《台文通讯精选》

 | | | 转寄

Siàu念李友义

作者 刘清白 2008.05.11

李友义先生，我ê好朋友kap同志，今年八月初参加世台会tī巴西车祸过身。

友义兄tī真chē所在，是台独运动者ê模范，mā是我ê Role Model。其中对我来讲，上突出ê 是伊对台独运动「积极参与」(Active Participation) ê使命感，家己khiā出来实行「成功不必在我」ê行动方针，kap伊「斗士兼绅士」ê人品。

三十几冬来，若是kap台湾前途有关ê活动，无论大小，一定有伊一份。同乡会ê活动亲像烘肉、郊游、旅行、演讲会、音乐会，kap针对国民党ham 中国ê游行、示威、抗争等等，拢会看着友义。旧年tī台独联盟台湾总部欢送一位同志出国食新头路ê暗会tú着伊，hit日伊tùi台中赶飞机转来美国，kan-na会tàng停三十分钟，伊mā赶来。今年三月转去台湾参加世界台湾人大会，伊kan-na会tàng 请假 四日，伊mā赶来。六月底ê金美龄演讲会，友义负责音响控制，但是真 少人知影伊hit日腰脊骨疼kah 真厉害，伊mā赶来。除了因为公事出城，不管外无êng，伊一定会来参加台独联盟支部聚会。Che tō是友义兄「积极参与」ê精神。每一遍参加台湾人ê聚会， 我tú着第一位熟sāi ê朋友，拢会先问讲：「你好，你好，友义敢有beh 来？」。无意中ná像感觉有伊tī leh，我就比较khah有完全感，有伊tī leh，定着是来tio̍h所在。几nā遍，我拢想beh chhōe pīn-tōaⁿ ê藉口，但是若想着伊，tō家己感觉pháiⁿ势。

乌名单ê期间，友义无算后果，出面担任领头ê角色，前后担任同学会长，同乡会长，协志会长，同乡联合会长，人权会长等等重要ê职务。乌名单解除了后，敢出风头ê人khah chē, 伊摇身一变，tī ta̍k项活动中khiā tī底线发传单、排桌椅、piàⁿ畚圾、运杂货，任劳任怨，kan-na ǹg望活动办hō͘成功，实践伊「成功不必在我」ê作事原则。

三十几冬来，友义坚持一致ê原则，据理力争，tī我ê记池中，m̄ bat听伊恶意teh批评任何同乡，m̄ bat听伊kap人大声计较。讨论问题解决办法ê时，伊拢mā会tàng khiā tī对方ê角度，用协调ê方式来求得上适当ê答案。我想che是伊有chē chē ê朋友，受真chē人尊重ê因素之一。 今年七月初七，台独联盟北加州支部tī Fresno聚会、郊游、野餐。虽然友义ê腰脊骨感觉无啥爽快，而且隔顶日tio̍h-ài赶转去旧金山湾区参加婚礼，伊kap牵手良惠oan-nā欢欢喜喜开三点钟ê车来参加，专工kā Fresno同乡做一场非常精彩ê演讲：「台湾kap中国ê军备比较」，内容盖新， 图文并茂，hō͘ Fresno同乡大开眼界。伊随时chah tī身躯边ê注册商标：「谦卑ê笑容」koh khah hō͘阮留着深刻ê印象。Hit暗大家mā做伙庆祝伊ê 63岁生日。

最近二、三冬来，友义时常走台湾，公司派伊转去台湾训练雷达技术ê人才。几个月前，讲着退休ê代志，我问伊：「退休了拍算beh按怎？」，伊免想着讲：「决定beh转去台湾，趁这阵犹有气力，koh替台湾人做一kóa代志」，我tio̍h滚笑讲：「按呢我着欠人做伙读台文通讯罗」，伊tio̍h讲伊oan-nā会chhiang-chāi(时常)转来。

最近看着一片电影：「Down to Earth」，导演用笑诙ê方式，表达主角因为车祸过身，入天门 了后发现伊ê时间未到，但是已经siuⁿ慢ah，顾天门ê经理人教伊kā spirit附tiàm别人ê身躯，hō͘伊转去人世间完成伊ê愿望。我m̄知影St. Peter tī天门迎接友义ê时阵，按怎向友义确认伊ê时间，但是我想友义一定会用绅士ê方式据理力争：「台湾犹未独立建国，台湾社会koh chiah-nih需要我这款专业ê人才，是按怎这阵叫我转来？」若会tàng亲像电影ê结果，敢m̄是真好？

友义虽然离开阮，但是伊ê精神永远存在。以后，每一个月一遍tī北加州开台独联盟支部会议ê 时，我m̄免koh问：「友义敢有beh来？」，因为，我知影，伊一定会来。