《台文通讯精选》

 | | | 转寄

买田看田底，娶某看娘lé

作者 许文政 2008.06.15

「买田看田底，娶某看娘lé｣是一句真有教育性ê台湾俗语。台湾人常常用这句话来教示kiáⁿ孙后代，处世待人对事应该有ê准则kap态度。

是按怎买田tio̍h-ài注意看田底？因为若是好田底tō有利种作，会tàng好收成。所以若beh买田，往往tio̍h拣土质好、无沙石、khah有肥份、水量充足ê田地，平平劳力耕作，应该有khah好ê收成。

娶某是按怎tio̍h-ài看娘lé?因为查某kiáⁿ kap家己ê老母上盖亲近，这个查某gín-á tī老母养育下，人格形成ê过程中受老母ê影响上盖深远，所以台湾人认为这个真贤慧koh晓理，做人有好表现ê母亲，娶伊ê查某kiáⁿ做家后，一定bē m̄-tio̍h｡

这句俗语对字句表面解说大概是这款意思，可能mā会hō͘人感觉是tùi男性做中心ê想法。其实会tàng拆开性别，扩大引用，对chē chē问题用仝款模式思考以后，会tàng chhōe出最好ê答案。

作穑人辛辛苦苦，将秧（ng）á播tī田底，一khu田最好是一khu好田底ê田。好田底ê田才会有利耕作，自然mā会tàng期待好ê收成。生理人若beh去中国投资，代先tio̍h考虑中国官敢会khà油食钱、贪污歪哥，中国人敢会信用tìt｡一定tio̍h-ài研究调查中国是m̄是一个有利投资ê环境。好ê投资环境应该是司法独立公正、尊重人权、治安良好、言论自由、政治民主，劳动市场稳定素质优良，金融制度、市场机制健全运作，整个环境有利投资行为。「买田看田底」，若beh去中国投资，tio̍h-ài先了解确定中国是m̄是一个有利投资ê好田底。

台湾tī 12月初beh举行立委kap县市长ê改选，台湾选民tio̍h-ài先思考了解，选啥物人才是选tio̍h人。一个候选人ê学识能力当然是重要，koh khah重要ê是这个候选人ê出身背景、文化认同，心思意念是m̄是疼台湾。「娶某tio̍h-ai看娘lé｣ lah。前摆台北市长选举前，马英九先生家己讲：「不知为谁而战」。马先生tī台á顶对李前总统讲：「报告主席，哇（óa)是lim台湾水，食台湾米大汉ê台湾人lah。」自称台湾人却m̄知为台湾而战。后来伊ê老爸对伊讲，为着会tàng将台湾保持tī中国ê内面，一定tio̍h出来参选，伊才决定参选台北市长。真chē选民无检验马先生ê出身家庭背景、政治理念、意识形态，tō将神圣ê一票投hō͘伊，最后当选做台北市长。

马先生就任后，渐渐暴露伊ê真面目，伊联中反台湾，phí-siùⁿ本土文化，任命龙应台做文化局长，专门tī台湾发扬中华文化。阿扁当选总统以后，tī各种场合故意对立，处处为难，根本无beh尊重国家元首、行政体制，公开侮辱总统讲，甘愿tī市政府办公室挂in某ê相片，mā m̄挂陈总统ê相片。这摆风台台北做大水，马市长甘愿台北市淹水，致使市民受着生命财产ê严重损失，mā m̄向中央报告求援协助救灾，亲像kā台北市拚入中国，成做中国ê一部份。

今年12月初台湾beh选举，大家tio̍h好好会记得「买田看田底，娶某看娘lé｣这句俗语，仙mā m̄ thang选出亲像马英九这款中国人做台湾任何行政首长，因为一个行政首长若心无台湾、只有中国，无beh认同疼惜台湾，时时刻刻teh联中反台，中国m̄免「武力解决台湾」tō会tàng并吞台湾，台湾人tō koh一摆做人ê奴隶，kiáⁿ kiáⁿ孙孙永远bē tàng出头天。