《台文通讯精选》

 | | | 转寄

生日快乐

作者 阿秀 2008.03.30

时间过真紧，我ê gín-á Austin今年7月tō beh满十岁ah！10冬前，伊比预定ê日子提早6礼拜出世，有6磅重。对早产ê gín-á来讲无算轻，但是照规定伊mā tī保温箱khǹg一暝一日才抱出来，m̄-kú随koh发现有黄疸，抱去另外一间房间照紫外线，tī病院足足tòa一礼拜才抱转来厝。也因为伊ê提早报到，真chē物件拢无准备好，car seat mā犹未买，真是脚乱手乱。我kā洗身躯，看伊小小瘦瘦，心内想ài等外久，伊才会大汉？

Austin细汉真乖，伊真爱mo͘h teh困，亲像一只phòng鼠脚chhng翘翘，一日会tàng困16点钟。真罕得háu。伊ê爸爸讲咱ná会生一个gín-á，连háu tō贫惰。后来伊渐渐大汉，一岁外我开始chhōa伊去图书馆借册转来看，gín-á册有真chē真súi ê插图，真古锥，虽然是英文册，我拢用咱ê母语--台湾话讲hō͘伊听，tùi听故事开始，伊学ê台湾话愈学愈chē，bat ê世界mā愈来愈阔。有时大人无闲，伊会tàng家己留tī房间chhit-thô､看册几nā点钟，bē来吵人。朋友拢讲伊真乖，但是阮渐渐发觉伊走bē紧，跳bē koân，运动神经m̄是真发达。有同乡ê老大人kā阮讲：「恁这个gín-á nái chiah黄酸，ài chhōa去ho͘医生看」。

我想伊只是kap伊ê妈妈仝款，无爱运动。五岁ê时，有一日我kā问：「Austin，妈妈送你去学siû水，敢好？」

「O͘h！m̄-好，水会走入去我ê目睭。」

「Ah无，妈妈送你去学溜冰？」

「O͘h！m̄-好，我会tī冰ê顶面poa̍h一倒。」

「Ah无，妈妈送你去拍球？」

「O͘h！bē使，球会kòng着我ê头。」

一目nih，Austin已经beh十岁ah！每礼拜阮仝款去图书馆，伊tī电脑头前坐落，家己chhōe伊beh看ê册kap资料，伊看册ê速度kap范围，我已经tòe伊bē着。有时小妹借转来ê gín-á册，我mā听伊用台湾话讲hō͘小妹听。

细汉讲伊黄酸ê o͘-bah-sán，chit-má讲：「恁Austin nái chiah大kho͘，ài开始减肥罗！」

伊会晓siû水，会晓溜冰，mā tī社区ê野球队拍球，10冬hō͘一个gín-á成长大汉。

台文通讯今年七月mā beh满十岁ah！虽然我无看过伊ê创刊号，但是我相信伊mā是tī大家ê期待，带一点á生疏，带一点á辛苦来出世。这十冬来伊tùi一个需要人照顾ê baby，到学行，到成长大汉，一路行来实在无简单。Tùi洛杉矶到纽约，tùi夏威夷到多伦多，是真chē人ê参与、出钱、出力，用疼心来照顾，才有今á日ê「台文通讯」。

我第一摆读着「台文通讯」是tī 94年，读ê第一篇文章是萧平治先生写ê。阿爸ê鹿角Hun-chhoe」。Hit时阵，吴医师每礼拜tùi Hamilton来教阮台文。伊讲阮是台语文ê幼稚生，后来多伦多成立「台文通讯读者联谊会」，每个月聚会，除了学罗马拼音、文章欣赏，老师mā鼓励阮写文章，伊讲文章若写了好，会tàng送hō͘「台文通讯」。我心内想che是无可能ê代志，落第生已经读bē会，ná有可能写文章。无想到，今á日我不但用台文来写文章，mā参与「台文通讯」ê编辑khang-khòe。

「台文通讯」是台文刊物ê先锋（pioneer），tī台文ê园地扮演iā种ê角色。这几年来，咱看着台湾有chē chē ê台文刊物，亲像雨水ak过ê春笋，一直puh芽，tī台文ê网路顶面mā读着真chē少年一代ê台文诗，台湾人ê语言文化渐渐teh成形。「台文通讯」tī这波本土文化运动中，已经留落伊美丽ê脚迹。

Austin细汉，每一冬我拢照白人ê习惯，kā办Birthday party，邀请伊ê小朋友来厝里chhit-thô，有鸡卵糕，有蜡烛，有礼物。旧年我kā讲：「Austin，你已经大汉，ài学会晓安安静静过生日。」伊mā讲好，但是前二日，伊走来讲今年是伊十岁ê生日，十岁真特别，伊敢会tàng koh有一个Birthday party？

是ah！十冬行来无容易，十岁是一个阶段，tī chia写这篇文章，送hō͘ Austin，也送hō͘台文通讯，生日快乐！