《台文通讯精选》

 | | | 转寄

过年摸牛

作者 田土伯 2009.02.01

我细汉ê时，阮阿爸有饲一只水牛teh tàu作sit。过年时阮ê厝边头尾拢会来拜托阮阿爸hō͘ in摸阮tau ê牛，beh讨一个好头彩。摸牛ê时ài ná摸ná念有押韵ê好话，而且会使tùi牛头摸到牛尾，规身躯拢会使据在你摸。

Che tio̍h-ài看你hit年上盖ǹg望得着啥物款物件来决定，但是kan-na会使摸一位nā-tiāⁿ。

下面是一般人上盖爱摸ê部位kap顺序：

摸牛嘴，大富贵。
摸牛头，起大楼。
摸牛耳，食百二。
摸牛目，会发达。
摸牛鼻，好无比。
摸牛肚，好头路。
摸牛腿，生双对。
摸牛脚，得金角。
摸牛奶，出壮丁。
摸牛lān,中状元。
摸牛lān-pha，紧做阿爸。

照阮阿爸ê统计，一般人上爱摸牛头kap牛嘴，khah无人敢摸最后hit两个部位。阮阿爸mā上惊人摸牛ê hit两个重要部位，惊摸若无好势，牛会起狂(kông)，乌白chông,真危险。但是有一年，阮厝边有一个真活骨ê猴gín-á,偷偷á去摸牛lān(牛ê生殖器)，hit年成实去hō͘伊考tiâu着台南一中ê状元，mā是阮庄--里有史以来第一位考着台南一中ê学生。这项代志tī hit年马上传遍中南部。隔转冬ê过年，差不多有百外个beh参加考试ê学生，透早五点半天未光ê时，tō来排列beh来阮厝摸牛lān｡阮阿爸惊一tiô,赶紧kā牛牵去藏，惊若hō͘ hiah-nih chē人摸落到底，阮厝ê牛一定会变做m̄成(chiâⁿ)牛，一定无法度koh再犁田。