《台文通讯精选》

 | | | 转寄

阮ê故乡----艋舺

作者 Ông, bín-kak 2008.06.01

艋舺这个地名是按怎来ê,无kā研究，mā m̄-bat听起老一辈ê人讲起。大人一日顾三顿，四界奔波无闲，抑是无观念，根本to m̄知影ài关心家己ê故事，soah变成无重要无kā gín-á传教。所以到taⁿ若有人问我讲：恁hia为啥物叫做艋舺，我拢嘴á开开，m̄知beh按怎回答。

不过有一项值得提起ê代志，tio̍h是古早人流传落来「一府、二鹿、三艋舺」ê俗语，会tàng看出hit当时阮ê故乡----艋舺ê繁华情形，soah hō͘艋舺人感觉chiâⁿ光荣chiâⁿ hiâu-pai。 早期淡水河溪水chiâⁿ深，大船会使得驶入来内底，所以当时政府tī艋舺有设渡船头，专门处理船货kap旅客通关ê khang-khòe,功能kap chit-má ê海关仝款。因为按呢，店面、贩á间真chē,应付来来去去，唐山、台湾做生理ê人客。

台湾俗语有一句话：「有人ê所在tio̍h有生理做。」所以拍拳卖膏药，hoah lin-long卖杂细，王禄á仙，变猴弄ê各路英雄好汉，拢来斗闹热。Chhit-thô看光景kap生理人，lām-lām做一伙，亲像『清明上河图』内ê景色仝款闹热。

艋舺chit-má改叫做万华。伊tī台北市小南门外淡水河一带，kap板桥隔河远远相对。伊是下港火车驶入台北市ê门户，来到艋舺着表示到台北a。艋舺区内有历史足古ê清水祖师庙，青山王宫、龙山寺等等。特别龙山寺上出名，无分早暗，香火无断，名声thàng海外。庙口对面卖物食ê担á,俗koh好食，大碗koh满墘，爱食啥tō有啥，细汉时定定tòe阿母来chia烧香拜乖，顺续食点心。可惜chit-má已经变做公园lo͘h，实在hō͘人怀念。

犹有华西街kap正á起好无外久ê环南综合大批发市场。华西街是艋舺有名ê夜市á,海外ê观光客用这个所在做参观ê起点。在地人koh khah是挨挨阵阵来chia chhit-thô｡环南综合大批发市场是家庭主妇查某人上爱来ê所在，ta̍k项菜色拢有。市头批发hō͘贩á，市尾俗卖hō͘查某人。家庭主妇来到chia，亲像看着宝贝，ta̍k家大kōaⁿ细kōaⁿ，怨bē得加生两支手斗kōaⁿ。转到厝内大粒汗细粒汗，皮包á一下摸，ôa!Ná会mo͘h-mo͘h？若tú-chhēng hō͘翁婿看着，「俗物，食破家」，贪俗，死好lah。可爱ê市场，有好mā有bái｡

年beh到lo͘h，初二是转去外家ê日子。想着故乡ê艋舺，心情亲像阿兵哥a tih-beh退伍算馒头按呢，一粒一粒算，一工等过一工，希望早一日转去故乡ê艋舺。