《台文通讯精选》

 | | | 转寄

江文也ê人生交响曲

作者 多城客 2007.04.01

最近重读「江文也的生平与作品」，心内koh一遍感慨万千，真久真久无法度平静落来。

江文也，这位台湾人ê萧邦，对大部份ê台湾人，甚至台湾音乐界少年一辈来讲，可能是一个真生疏，m̄-bat听过ê名。

江文也是台北县淡水人，1910年出世。13岁ê时去日本读册，中学毕业了，进入工业学校学习电气工程。因为对音乐有真大ê兴趣，江文也利用课外ê时间去东京上野音乐学校选修声乐，唱ê是男中音。工业学校毕业了后，正式投入音乐，tī日本乐坛大师山田耕作ê门下，学习作曲，tī hia奠立伊以后出名国际作曲界ê基础。

江文也正式开始音乐生活ê头两年，tō得着两遍ê日本全国音乐比赛ê声乐奖。1934年到1937年四年中间，伊连续四摆得着音乐比赛ê作曲奖。

1936年，江文也以管弦乐「台湾舞曲」，参加柏林奥运文艺比赛，得着特别奖，hō͘伊晋级变做国际级ê作曲家。两年后，伊ê钢琴曲「断章小品」koh得着威尼斯第四届国际音乐节作曲奖。Tùi hit阵开始，伊ê名声愈来愈透，作品hō͘人介绍去巴黎、日内瓦、纽约各地。这时江文也犹未三十岁。

Hit时阵，江文也ham半世纪前大部份ê台湾知识份子仝款，认为中国ê北京是台湾文化kap东方文明ê原乡。伊tī 1938年离开日本籍ê贵族夫人，去北京师范大学音乐系担任作曲教授，走chhōe伊文化ê回归，从事中国古早民俗音乐ê研究。Che是伊一生生命kap作曲ê转换点。1938年到1948年，是伊去中国了ê黄金时代，伊ê创作生活非常丰富，大型ê民族乐派作品一直继续出炉。这个期间ê作品有管弦乐曲「孔庙大成乐章」、「第一交响曲」、「第二交响曲-北京」；歌舞剧「大地之歌」、「香妃传」；宗教音乐「圣咏作曲集」、「弥撒曲」；民俗音乐「中国民歌一百曲集」kap 根据唐诗、宋词谱曲ê作品一百五十首…等等。

「祖国」五千年文化优良ê传统tō是「政治chhōa头，外行ê人领导内行ê」。江文也这位一生无插政治ê音乐工作者，想bē到tī「祖国」ê政治大风涌内底，会变kah一生残枝败叶。

1950年代，中国ê反右运动中，江文也因为出身是台湾人，去过日本留学，参加过国际性ê比赛，koh是天主教徒，所以hō͘人挂「老牌汉奸，右派份子」ê罪名。Tùi hit阵开始，伊kap外面ê关系完全切断，ham日本ê音乐界kap台湾ê亲chiâⁿ朋友失去连络，伊ê名tī 中国ê音乐界完全消失，作品受禁，bē-tàng 出版也bē-tàng演出。

「文化大革命」ê期间，伊不时受着批抨，受着斗争，伊ê身体、心灵受着真大ê创伤。大部份ê手稿tī这个期间流失无去。伊ê gín-á自细汉开始taⁿ知影in老pē是音乐家，m̄-koh拢m̄-bat听过伊ê音乐。五个gín-á除了上大汉ê以外，拢受排斥tī大学门外。伊ê中国籍夫人吴韵真女士，无法度tio̍h-ài拍卖收藏ê册、唱片、音响、钢琴、乐谱等等来维持生活。无钢琴ê江文也，kā食饭桌á当做钢琴，十个指头仔tiàm桌顶弹，真chē曲是按呢写出来ê。文化大革命ê尾期，五、六十岁ê江文也hō͘人送去河北定县ê农场劳动，tī农地挖土、担土，体力bē kham得，soah几摆中风，两摆吐血。文化革命结束了后，江文也受批准转去北京，m̄-koh身体已经拖磨kah非常虚弱，因为食药m̄ tio̍h，伊ê病愈来愈重。

这个期间ê江文也，开始对「祖国」ê一切感觉非常失望，渐渐体会着家己ê原乡是台湾，也引起怀念故乡ê情思。伊作曲ê风格tùi早期ê西洋乐风，到中期ê民族音乐，koh再转变做乡土音乐。伊全心研究整理台湾ê民间音乐，所写ê思乡曲有管乐五重奏「幸福的童年」、钢琴曲「乡土节令诗曲」、管弦乐「白鹭的幻想」…..等等。江文也tī 67岁ê时，开始创作伊怀乡ê第五首交响曲「阿里山的歌声」，m̄-koh犹未完成以前tō脑充血，真可惜，这首曲变做伊ˆ「未完成交响曲」。

1981年tòa tī 美国ê画家谢里法，tī台湾报纸发表一篇「故土的呼唤 - 记卧病北平的台湾乡土音乐家江文也」ê文章，hō͘这位台湾人有史以来上优秀ê作曲家江文也，若亲像tâi tī断层内ê枯藤，koh再重新出土。伊ê音乐也重新复活，tī美国、香港、台湾各地演出。M̄-koh这阵江文也已经倒tī眠床，无法度讲话。

1983年「台美基金会」kā人文奖颁hō͘ 江文也。仝hit年，咱这代ê音乐大师tō tiām- tiām离开世间。

江文也是一位真有天份，多才多艺ê音乐作曲家。 Tī 西洋ê音乐史，m̄-bat有人亲像伊按呢，受着hiah-ni̍h残忍ê迫害。当年，伊若是无迷失tī寻根ê路途顶，踏出错误ê hit一步，相信伊ê成tō会koh khah大，伊ê音乐会koh流传khah阔。

江文也「祖国」ê梦到路尾是破灭ê。伊所承受ê是台湾人ê原罪，伊所tú着ê是台湾人共同命运ê缩影。咱若回想江文也ê一生，才koh倒转来看今á日台湾人ê「大陆热」ê时，敢真正bē hō͘人心寒，感慨万千？!