《生活e5台语，台语e5生活》

 | | | 转寄

《马偕在台湾》布袋戏DVD发行感恩礼拜

作者 陈幸如 2006.05.21

深受台湾人喜爱ê传统艺术布袋戏，竟然ē-thang将马偕博士ê故事刻画kah[栩栩如生]，吸引老少争相目睹？！ 无m̄-tio̍h,这是顶礼拜六（5/8）tī双连长老教会举办ê《马偕在台湾》布袋戏DVD发行感恩礼拜现场实况，会场聚集了100 gōa位ê布袋戏迷，这除了是布袋戏跨出ê一小步以外；也是上帝国宣教史上跨出ê一大步。

感恩礼拜由双连长老教会陈文钦牧师传讲信息－－「救回失落ê台湾文化」，以尼希米记八章1~3节ê信息，鼓励koh-khah chē台湾人认同家己ê文化、语言，并继续将布袋戏chit项传统技艺发扬出来，创造属tī台湾人ê骄傲。

会中邀请了罗彭金枝女士（罗荣光牧师娘）、马偕纪念基金会董事长林建德长老、圣经公会赖俊明牧师、传播中心苏燕辉执行长与会致词。罗牧师娘因tī美国波士顿参访期间巧遇林俊育长老，听tio̍h林长老想boeh将马偕ê故事用布袋戏演出来ê构想了后，深表赞同，回国后随时将chit-ê讯息传达hō͘长老教会传播中心苏燕辉执行长，也促成了chit次ê合作，伊笑笑á讲家己是「媒人」，也特别用客语致词，展现了台湾多元族群文化ê面貌。

总策划林俊育长老致词ê时，特别感谢各界对制作过程中经费ê支援，hō͘伊无后顾之忧，to̍h是tī彻夜录影ê过程中也无感觉thiám,DVD完成了后，看tio̍h大家ê肯定kap支持，是hō͘伊继续koh做落去ê力量，伊也已经着手计画制作《切肤之爱》布袋戏DVD。 主办单位传播中心苏燕辉执行长也感性teh表示：「现在iáu有人愿意做文化保存ê工作实在真无容易，咱看tio̍h林长老ê坚持，也真感佩伊对布袋戏、甚至语言文化保存ê热情kap行动力，本身是一个媒体单位，阮真欢喜来宣布「新眼光网路电视台」将tī六月开播，届时也boeh播放chit部影片，hō͘全世界ê人lóng ē-tàng透过马偕ê故事来得tio̍h上帝ê祝福。」

感恩礼拜tī「亦宛然掌中剧团」黄侨伟大师，现场演出马偕牧师夫妇晚年片段，kap洪约瑟兄弟演唱「最后ê khiā家」歌曲搭配下，将马偕博士对台湾ê不舍kap感怀深刻表现出来，留hō͘与会者真chē ê感触。也期待koh-khah chē人愿意投入台湾传统文化ê保存kap推广工作，将信仰以koh-khah多元化ê方式广传开来。