《台文通讯精选》

 | | | 转寄

真雅餐厅

作者 多城客 2007.01.28

Tī多伦多ê市中心，óa近多伦多大学ê书院街(College Street)，有一间餐馆叫做真雅餐厅。你若是tùi书院街向西行去，经过多伦多大学了后无外久ê所在，tō会看着一间有画台湾地图khang-páng ê餐厅，hit间tō是真雅餐厅。伊ê英文名叫做Simple Elegance，tō是简单koh好食ê意思。

这间餐厅无真大间，内底ê布置朴素朴素，壁顶有吊一kōaⁿ肉粽，一看tō知影是一间台湾菜馆。

餐馆ê老板朱先生是一位虔诚ê基督徒。伊真心适，爱讲滚笑，笑着古锥古锥。伊生着福相福相，腹肚大大ê，人缘koh真好，真好kap人斗阵。朱老板有真重ê台湾意识，头壳tēng-khok-khok，若是kap人开讲讲着台湾ê政治，伊tio̍h理论真chē，红ko赤面，咙喉声愈来愈大声。

朱太太名叫阿英，老板娘兼做大厨，非常感心。伊讲话幼声幼声，sai-nai sai-nai，对人亲切好礼，不时笑眯眯，对待人客非常大方，煮ê菜m̄-nā好食koh大碗满墘。若是tú着熟似人客，m̄免吩咐，伊tō会先chìⁿ一盘正味ê台湾菜丸phâng出来sa-bí-sù。

餐馆ê菜是正港ê台湾料理，肉粽、肉丸、肉包、担面、卤肉饭、贡丸汤、肉羹种种，据在你点。当然叫菜炒饭ê mā会使，若是无tī菜单顶面，你想着爱beh食ê，kā叫mā无要紧。另外，in ê火锅koh khah 出名。

来chia ê人客，啥物人拢有，有东方人也有西方人，有台湾人也有中国人。有真chē是tī多伦多大学读册ê台湾gín-á。有ê是bat去过台湾ê白人，tùi chia行过也会sô入来。其中有三个khah特别ê人客，in tòa tī 这个附近定定来，in tō是百外年前去台湾传道，对台湾有真大贡献ê马阶牧师ê查某孙，in讲来这间餐馆假若是转去台湾，感觉非常亲切。

有一日，一个台湾来ê少年学生入来餐馆，伊看着菜单感觉真奇怪，因为菜单英文字ê记号，有ê戴一顶草笠á，有ê东西横一横，有ê一撇撇tùi倒旁去，有ê撇tùi正旁来。伊sa拢无，tō问老板讲：「Che敢是越南字？」，朱老板笑笑á kā应讲，「你实在m̄-bat 字，che tō是咱ê台湾字！」，这个少年家听了koh khah sa无。

原来che是这间餐厅非常特别ê所在，in是全世界第一间有印罗马字台湾话菜单ê餐馆。In ê菜单有英文字、汉字kap罗马字。其实罗马白话字tùi 1860年tō开始tī台湾ê教会使用ah 。真雅餐厅m̄-tāⁿ是teh做生理，in也tī hia tiām-tiām teh做传播台湾语文福音ê khang-khòe。亲爱ê朋友，恁若有机会来多伦多ê 时，m̄-thang bē记得，一定ài拨工去这间世界第八奇迹ê台文餐厅kā交关。