《台文通讯精选》

 | | | 转寄

咱做伙来拍拚

作者 游丽津 2006.09.17

Tī教育界服务将近三十冬lo͘h，拢m̄-bat chiah实在、chiah欢喜、chiah感动teh接近咱ê母语。学习母语确实是一项真有意义、真有价值、mā真有福气ê代志。

会记得我ê gín-á细汉ê时，kap阿公、阿妈讲话拢讲bē通。阿妈讲：「乖孙，你是teh 讲啥物？」阿公讲：「Taⁿ你ngī-mú-ngī-ngiáu，讲规大堆，阿公thài拢听无leh？」Hit当阵做新妇ê我，无感觉也无觉醒，掠准gín-á会晓讲真láu ê「华语」是上光荣，是鼻头真肿ê代志。做新妇ê我实在真戆，bē晓利用这个好机会，kā gín-á教咱祖先ê智慧财产--「母语」，这阵想起来，实在真pháiⁿ势，实在真见笑。

Tī教育界将近三十年，我一向是真认真、真拍拚ê好老师，而且一直担任「华语」演讲、朗读比赛ê指导工作。我爱讲卷舌ê「北京话」，hō͘人误会我m̄是「蕃薯á」，我mā bē pháiⁿ势。因为tī「华语文」ê指导工作上，我有真好ê成就，受着顶司、同事、家长ê肯定。这种真e̍h ê想法，一直到去清华大学语言所做郑良伟教授ê学生了后，完全改变。厝内看十外年ê联合报，改换民众日报。三个gín-á开始kap我学「母语」。这个改变hō͘阮规家伙á大大细细拢会tàng做伙用真情来疼咱ê乡土，来疼咱美丽悔ê台湾。这种满腹ê温暖，这种tùi内心发出来ê热情，实在无法度形容，总讲一句，我实在真欢喜。

每一摆beh去清华大学上郑良伟教授ê课，坐tī车内，我kap学长--维彬、福当、淑芬四个人，拢会互相检讨、互相漏气、互相求进步！真感谢in三个人，真帮忙我。我现在已经bē hō͘人误会，讲我是「外省婆」lo͘h！因为我确确实实是台湾ê súi姑娘á，讲笑ê lah，请m̄-thang见怪！

咱ê责任m̄是kan-na家己会晓讲「母语」，mā m̄ 是kan-na 家己会tàng 了解咱ê 乡土文化、享受咱ê乡土艺术就好。上重要ê 是：咱一定ài 做伙来拍拚，kap郑良伟教授仝款，疼咱ê 乡土，复健咱ê 母语，推广咱ê 文化，hō͘ 咱ê kiáⁿ kiáⁿ孙孙bē去过着亲像飘流tī海上ê孤帆，hit种可怜ê运命，hō͘咱会tàng真有尊严、真有勇气，来建设咱美丽ê家园。台湾是咱ê，咱大家手牵手，心连心，做伙来拍拚。