《台文通讯精选》

 | | | 转寄

Khiā远远看家己

作者 王贞文 2009.01.18

--读陈雷ê诗ê感想

顶礼拜收着「台文通讯」108期。内底报导Toronto台文班ê年会，一人写一首诗，吟hō͘大家听。我想像过年规桌ê chheⁿ-chhau,空气中咸辣油香ê年菜味，大家欢喜lim食ê情景，然后去读年会发表ê精彩诗句，一面笑，一面目屎liàn--落-来。

特别是陈雷ê一首真趣味ê诗，我读了koh读，赞叹佩服。简单ê字句，轻快好读ê节奏，趣味兼有深沉ê人生智慧。

女性写作ê潮流，hō͘真chē人重新用认真ê态度，拍破禁忌来看「身体」。身体有生湠后代ê功能，mä有性ê súi kap紧张ê感官经验。少年女性写争取身体自主权ê过程，中年女性写感官经验kap现实社会ê冲突，年岁大ê女性渐渐会tàng khiā远远看家己，kä身体成长、开花、结籽、谢--去ê经验kap大自然奥妙ê韵律结合。

我无想到查甫人mä会tàng chiah-nih解放，会tàng用hiu-mo͘h (humour) ê心情来面对身体ê病疼，特别是一款挑战查甫人生殖力，tī传统社会bë使大声讲--出-来ê病疼！我bat读过查甫诗人趣味有智慧ê诗，描写心脏手术ê过程，我mä bat读过查某诗人幽怨悲伤写着子宫癌ê心情。总--是亲像陈雷按呢自在写割「栗子」ê心境，我犹m̄-bat读--过。

会tàng khiā远远看家己，kā家己ê身体当作观察ê对象，kā感受写--出-来，总--是无hō͘身体ê病疼束缚，无沉沦tī自怜自伤ê境界，实在是一款高段ê写作法。我想，会tàng按呢写作ê人，一定是已经kap命运相演--过，得着智慧--ê｡

旧年(2002)诺贝尔文学奖颁hō͘匈牙利ê犹太人Imre Kertesz，伊十四岁ê时hō͘人掠入去集中营，因为虚报年岁，才无hō͘人送去毒气室。伊一直拢teh写集中营ê经验，总--是，他写ê集中营经验真特别，tī暗淡可怜、充满压迫ê现实内面，犹有笑容，有趣味。伊讲，伊会tàng活--落-来，就是因为伊会tàng khiā远远看家己，伊一直拢有法度做家己ê观察者，伊ê心会tàng暂时脱开受压迫ê现实，看伊所面对ê局势。伊永远是自由ê人。

我所欣赏ê捷克诗人赛佛特(Jaroslav Seifert)mā有这款ê humour kap自由。伊一生受真chē苦，受政治迫害，经济m̄-bat好--过，到老ê时koh tio̍h靠两枝拐á才会tàng行动。总--是一直到80几岁，他犹是会tàng自由写伊tī病床顶ê情梦，写伊对女性身体ê欣慕。他会笑家己giãh两枝拐á ê怪形，笑家己满面ê jiâu痕，然后kā来讨签名ê查某gín-á讨beh chim嘴，充满一款趣味--ê､爱ê气力。

这款ê自由，这款ê趣味，hō͘人会tàng t„笑声ê内面，重新得着活--落-去ê气力，mā会tàng得着坦然面对病苦kap死亡ê气力。陈雷ê诗属tī这款ê文学传统，我读了，心忽然开阔--起-来。