《生活e5台语，台语e5生活》

 | | | 转寄

愿为义光人――黄昭堂忏悔录(二)

作者 黄昭堂 2007.04.29

卢千惠女士是一位公认ê虔诚教徒。其翁婿许世楷则平凡，台湾来ê牧师访日lóng会kap in夫妇连络。黄彰辉牧师是一位长者、英国绅士，通常阮lóng到大田区糀谷，吴枝钟医师之病院兼自宅欢喜开讲。阮不拘礼数，tī笑谈ê中间，吴医师kap许世楷主导，将黄牧师纳入为台独联盟盟员。后来黄牧师接纳我ê恳求，tī非常困难ê状态下，chhōe出一本被国民党外来政权没收ê「红册皮」白话字圣经（现在排在台湾大学图书馆4楼黄昭堂文库里面）hō͘我。高俊明牧师真早期就有长者之风，因美丽岛事件受难koh-khah受人敬重。我深觉长老教会对台湾ê爱，连he平常lóng无所闻ê女性教会职员林文珍、施瑞云女士mā自愿救人而受难，hō͘我倍增对女性kap教会ê敬重，in本来并m̄是政治运动者。郑儿玉牧师对我来讲是一位「恐怖份子」，对台独联盟ê做法，tú-tio̍h有过错伊lóng会谴责。伊得tio̍h ê信息，未必正确。我会kā伊说明，但bē kā反驳。郑牧师热情奔腾，谒见伊，每pái lóng会得tio̍h鼓励之故lah。伊诗意一到，the̍h起笔来，就写诗hō͘我看。伊以Verdi ê曲调符词ê「流浪海外ê台湾人」，伊教我唱，唱，唱到「想tio̍h美丽ê故乡，目屎就流」，伊满面目屎。Siōng热心教导我，ài我受洗ê mā是郑牧师，伊ê口头禅：「把黄有仁phah入地狱siu°可惜，beh送入天国则无够资格，结果吊tī半空中。你必须赶紧受洗！」黄有仁者，黄昭堂lah。我却非常踌躇，将来回到故乡必须膜拜祖先灵位kap庙寺ê王爷，一旦变成基督徒必然kap亲戚发生磨擦，siu°过算bē-hô。人生如浮萍，我本人罪恶siuⁿ-chē,做错不胜枚举，尤其hō͘慈母孤独终生，此罪oh得抹消，bē-tàng siàu想天国。现在ē-tàng有tang时á享受教会平安ê气氛，并ē-tàng kap国内外台湾人接触，目的就已达到，何必到天国？这就是留日时期赴教会ê心境。

1992年冬，第一pái回到久别34年ê台湾。Beh去教会当然是「祖孙虐杀ê圣地」义光教会。虽然次数无chē，总算是上教堂。昭和大学tio̍h到1998年chiah ē-tàng退休，1995年在台湾就任台独联盟主席，台日间ê空中飞人程度忽然增加。

我kap莲治，差不多二礼拜一飞，有时每周一飞。有一位牧师kā我讲：「Mài认为随时lóng ē-sái受洗，有时会来不及受洗」。我平常有一种认识，tú-tio̍h空难，m̄免如一般ê老病人tī病床呻吟伊死，是一种比较khah少痛苦ê死法，所以我无jōa烦恼空难。虽然确实来不及受洗，但，既然无siàu想天国，he koh有啥物关系neh？ 天母李胜雄长老ê厝隔壁就是伊丈人ê厝，我kap莲治长期免费占领之，koh常kap李长老家族、亲戚共处、聚餐。看tio̍h李家合家笃信基督教，恩爱喜乐，是一个模范家庭。教义难解ê时，李胜雄长老是一位亲切ê老师，我受伊影响非常深。我chhun落来ê问题就是我本人人格ê陶冶，iáu 未到做一个够资格ê基督徒。这变成我受洗á无siōng重要ê关键，我总bē-tàng受洗后tī人格上hō͘人指指点点。有一位牧师讲道ê时讲：「做一位基督徒tio̍h-ài做到全身发出香味ê人。」我小khóa有同感而决心自勉，并求主引chhōa。深知我种种缺点ê李胜雄却讲：「因为有罪chiah需要赥免，koh-khah需要就近主。」(待续) (摘自义光教会设教25周年纪念特刊)