《生活e5台语，台语e5生活》

 | | | 转寄

愿为义光人――黄昭堂忏悔录(一)

作者 黄昭堂 2007.04.22

我1932年出生tī台南县落山á寮，是一个典型ê渔农村。阮老父黄赐川先生从事农、渔、商，性格相当豪迈，母亲黄林怨女士仁慈坚毅。长男有仁未进国校就夭折，父亲1948年往生，母亲疼我如命，游泳之类绝对不准。父母对我从来无phah骂过，至少，我无类似ê记忆。 下山á寮kui村土地所有权属tī开村祖爷「池王爷」，其庙称做龙山宫。阮tau佛桌有「黄府元帅」镇座，其右边有历代祖先灵位，eng早暗大家族成员lóng会自发tek烧香敬拜。

母亲俭肠耐肚(khiām-tn̂g neh-tó͘)，对我这chhun落来ê唯一tsa-po͘ kiáⁿ)ê予取予求，lóng无管制，chiông án-ne hō͘我lia̍h做是我是好额人（hó-gia̍h-lâng)出身，其实不过是渔农村好过日ê草地gín-á而已。 台南一中时代，出tī青春ê好奇，有tang时á赴台南市ê太平境教会，hit时代ê教会合唱团lóng是混声合唱，非常优美，甚至会友ê赞美歌lóng会出现混声，真是感动无比。

台湾大学一年级无分科系，英文是依照成绩分班上课。我ê英文教授是美国人Miss Shells,tī校本部附近ê基督教聚会所教授Bible(圣经)，我抱tio̍h学习古英文ê心情去查经，lóng无宗教上ê动机。 1958年底赴日，1962年左右看tio̍h许世楷，何康夫等人赴东京饭田桥马朝茂长老ê基督教聚会所，我lóng无赴会ê意愿。一直到1969年左右，我chiah第一pái踏入日本ê台湾人教会，tiàm-tī涩谷区南平台，是东京大学驹场校区附近，这是日本人ê教会，台湾人则租借下晡时间，时间上tú好适合我kap妻莲治同赴教会。

蔡一信牧师，将我以友人待之，颇有宾到如归ê感觉。海外台独人士不准归台，教会是接触各地台湾人ê机会所在。每礼拜日lóng有bē少ê台湾牧师、教徒参加。会众tī礼拜中作笔记是真好ê事，可以将感念tī心ê讲道内容、圣经节记录以便复习。但是mā有特务利用chit-ê机会监视牧师ê讲道。国民党外来政权胆敢监视上主ê国，蒋介石、宋美龄以及蒋经国lóng是受洗教徒，in被约束到天国，án-ne我何必到天国kap in相处？后来一ê牧师kā我讲，到上主ê国，过去ê恩怨lóng消失。我浮起另外一个疑问，我如何ē-tàng辨识咱亲人好友？Koh,我将bē-tàng见tio̍h无信教ê亲人好友，天国对我来讲，无jōa大意义。

南平台集会所迁到原宿，我无跟tòe,后来tī荻洼建立全新ê自己教会，我chiah去参加礼拜，我ê住所已经搬到方南町附近，方便之故lah。

蔡一信牧师无久移民去美国，真有失落之感。新ê牧师是苏庆辉牧师，苏牧师真少有政治性ê讲话。会友虽然lóng是台湾人，但是东京ê台湾人，台独派、中国派、国民党派、无主张者，应有尽有，牧师bē-tàng尽意透露台湾人ê心情。

教会备有白话字圣经kap汉字圣经，用白话字ê人比较khah少，牧师讲道一贯用Hō-ló台语，tī东京ê台湾人教会无听过用中国话ê讲道。张清庚牧师有无tī荻洼教会牧会过，chit点我无记忆，后来伊tī池袋西口建设一座当时阮看起来是非常广大ê自己ê教会，因为荻洼教会日益繁盛，bē-tàng容纳所有ê会员。池袋对我来讲，交通无算方便。因为我搬厝到田园调布车站附近ê东玉川二丁目，两处ê教会对我来讲lóng是siuⁿ远。

我妻莲治是一个寡言宁静ê人，做家事kui日无闲，伊动作缓慢、优雅，所以看起来真无闲(bô-êng)，早起为三个男儿做早顿、做便当，礼拜日可以讲是贪眠ê好机会。我m̄是每礼拜lóng去教会，lóng是有tang时á想tio̍h chiah讲beh去教会。真奇怪，我讲beh去教会，伊lóng是默默准备同行。我m̄是一个好ê翁婿（ang-sài)，生活无正常，奥妙ê是tī教会做礼拜以后几工，lóng会得到平安。 对我来讲，圣诗he年轻时tī太平境唱ê hit几首chiah算，其中「救主，我爱就祢，来就近祢」siōng熟练。差不多无例外，每pái目屎lóng会继续流落来。「男子汉，bē-tàng hō͘人家看tio̍h目屎」，所以bē-sái拭目chiu,必须等到大家闭目祈祷ê时chiah拭。 张清庚chit位带心脏病讲道ê牧师，伊ê讲道对我来讲，富有亲切感。台湾牧师团访日ê时，或者kap日本ê基督教团聚会ê时，伊常常邀我同行。被问所属教会ê时，我lóng会回答「是池袋教会ê会友」；领受圣餐ê时，我照领不误。我m̄知无受洗ê人，无资格，koh无人对我谴责或改正。

我认识了高俊明牧师、郑儿玉牧师、林宗正牧师、黄彰辉牧师、iáu有不算深交ê黄武东牧师、钟子时牧师ṳ̍8。(摘自义光教会设教25周年纪念特刊)