《台文通讯精选》

 | | | 转寄

避雨ê瞬间

作者 廖碧玉 2007.02.25

Tī今年八月初，有一暝黄昏时，也就是中国ê头一只船登陆加拿大温哥华，约略一礼拜ê时，我kap先生tī暗顿食饱了后，出去附近行行。无拍算，行到一半ê时，突然间，狂风暴雨，阮无gia̍h雨伞，就bih tī一位卖车ê亭á脚。雨渐渐变细，m̄-koh，犹koh会hō͘衫裤a̍k tâm ê程度，我就决定继续等; tī等ê中间，有一个查某人，远远行óa来，目睭对阮金金看，伊一手kōaⁿ一个袋á,另外一手soah雄雄对我kí来，用真怨恨ê声音讲：「恁chia ê bē见笑ê中国人，恁是teh想啥物？阮加拿大人饲恁，犹无够额吗？恁可怜，阮加拿大人犹koh khah可怜，恁来，拢免做代志，就有好车thang驶，大间厝thang tòa;阮neh？Ta̍k工拚暝拚日，犹koh食bē饱，你想，敢有公平？阮纳hiah chē ê税金，就是拢teh饲恁chia ê难民lah，恁敢有资格去教堂kā上帝忏悔吗？」 讲到chia，伊无koh继续行，停tī阮面头前，骂kah嘴角全波。我tu-tú想beh辩解，讲：「阮m̄是中国人，阮ê祖先是古早tī中国thài散赤，才tùi中国移民去ê台湾人」，先生kā我sái一个目色叫我m̄免kap伊辩。因为，注意一看，看着伊穿ê两脚袜á无仝色，头毛koh结规球，手所the̍h ê袋á有酒矸，近óa ê时，koh有酒味，若kap伊加讲话，恐惊会bē tàng收soah。伊看阮拢无反应，就慢慢ná退去，ná骂「连一句英语也bē晓，真正枉费。无彩，阮加拿大开家伙出hiah chē钱来训练恁，实在有够ló͘。」伊ê英语有真重ê东欧ê口音，m̄-koh字句真顺，速度真紧，好亲像英语就是伊ê母语一样。

这位食酒醉ê查某人，虽然讲话thian-thian tho̍h-tho̍h,偏见真深，m̄-koh也有淡薄道理。确实，过去这十年来ê中国人，hō͘人ê印象就是m̄免拍拚就食好、穿好、tòa好。Ná是亲像che一批一批来ê船民，按呢拚死拚活也beh来北美洲求生存ê例，伊大概m̄-bat看过;chia ê人付三万至五万美金ê费用，千里迢迢，冒险坐hiah-nih破烂ê船，白人形容是“Unseaworth”，就是非常无安全，无适合kiâⁿ船ê意思;tī船顶食ê,是无营养，无变化ê糜饭; 几百人kheh-kheh tī非常là-sap ê船舱; tī航海将近两个月了后，将in tàn tī离Queen Charlette岛上近ê海中，然后，hō͘伊泅水登陆hit个无人ê岩岛，虽然是八月ê热天，Á-koh hit所在茫雾真大，气温也低。最后，加拿大出动军队来救援，发落。

为着这几台陆续开来ê渔船，运送chiah-nih chē中国人来登陆ê事件，已经引起加拿大全国ê关心，辩论，人民对加拿大移民法种种ê议题，法律kap议会ê程序重新检讨。Chia ê，我bē晓也无绝对ê答案。总是，心肝底，难免有一个小小ê疑问，一直teh kā我搅扰，照咱古早所读ê册，中国地大物博，历史文化悠久，传统优秀，二十一世纪是中国人ê世纪，台湾生理人也纷纷去投资、发展; 是按怎，chia ê年轻有为ê青年人，甘愿冒hiah-nih大ê风涌，开hiah-nih chē ê钱，tio̍h koh 忍受拘留，公听审判ê侮辱，甚至作廉价劳工了后，koh脱离bē开蛇头ê控制;千辛万苦beh来这个语言、文化、习惯、完全无仝ê国家neh？