《台文通讯精选》

 | | | 转寄

一个好所在

作者 赵水生 2008.06.08

有一个好所在，有山也有水，想beh绍介hō͘ ta̍k家知，这个所在tō是竹山。

竹山这个充满庄脚古早味ê山城，纯情朴素，风景、古迹、特产真súi真特别，一四界拢是竹á，是上大ê特色。

竹山ê景致有够赞，透早peh-chiūⁿ山顶ê路nih，chhìn-chhái看你tō会tàng看着súi-tang-tang ê 风景。假使运气好，tn̄g着天气清爽无半迹云ê时阵，你犹看会着竹山城ê全景。到下晡，koh ùi 99 khám 行落去，行到一大遍田园，看着日头落山ê景色，实在会kap「关山日落」相比phēng｡

讲着古迹，李勇庙、红旗公庙、德山严、林家古厝…chē kah hō͘你算bē了。先来讲红旗公庙，庙内服祀ê是满清时代ê『捕快』，因为tī林kí埔（竹山古早名）『捕快』kap pháiⁿ人发生一场chhia-piàⁿ，soah来惨死，在地人为着感谢伊保护地方ê恩情，才来起庙纪念，接受香烟祭拜。这个神明手gia̍h ê家私（武器）是长枪，威风十足。Koh来讲林家古厝，姓林ê tī竹山是大家族。早当时林家ê祖先是一位秀才，替竹山人做真chē代志。林家古厝hō͘政府鉴定做古迹了后，因为保护无好势，厝内ê太师椅kap真chē古物soah拢hō͘贼á偷the̍h去。所以林家才koh收回权利，经过chûn年921地动，古厝化作平地，tō按呢消失去a。

最后来绍介竹山ê名产。上盖有名ê是竹山蕃薯。有一个传说，讲嘉庆君游台湾时，有食过竹山蕃薯，o-ló竹山蕃薯好食。皇帝嘴，讲话算话，竹山蕃薯好食ê名声，也tō按呢响起来。

竹山是一个好所在。有闲来竹山chhit-thô，有影无影，看「前山第一城」你tō知。