《台文通讯精选》

 | | | 转寄

我看台文通讯

作者 陈郑弘尧 2008.03.23

我bat为台文通讯三周年纪念写过一首短诗tàu闹热。He是1994年ê代志，我tâⁿ-á接触这份刊物无几个月。若无记m̄ tio̍h，应该是李勤岸兄绍介我参加「台语网」电子邮便群了后就开始收着a。Hit期是第31期，由创办ê灵魂人物之一郑良光兄主编，社论ê主题：「意义kap意志真明ê台湾人」。Hit当阵台文界犹无台文Bóng报，无Tâi-oân-jī，无莲蕉花台文杂志...等等。Ah自立报系出版ê台语册犹未绝版，母语文ê网站无几个。

良光兄chiâⁿ kut力推广台语文。以早ê台文通讯合订本两本伊拢有hō͘我，m̄-chiah后来有机会了解刊物ê经过。台文通讯ê特色之一就是草根性真明，che kap七十年代ê台湾语文月报ê传统一致。虽bóng m̄是洛杉矶台文习作会ê机关刊物，却是kap in会员tī 1992年hit chūn ê聚会有tī-tāi。刊物ê经济源头主要犹是读者oân-nā订oân-nā赞助，无够ê部份chiah koh由死忠ê奉献者tàu khêng。台文通讯mā因为有亲像郑良伟教授这款ê专业语言学者kap其他研究生ê草根参与，tī介绍语文运动ê理论概念方面比别种刊物khah有成就。Tùi第25期开始，聪美姊纪念基金会开始kā米国出版ê责任担起来（一直到taⁿ），台湾ê部份由台语传播企业公司负责，ta̍k期ê页数mā增加两倍，变今á日ê 16页。

早期ê台文通讯有一kóa特色后来无koh看着。自创刊号开始ê「语文动态」ê单元简单报告国内外各种台语教学、出版、会议、传播ê消息，客语ê部份oân-nā有kóa。第14期至第32期有「白话字教室」这个罗马字单元；第31期至第36期有Loonng ê｢客语教室」。我上怀念ê单元大概是「台语信箱」。对一份beh发挥草根功能ê刊物来讲，读者ê来函ta̍k张都是宝。Tī hia我mā加减thang了解一kóa台语文界ê热心分子in ê想法。

总是，台文通讯 ê一kóa基本特色犹原无变。亲像成做台语文界主流书写策略ê汉罗合用ê原则。亲像伊ê北米洲文学色彩kap生活性ê文章题材。虽然无正式ê统计，头一摆tiàm台文通讯这个园地发表成果ê新作者应该bē少个。

台文通讯使用ê编排kap出版技术mā值得提起，因为台语文科技ê发展tiàm这张纸面顶会得看着。可比讲，tùi第33期用HOTSYS-HAKSYS ê新白话字字型了后，台文通讯ê印刷加khah súi，字撇加khah清楚。1996年起，台文通讯部份ê内容会tàng tī网路顶传播。Hit个坎站ê白话字科技无现此时进步，beh显示有声调符号ê字确实有困难，kiám-chhái koh顾着chē-chē国外同乡无方便用汉字软体ê情形，所以用图形ê款式将文字上网。可能因为kha手、技术支援拢有限，网站ê内容无koh更新―che是khah可惜ê所在，一部份mā表示Internet少年辈ê语言文化参与无够。假使台语文界beh进一步发挥新媒体ê放送功能，咱这方面ê人力开发定着ài有策略上ê安排。

自第69期 (1999年) 开始，刊物ê重心sóa去加拿大，主编是苏正玄先生，伊kha脊后是多伦多ê台文通讯读者联谊会ê kho͘ á teh支持。新编辑策略有继续勤岸兄时代（第51期~第68期）ê一kóa特色，其中上有价值ê部份是用汉罗改写ê方式向台文界绍介其他有历史意义ê白话字文献。我个人mā kah意「人物专访」ê单元；in访问着ê国内外人士包括林哲夫、叶金胜、马偕牧师ê查某孙、Yabu Syat牧师、酒井亨、Phuntsok Jordhen....等等，ta̍k个拢有精采ê人生经验thang分享。其他koh有ùi日文、英文、华文翻译过来ê散文，其中时事评论占上chē。这个坎站ê通讯内容ê安排会使讲有几nā成反映着台加人ê人文思想kap in ê精神生活，作品以散文为主。Ham Bóng报、Tâi-oân-jī比phēng，现在ê台文通讯ê移民社区色彩有影chiâⁿ特殊：古早人绝对都想bē到有一工in ê kiáⁿ孙m̄-na tī千里远ê「新大陆」khiā起，koh担起语文复兴ê历史责任。

台文通讯有法度经营十冬实在有影无简单。Che无表示事事拢顺利。这段时间台湾ê大环境改变了真chē，bē必全对母语文运动有利。无论台湾政权、政党、智识份子a̍h是一般民众（选民），对台湾历史tek ê语言危机拢无够重视。教育体制内ê「九年一贯」母语课程提供母语文一个khah影目ê舞台；总是，政权过去ê分化犹原tī leh，争取体制ê符号认同ê动作chē过促进制订kap实施母语文政策ê草根力量。整个台语文阵营ê资源整合（khang-khòe ê分工）犹停tī「kē效率」ê阶段。

做一份文学定位ê刊物出版单位，台文通讯有伊ê角色。这个角色ê意义着透过读者/写作者积极ê参与去定义、发扬；世间无别个组织、别阵人会用得取代「台语人」自发性ê动力。所有ê语文运动kiám-chhái拢是（重）建立人kap人ê语文关系ê社区运动。台文通讯是社区ê园地之一，运动ê一环，当然mā无例外。Ǹg望ta̍k家相招来参与，共同来经营ka-tī ê母语文化。