《台文通讯精选》

 | | | 转寄

一个小公务员ê死

作者 Anton Pavlovich Chekhov原作 2009.05.31

[翻译文学]

阿旭 翻译

Tī 一个真súi ê eng暗，这个bē-bái ê小公务员Ivan Cherviakov坐tī歌剧院ê第二排，用伊ê吊镜teh看歌剧《Les Cloches de Corneville》。坐tī hia，伊感觉若亲像是tī 7层天顶尾hiah-nih爽快。M̄-kú，无张持 (tī故事内底，咱定定会看着『无张持』这个词。其实，作家讲--ê拢真正确，人生本来tō充满bē-tàng预料ê代志)，无张持伊ê面皮皱作一球，目睭吊koân，伊赶紧禁khùi，kā吊镜the̍h--落-来，身躯àⁿ头前，人挡bōe-tiâu，ha-chhiù一声！伊拍一个kha-chhiùⁿ。其实，咱mā无规定禁止人拍-kha-chhiùⁿ。Ta̍k个人拢会拍-kha-chhiùⁿ。作sit人会拍-kha-chhiùⁿ，警察会拍-kha-chhiùⁿ，枢密院ê高级顾问有当时á mā会拍-kha-chhiùⁿ。Cherviakov一点á mā无需要感觉pháiⁿ势。伊用手巾á kā鼻á拭拭--leh，koh真有礼貌四界看--一-下，看伊有kā人搅扰--着-无！M̄-kú，伊看着tī伊头前坐第一排ê一个老人，真认真teh拭伊ê hit粒光头，koh用手套teh拭伊ê ām-kún，嘴--里 sē-sē-念。这时Cherviakov soah认着这个老人，伊tō是公路部ê Brizialov将军。

「害--a，我ǹg伊拍-kha-chhiùⁿ！」Cherviakov teh想。「伊m̄是我ê顶司，m̄-kú按呢mā是m̄好，我tio̍h来去kā伊会失礼。」

Cherviakov咙喉khe̍h--一-下，óa 头前tī将军ê hīⁿ孔边细声讲：「大人，请你原谅，我拍-kha-chhiùⁿ去phùn着你。我是无张持…」

「无要紧，无要紧，--」

「看天公伯--a ê面子，请原谅，我…我…我m̄是刁故意--ê ---」

「O͘h，请你坐--落-来，我thang会tàng听台á顶teh讲啥物。」

Cherviakov soah错乱gông-gia̍h--去。伊gōng-gōng á笑--leh笑--leh，koh换转去看舞台顶teh搬戏。M̄-kú伊bē感觉自在teh欢喜看戏。伊lú坐lú不安。过--来搬戏中站hioh困ê时，伊面皮kek kāu-kāu，行óa去Brizialov ê身躯边，kā Brizialov念讲：「大人，请原谅--我，我拍-kha-chhiùⁿ去phùn着你，m̄-kú，你知，我m̄是刁故意beh ---」

「Ah，好--a-lah！这项代志我已经放bōe记--得-a，ah你koh一直chha̍p-chha̍p讲！」将军挡bōe-tiâu，烦kah嘴唇直直chhoah。

「伊嘴--里讲伊bōe记--得，m̄-kú伊ê目神犹真pháiⁿ。」Cherviakov ná看将军ê面ná按呢想，m̄信伊ê话。「伊根本to m̄ chhap--我，我一定ài kā伊解说清楚，我m̄是刁故意--ê，---拍-kha-chhiùⁿ是真自然ê代志…若无，伊会想讲我teh kā伊phùi嘴nōa。伊chit-má无按呢想，以后的确会按呢想。」

转去到厝--里，Cherviakov kā in某讲伊这项无礼貌ê代志。伊感觉in某认为这项代志伊太无小心。In某代先有一点á青惊，后--来知影Brizialov m̄是in翁 ê顶司，伊tō khah安心--lah。

「M̄-kú，你mā应该koh去kā伊会失礼。」in某讲。「若无，伊soah会想讲你tī大众面前对伊无礼貌。」

「Tō是按呢！我有kā伊会失礼，m̄-kú伊真奇怪，连一句好话tō m̄讲。讲实在--ê，hit阵mā无时间thang讲话。」

过一日，伊kā嘴须khau清气，穿一su普通制服，koh去见Brizialov，beh kā解说。伊行入去Brizialov公馆ê客厅，看着一大堆来请愿ê人来tī hia。将军已经开始teh接见hia-ê人。kap几nā个请愿者讲话了，伊gia̍h头看着Cherviakov。

