《台文通讯精选》

 | | | 转寄

几chân生活记事

作者 Sih-nah 2007.02.18

人定定日子若是无闲，tō会bē记得thang欣赏身躯边ê人、事kap物。我mā是tio̍h-ài定定提醒家己ài kā脚步pàng hō͘慢。

以前读研究所ê时，所tòa ê所在离学校驶车ài 十外分，行路ài四十外分。 我平时是拢坐学校ê shuttle去上课。三不五时á驶车，有时才行路。去学校ê路有几nā条，若是行路ê时，我拢爱行小路。小路是平时shuttle bē经过，驶车ê时mā khah bē驶ê路。

Austin是一个真súi ê城市。有种真chē树á，若是按飞行机顶面看落来，不管寒人、热人拢是青笋笋。当时á，行tī树ńg脚，会hō͘人感觉是行tī树林内。我若是行小路去学校ê时，tō会有感觉是行tī有tám-á-ka ê树林内。每一丛树á，拢有伊ê特色。有时，我会kap树á讲话。抑是o-ló in生着chhiⁿ súi。

有时行路ê时会无tiuⁿ-tî发现趣味ê人、事kap 物。有一摆，我tn̄g着一个八十外岁ê阿妈teh整理伊ê花园。我看阿妈teh搬重重ê花盘，tō自愿beh kā斗相工。阿妈讲he是伊ta̍k日ê活动，kā我说谢了tō继续搬伊ê花盘。我tiàm边a koh khiā一时，欣赏阿妈缓缓á ê动作。Hit时，我hō͘阿妈ê坚持精神感动着。M̄知家己平时做代志敢有chiah-ni̍h有原则。Ná像是有当时á有，有当时无neh。

发现新ê世界mā是我行路ê时定定足享受ê代志。有一摆，我看着一间细间ê 店，tō好奇入去kā se̍h-se̍h leh。结果是kám á店。想bē到，美国koh有这款ê kám á店。Hō͘我想着细汉ê时，阿妗所开ê kám á店。犹teh想ê时，有两个gín-á入来买嘴食物。我无kap头家讲话，kan-taⁿ 恬恬se̍h伊ê kám á店。享受细汉ê感觉。离开hit间kám á店ê时，我心内想讲，后摆我mā beh来买嘴食物。后来tō毕业，离开Austin进前拢无机会koh去hit间kám á店。

Koh有一摆，我看着一间teh 卖二手hippie物件ê店。我tō入去se̍h｡入去ê时，发现我是唯一无chǹg鼻洞，抑是tī身躯刺字ê人。拣几领衫，我mā随人去试穿。后来有买一领teh打折ê洋装。Hit工，我是穿运动衫kap裤。

离开Austin了，后来搬到北德州ê大学城 –Denton。头先，我先tòa 学校ê宿舍，是tī校园内。行路去系里上课，ta̍k工拢会经过一片树林。树林，一个活跳跳ê树林，伊ê春、夏、秋、冬四季拢有无仝ê变化。春天ê树林一片ê青翠，生命力ê再现，是赞赏美妙大自然ê好时机。夏天ê树林一片荫旺，日头光照bē入，是情人谈情说爱ê好所在。秋天ê树林，一片火红，是幻想美丽世界ê好地点。冬天ê树林，满地ê落叶，光闪闪ê树枝，是思考人生方向ê好选择。Tòa tī学校ê这一冬，有树林ê陪伴，hō͘我日子过了真有意思。一年mā真紧tòe着树林ê变化来结束。我除了完成一年ê课业以外，mā体会着存在ê幸福。

来Denton一年以后，我搬出来学校外口tòa。去学校上课就爱驶十五分钟ê车程。行路去学校上课变成无可能ê代志。M̄-kú，有时我若是想着，tō会驶无仝ê路线去学校。有一摆看着一间『Steve B.B.Q』，细细间á ，是用板á搭起来ê厝。看起来真古锥。有一工，我tō入去kā参观一下。Tn̄g着头家。Hit时无啥物人，头家tō kap我开讲。我问伊平常时是啥物ê人客来行踏。伊讲大部份是医生抑是律师来hia teh食昼。生理大部份是作hō͘ 熟-sāi ê人。伊ê 后生是医生，查某kiáⁿ是数学老师。Koh kā我讲伊khah早按怎去hō͘朋友倒钱ê代志。伊讲hō͘朋友出卖比hō͘敌人出卖khah简单，因为若是敌人你会有防心，朋友khah bē有防心。除了kap头家开讲以外，我有注意这间店ê职员是白人。有可能是因为我有偏见，我看着头家是黑人，员工是白人感觉bē-bái。Beh离开这间店进前，头家有请我食有伊特殊配方ê B.B.Q，有影好食tō tio̍h。