《台文通讯精选》

 | | | 转寄

郭胜华医师ê故事

作者 郭胜华医师口讲 2008.12.28

「你好！我是宜兰人。」

真chē宜兰乡亲见着我，知影我是郭章垣(hoân)医师ê查某kiáⁿ，拢会真亲切对我讲这句话。我拢会回答「我mā算是宜兰人，虽然我kan-na tī宜兰tòa过三个月，tòa tī我老母ê腹肚内。」

我是1947年10月出世tī嘉义ê溪口。1947年3月，我ê老父(pē)，前宜兰省立病院ê院长，因为228事件hō͘人枪杀tī头城妈祖庙ê头前。我是老父死了才出世ê查某kiáⁿ。

我ê老父郭章垣医师是嘉义溪口人，是一个代书ê大kiáⁿ，真早就去日本读册。Tùi日本庆应大学医科毕业了后，留tī庆应ê外科工作。伊bat kā发明味素ê铃木梅太郎教授开刀，有上当地ê报纸，日本天皇特别送伊二罐清酒kap 300 kho͘ ê日币。1945年日本宣布投降ê隔转工，我ê阿公khà电报hō͘我ê老父讲「日本已经战败，咱已经koh做中国人，你应该转来替咱ê祖国服务。」因为买无船票，我ê老父一直拖到1946年2月才转来台湾。经过庆应ê前辈王金茂医师写介绍批，去见当时陈仪ê卫生局长经利彬，我ê老父虽然bē晓讲北京话，但是伊ê英语真好，直接用英语kap经局长交谈，1946年5月伊接任宜兰省立病院ê院长。Hit年7月宜兰地区就发生cholera (làu-吐症)，hit个时阵cholera犹无特效药，是真危险ê传染病。我ê老母讲我ê老父无暝无日照顾患者，救百外个人，所以真chē宜兰人到taⁿ犹真siàu念我ê老父。

我ê老父为啥物受害？

我除了听我ê老母讲一kóa原因，我mā去chhōe真chē资料，看真chē册。我想主要有二个原因：一个是挡人财路。Hit当时联合国ê救济总署（UNRRA）有拨一笔救济金beh帮助宜兰病院复建，相信当时ê宜兰市长朱正宗对这笔钱有想beh贪污。另外一个原因是中人ê计。228事件以后，台湾各地方成立228处理委员会，宜兰地区3月初5成立，我ê老父担任委员会ê主席。伊kap朱市长讲好，in二个beh用性命维持宜兰地方ê和平，支持台北ê 32条要求。后--来我tùi南京档案才知影陈仪3月初2就向南京讨救兵，21师3月初5离开福建，3月初6就来到台湾ê外海。Chia ê台湾知识份子m̄知影中国人ê政治，犹koh gōng-gōng teh成立228处理委员会。结果chia ê台湾人领导份子，m̄是死，就是逃，che就是中人ê计。

我ê老母出世tī云林土库ê一个真好额ê家庭。伊是台北第三高女毕业，经过媒人介绍，tī 1940年kap我ê老父结婚。结婚了后一礼拜in二人就作伙坐船去日本，tī日本生活7冬。我相信这7冬也是我ê老母一生上幸福ê日子。

我ê老父死了后，我ê老母转去我ê老父ê故乡嘉义溪口，一个真大、真复杂ê家庭。阿母讲「人在人情在，人死人情亡。」伊tī hit个家庭ê地位完全无--去。伊ài khioh柴、ài煮饭，特别是ta-koaⁿ非常重男轻女，伊生--ê koh是一个查某gín-á｡总--是，阿母认为伊既然有我，伊mā是beh tī hit个家庭tòa--落-去。

后来发生真chē代志，一kóa若真若假ê故事，暝暝中间亲像我ê老父希望我ê老母会tàng chhōa我转去伊ê后头tòa｡我ê阿舅虽然疼小妹，总--是mā ài经过阿妗（kīm)ê同意。后--来tī我5岁ê时，我ê老母才chhōa我转去伊ê后头云林土库。虽然无过名，我ê阿舅hō͘阮母-á-kiáⁿ有一间厝thang tòa,也hō͘阮二甲放领地，有淡薄á收入，过基本ê生活。

Tī我犹koh是细汉婴ê时，我ê阿母tō想beh栽培我做医生。我原本读虎尾女中，高中ê时转去读嘉义女中。我ê老母陪我去嘉义读册，我不时笑讲「孟母三迁」，我ê老母是四迁。为着beh hō͘我有一个khah好ê读册环境，阮搬过4摆厝。阮租ê厝拢真细间，有时kan-na kám-á店ê楼梯厝á,用水mā无真方便，阿母ta̍k日陪我读册，有时陪到暗时1、2点，煮点心hō͘我食。

