外国朋友。有一日伊chhōa加拿大朋友来芝加哥，这位加拿大朋友看着逸民ê情形，伊kā阮建议：「 Tī世界各国对特殊教育kap医疗作了上好ê国家tō是加拿大，恁ài马上申请加拿大移民，我相信恁ê gín-á tī加拿大会tàng得着koh khah好ê照顾。恁若办会出来，这世人恁ê永远记tiâu我这个朋友。」伊走了，我kap我ê头家参详koh参详。一方面为着逸民，一方面也考虑tī美国阮无移民ê身分，总m̄是久长ê办法，tō决定透过这位加拿大朋友ê律师提出移民申请。逸民ê情形，阮并无瞒骗加拿大政府，律师送出去ê资料，厚厚一大tha̍h，包括逸民ê病历。以阮ê情形，真可能办bē出来。但是这个律师真gâu，尽力替阮争取，最后逸民提着加拿大政府ê“Minister special permission”。阮一家(除了逸民，阮犹有一个真健康ê查某kiáⁿ，减逸民一岁)，tī 1986年，全家来到加拿大ê多伦多。

Tī多伦多安顿落来，阮就kā逸民送去哑口学校。我家己mā重新出发，读英文，作生理。Ta̍k学期逸民tùi学校提转来ê成绩单拢是A，hō͘我一个错觉，若准伊有进步。有一日，伊写一句 sentence hō͘我，我惊一tiô，因为hit句根本bē通。我感觉这个教育bē使，一定ài有改变。我去拜访老师，mā去chhōe校长，心内想一定有koh khah好ê方法会tàng教我ê gín-á。学校kā我解说，哑口gín-á因为无办法了解抽象ê物件，进步kan-taⁿ会tàng到一个程度。但是我bē tàng接受学校ê解说，我想着海伦凯勒ê成功，是因为伊ê后壁有一位真好ê老师沙利文。我想我ê gín-á若准有这种一对一ê课程，伊ê进步会khah chē，因为时常去学校kap老师、校长争论，我变作一个无受欢迎ê家长。

无定是上帝ê chhōa路，有一日一个朋友kā我提起，有一个特别ê游泳池，专门hō͘哑口kap青瞑gín-á泅水。我 chit-má已经bē记得tī tó位，我mā kan-taⁿ去一摆。Tō是hit日，逸民teh泅水ê时，我坐tī边á等，我看着一个白人gín-á，伊挂耳机，mā有深度ê近视，但是有一个人kā tòe着，用手语kap伊沟通。我看着真奇怪，tō去问管理员，伊讲，che是“W. Ross, Mcdonald School”哑口kap青瞑ê课程(Deaf blind Program)。伊hō͘我一张名单。

转来了后，我就照名单，一个一个khà电话。每人拢真好礼，kā我说明课程，也约时间来阮tau拜访。伊mā同意我ê看法，逸民需要一对一ê课程。最后校长亲身来访问，kā逸民测验。伊mā同意我ê看法，也提供一对一ê课程。就按呢逸民搬去Brandford，tòa tī学校宿舍，接受新课程。

以后逸民ê进步ká-ná teh飞leh，伊ê聪明kap潜力tī这间学校充分发挥出来。伊会晓写文章kap gâu画图，mā会tàng作手艺。伊有一台特殊ê机器叫TTY (Telephone Answering Machine)，时常用来khà电话kap阮连络。

今年热天教会ê夏令会，tī Brandford附近ê Five oak lake举行，芝加哥来ê许明昭牧师讲：「认bat咱家己受祝福ê人生」。牧师讲了，chē chē人问问题，翠华姐khiā起来讲伊受祝福ê人生。虽然伊ê gín-á 无完全，但是因为这个gín-á，伊学习真chē，全家koh khah相疼。也因为这个gín-á伊tùi台湾、美国来到加拿大chiah-ni̍h súi、福利chiah-ni̍h好ê国家。有人不时teh怨叹加拿大税金真重，但是咱交税，交了真有价值，政府做真chē代志，有chē chē ê福利，tī咱四周围。

Che是我头一摆熟sāi翠华姊，也是头一摆听着伊ê故事。Hit日下晡，教会青少年tī营地ê草á埔踢脚球，逸民kap伊ê白人朋友mā来参加。我看着逸民走真紧，跳真koân，脚手真好。若准无人讲，我绝对bē去注意逸民是一个特殊ê青年。

天chiah-ni̍h蓝，草chiah-ni̍h青。听着一个感动ê故事，抱着咱受祝福ê人生，阮驶车离开Five Oak Lake。