《台文通讯精选》

 | | | 转寄

好问题，好答案

作者 阿秀 2008.05.18

加台会kap「台文通讯」十周年庆祝会最后一场演讲请着金美龄女士。金女士参与台湾独立建国ê运动已经真久，有人真早tō bat伊，知影伊tī日本所做ê chē chē代志，但是mā有真chē人是通过小林善纪ê「台湾论」这本册，才知影金美龄这个人。伊ê理念真明，mā真敢讲话。特别tī新政府上台了后，有人认为台湾人已经出头天，但是伊要求独立建国ê声音，不但无无去，而且lú来lú大声。

金美龄这摆演讲ê题目是「台湾精神ê再生」，真适合今年夏令会ê主题「台湾文化ê再生」，因为「台湾精神」是「台湾文化」ê地基，地基ài chāi才会tàng起厝。

金女士真gâu讲话，伊ê演讲并无严肃，tùi伊tú着ê代志讲起，讲伊ê翁婿、伊ê gín-á,但是真chē清楚ê理念就tùi故事ê内底一直流出来。

金美龄目前是日本真出名ê政治评论家，有伊家己ê电视节目。伊参与tī日本主流社会。Tùi伊ê演讲，咱感受着伊ê能力、自信kap强势。Tī伊演讲了后，开放hō͘同乡问问题，有一个真súi ê问题，有一个真súi ê答案，hō͘我印象真深。

陈柏寿牧师问起：

『我有一点希望你会tàng了解，che是全世界头一摆「台文通讯」kap同乡会联合夏令会。你可能会记得伊藤邦幸（Ito Mika）先生kap聪美姊ê代志。聪美姊为着「台湾青年」这份刊物，无出名，恬恬奉献。为着beh纪念聪美姊ê精神，才有今á日ê「台文通讯」。希望你知影，阮tī草根所做ê语言运动，阮真appreciate你反抗ê精神，虽然kap聪美姊有无仝ê人生观。Tī chia只是beh hō͘你了解，你所参加ê这个会，kap你有真深ê关系，有无仝ê人生态度，但是有相仝ê目标。』

金美龄女士回答：

『真多谢！黄聪美ê代志我永远bē bē记得。Tī「台湾青年」有一篇文章是我ê先生周英明写--ê。就是听着伊ê故事，发现这个人恬恬无出名，一直支持「台湾青年」这本杂志，支持台湾独立联盟这个组织，伊家己连一领大衣tō m̄甘买，但是每个月、每年就是奉献，一直到伊过身，大家才知影伊是台湾ê女性黄聪美。我ê先生将伊ê故事写出来，大家读着大家tō流目屎。

无m̄-tio̍h,che是咱台湾精神一个真súi ê例。但是咱按呢无够，这种人真可贵，但是in是silent majority。当你无出声，就是表示对目前政权ê同意。这个时代，咱bē使silent，咱ài发声。

每一个人有伊无仝ê选择，有人妥协，有人坚持，有人行中间路线，方法无仝，条条大路通罗马。每一个人ê角色无仝，互相尊重学习，咱才会赢。』 真好ê问题，真好ê答案。

我想这摆金美龄ê演讲，hō͘咱ê妇女朋友学习真chē。伊有智慧，有信心，坚持理想，照伊家己ê方式生活。伊tī日本出名是这几冬ê代志，总--是伊非常认真，hō͘家己进步，机会来ê时才掠会tio̍h。 是啊！金美龄是真好ê模范，但是咱mā无bē记得另外一个模范，恬恬无出名ê聪美姊。

Tī人生ê舞台，咱学习别人ê优点，演家己ê角色，互相勉励。Ǹg望咱建立「台湾精神」，mā hō͘「台湾文化」早一日khiā起tī家己ê土地。