「大人，m̄知你会记--得bōe，昨日tī『Arcadian』…」这个小公务员开始讲：「我无张持拍-kha-chhiùⁿ去phùn着你，请你原谅---」

「免koh讲--a!你来beh创啥？」

Cherviakov 紧张kah面反白，想讲：「伊m̄ chhap--我！伊犹teh受气， 我一定ài kā伊解说---」

将军kap上续尾ê请愿者讲soah了以后，tō beh入去内面。Cherviakov赶紧走去伊ê面前，细声kā naugh ：「大人！我pháiⁿ势koh搅扰大人一摆。我kā你保证，我真后悔。我m̄是刁故意--ê。大人你一定ài了解---」

将军气kah强beh流目油，用手kā ia̍t走。

「先生，你teh讲sńg笑！」按呢tō越入去内底。

「伊讲我teh讲sńg笑！」Cherviakov 想：「M̄-kú，che ná是讲sńg笑。伊是一个将军，伊ná会m̄知！若是按呢，我无beh koh再请这个大面神--ê原谅！我tio̍h-ài kap伊争一个道理。我tio̍h写批hō͘伊，m̄-kú我bē koh再来这个所在。我chiù-chōa，若koh来，我hō͘你吊--死！」

Cherviakov 按呢ná想ná行转去in tau。伊mā无写批hō͘将军。想--a想，伊一世人mā m̄知这张批beh按怎写这张批。伊tio̍h-ài明á chài家己亲身koh去解说才会使。

「大人，我昨日来搅扰--你，」伊细声按呢念，将军感觉奇怪koh kā看，「m̄-kú我m̄是亲像将军所讲--ê是teh『讲sńg笑』，我是beh来请求你ê原谅，我ná有hiah好胆 拍-kha-chhiùⁿ做滚笑。讲sńg笑是对人足无尊敬，我ná敢…」

「你kā我出--去！…出--去！」将军大声嚷，雄雄变面，气kah一个面青笋笋。

「Haⁿh…你讲啥物？」Cherviakov惊一tiô细声nauh，强强beh昏--倒。

「你kā我出--去！」将军大声嚷koh大力chàm脚。

Cherviakov ê胸坎若像beh爆炸。伊tùi大门颠出去到大路顶，hīⁿ á 无听--着，目睭无看--着，tō按呢an路边ná爬转--去。Gāng-gāng爬到厝， phiaⁿ 落去膨椅内面，制服mā无thǹg，---tō按呢来死--去。

作者介绍: Anton Pavlovich Chekhov (1860-1904)

Anton Pavlovich Chekhov ê阿公是一个农奴，伊ê老pē是一个细间店á ê头家。伊tī故乡读中学毕业，然后去Moscow入大学读医科。伊开始写小说、趣味ê短文、笑话kap论文。Tī伊the̍h着医学位ê时，伊ê兴趣已经是tī写作。伊ê成名作是1886年出版ê《Motley Stories》。1888年伊ê《In the Twilight》得着Pushkin ê文学奖。这本册kap后来写ê长篇小说《The Steppe》hō͘伊成做当时ê一流作家。M̄-kú伊tī 1896年写ê第一本戏剧《The Sea Gull》颠倒大失败。两冬后，伊koh kā伊改写，tī Moscow艺术剧院演出， hō͘伊恢复名声。另外两个剧本，《The Three Sisters》kap《The Cherry Orchard》mā仝款真成功。伊kap女演员Olga Knipper结婚，m̄-kú 3年后伊tō因为着肺痨来过身。

Tī规个loa-siah（Russia)ê文学史上，Anton Chekhov会使讲是代表19世纪到20世纪主流文学过渡ê桥。伊ê作品kap当时ê『大作家』有真无仝款ê风格。伊mā ham当时前进ê『当代(Contemporary)』杂志无牵连。『当代』杂志tī 1840到1860年代支配着所有ê政治文学。一般讲--起-来，tī伊ê作品内面，咱真少看着当时ê政治状况。咱mā真少看着伊用生、死ê大问题来做题材。这种题材tī 早伊50年eLoa5-siah文学界是上流行ê物件。伊无写过长篇小说，有写真chē短篇小说，kā人无teh注意ê现实写--出-来。伊tī 1880年开始写作ê时，tú-tú好几个Loa-siah『大作家』过身 (Dostoevsky 1881、Turgenev 1883) ，Tolstoy mā tī 1880声明伊beh离开文坛。

1887年teh写这篇小说ê时，伊真坚持讲，文学ê目的应该是「真实koh无条件ê诚实」，艺术家应该「对伊ê良心kap责任负责」。可能因为伊有受过医师训练ê背景，仝hit年，伊koh声明讲：「作家应该亲像化学家仝款客观」。