阿母虽然希望我读医科，但是伊讲咱厝无钱，若是考着台大医学院才hō͘你读。我犹会记得大专联考放榜，阮母-á-kiáⁿ二人tī收音机ê边--a听，台大医学院听无我ê名，台北医学院mā听无我ê名，一直到高雄医学院火车尾才听着「郭胜华」。虽然我感觉有争着一个面目，特别是对一向重男轻女ê阿公，但是也开始烦恼，私立--ê?Beh按怎？无法度thang读，我kap我ê阿母拢真失望。

后--来，有朋友kā阿母讲「beh考着医学院是真无简单，你一定ài hō͘读。」阿母只好kā伊身躯边ê钱拢khêng-khêng--leh，勉强会tàng付第一学期ê学费，心内想先读一学期才koh想办法。后--来我老父庆应大学同学会ê陈拱北教授知影这项代志。Hit时阵tú好庆应大学成立100周年，台湾庆应同学会有beh寄付100万ê台币hō͘母校，募款了后koh有chhun 一、二十万，陈拱北教授就建议kā这笔钱ê利息hō͘我做奖学金。差不多有2千kho͘，但是犹无够，路尾我有一个叔公原本是一个医生，后--来医生无做开一间药厂，答应每一学期beh hō͘我奖学金。学费是无问题，但是tī高雄租厝、食饭ê费用？每一学期开学进前，我转去溪口，阿公kap阿叔有ê hō͘我50 kho͘，有ê 100 kho͘，有ê 300kho͘，tàu-tàu--leh，差不多1,500 kho͘，hō͘我带去高雄做生活费。

我ê老父有留真chē相片，特别是tī日本读册ê时代，细汉ê时我不时kap我ê老母作伙看相， 我对老父ê认bat就是tùi一张、一张ê相片kap阿母ê说明得--来-ê｡可能因为tī庄脚大汉，我kan-na知影我ê老父死tī 228，但是我并无清楚228是啥物？也m̄知228是社会ê禁忌。有二项代志hō͘我印象真深：读高雄医学院ê时，因为需要二个保证人，阿母bat chhōa我去chhōe阿爸庆应ê一个同学，tī高雄做医生。阮母-á-kiáⁿ tī楼脚等二点外钟，伊人tī楼顶，就是m̄敢落来kā我khàm印á｡另外一项，自细汉我tō听我ê阿母讲，王金茂医师替我ê老父写介绍批ho͘当时ê卫生局长经利彬。我读高医6年ê时，王金茂教授教阮公共卫生。有一摆下课ê时，我特别行去讲台chhōe--伊，我讲「王教授，我叫郭胜华，是228事件郭章垣医师ê查某kiáⁿ」，无想着王教授一个面反乌，一句话拢讲bē出--来。我家己mā惊一tiô,m̄知影啥物讲m̄-tio̍h｡

1973年，我tùi高雄医学院毕业就结婚出国。出国了后无外久我就有身，我心内想真简单，我接我ê阿母来kā我照顾gín-á,我tō会tàng继续读册、工作，我mā会tàng照顾我ê老母。无想到tī我ê老母teh办出国手续ê中间，因为需要阮老父一张死亡证书，出chē chē ê麻烦。等我ê阿母会tàng来到美国ê时，我ê gín-á已经会行--a！

也因为按呢，我开始想，为啥物beh爱我ê老父一张死亡证书会chiah-nih困难？到底228事件是啥物？为啥物禁忌？我开始tùi报纸、tùi chē chē ê册去chhōe答案。我mā bat写批hō͘蒋经国讨我ê老父e死亡证书，结果最后我收--着-ê是阮郭家40户ê户口誊本。Che m̄是我beh爱ê物件，我beh爱ê是死亡证书，是ài交待我ê老父是按怎死？敢有拘捕令？敢有审判？Hit粒枪chí是啥物人--ê?是啥物人命令开枪？我需要答案。

旧年911事件，tī 2点钟久内底死3千外人。大部份ê人chhōe无尸体，但是至少in知影啥物人是幕后凶手，美国政府也为着这项代志发起战争。越战也有真chē美国军人死tī越南，但是若有chhōe着in ê骨头，美国政府会用各种方法，甚至DNA ê证验，尽量beh chhōe出in是某某人，装入棺柴，khàm国旗，送转来美国交待ho͘ in厝ê人。每一冬ê越战纪念日，我若看着牺牲者ê家属，tī Washington D.C. ê越战纪念碑摸in亲人ê名，我tō留目屎。美国政府是按呢疼惜in ê公民。

我ê老父是宜兰省立病院ê院长，也算是公务人员，伊身犯何罪？罪犯tó一条？三更半暝掠人，无拘捕令，是绑架；无经过审判就thâi人，是谋杀；挖二个空就tâi--落-去是灭尸。我非常感慨，beh哭mā无目屎。

228到底死外chē人？有人讲2万，有人讲6万，也有人讲10万。总--是，悲剧已经发生，但是咱需要深深来思考，咱tùi这个事件学着啥物？咱bē使bē记--得，也m̄ thang hō͘历史koh再重演。

（2002年2月，郭胜华医师口讲，TBTS编辑部整理）