《生活e5台语，台语e5生活》

 | | | 转寄

愿为义光人――黄昭堂忏悔录(三)

作者 黄昭堂 2007.05.06

久长以来，我总是认为万能ê上帝siu°过份严酷，对信仰动摇ê人群，处罚siu°过份。自人类诞生到现今ê世界，人类bē-tàng和平共处，分成真chē民族、国家互相斗争，这mā是上帝hō͘人类ê一种教示而安排ê。上帝何必做到chit种程度neh?Koh来，假使我夫妻信主而得救，无信主ê父母、祖先kap阮分别tī另外一个世界，he mā是一个大问题。只有阮得救，未免太自私lah。

研读圣经是非常重要ê,我认为读白话字圣经chiah是正统，但是速度慢，koh理解ê程度无koân。汉字圣经to̍h是密密麻麻，真头壳痛。Iáu是日文圣经比较容易接近，不过无论tó一种语文ê圣经，人名、地名对我来讲lóng是麻烦ê,语文无仝，字眼、发音lóng有所无仝。我必须告白，我倾向tī读圣经故事，ē-sái讲是siōng基本ê修练非常不足。

我踌躇m̄敢受洗ê理由siuⁿ-chē lah,但是时间无beh等我。2004年头，koh-khah正确来讲，2003年年底我就坠入非常繁忙ê时期，莲治ê气管扩张症无看tio̍h起色，引起肺病而无自觉，我koh无时间照顾伊，hō͘伊破病koh缺乏照顾。我koh犯大罪。

2004年9月3日上午7点半，莲治昏迷，心脏停止，送到荣民总院急救成功，回复呼吸、心跳。下晡，医师kā我讲，无康复ê可能性。我一方面电召tī日本ê三个男孩归国，正澄、正宪、正嘉当夜赶到。另外一方面请李胜雄长老连络义光教会许承道牧师。许牧师出国，tú好吾友林宗正牧师tī魏瑞明兄陪同下赶到荣总。我问林宗正牧师是m̄是ē赴。伊讲ē赴。感谢主！9月3日下晡6点25分，由林宗正牧师kā伊施洗。

有关我ê部分，则择期等待我夫妻受照顾良深ê张清庚牧师回台之时，tī义光教会由许承道牧师施洗。

9月6日莲治临终，陈宇全牧师祈祷后，下晡6时11分蒙主恩召。我则tī 12月5日tī众朋友kap会友见证下，tī义光教会，由许承道牧师施洗。感谢主！其实我ê试炼tùi chia chiah beh开始。我ê一生可以讲是流浪ê人生，去教会ê动机mā有bē少不纯ê部分，话讲khah重一点á,mā可以讲我竟然利用教会，这由我chit份忏悔录ē-tàng看kah非常清楚。求主怜悯，求主赥免，赐我活力，亲近圣经、圣诗，殷勤祈祷，早日成做真正ê仆人。(摘自义光教会设教25周年纪念特刊)