《生活e5台语，台语e5生活》

 | | | 转寄

台湾各族语言ê共同危机：死！

作者 李南衡 2006.05.14

顶礼拜，「自由时报」真用心，连续三工刊登「客语教学危机及展望」系列文章，讲国民学校客语班级大减，客语沦作新弱势语言，客语ê人口每年流失5%，调查全台湾各县市客语班级及客家人口ê比率做表分析，ē-tàng看出，国校客语班级无够，像南投县客家人口是17.6%，客语班级无够1%。记者kā chit-ê现象讲做是：闽南语偏大，西瓜óa大旁，致使国校ê客语班不但无进，顚倒退步。记者除了提出师资无够、学校无心、学生学习ê意愿低、家长想讲学英语khah赢过学客语等等以外，记者提出一点讲：乡土教学，tio̍h避免强ê愈强、弱ê愈弱。看起来，ná像真有心，其实是方向完全错误！

叶菊兰女士担任客家委员会主委ê时bat讲：台湾原住民各族ê语言已经送入去加护病房，客语已经tī急诊，Holo语mā已经teh挂号ah!意思真明，就是讲台湾各族母语lóng已经tú-tio̍h「死亡」ê危机，分早死慢死而已，无toh一种母语是khah强抑是khah弱ê。Ná会变到án-ne?

战后国民党政府来霸占台湾，一来就是beh建设国语社会，除了普及所谓ê「国语」以外，头起先禁止日文日语ê册、报纸、杂志kap电影，续落去全面压制台湾各族语言，除了学生tī学校讲母语tio̍h受罚以外，1975年规定三台电视台ê节目，一工干单ē-sái播出一点钟ê Hō-ló语（客语kap各族原住民语lóng总无）。立法委员穆超讲：「方言，伊会自然消灭，m̄免烦恼，也m̄免可惜，方言是落后ê语言，用国语写真好ê文字，是做一个中国人ê基本条件。」1985年beh制订「语文法」，规定会议、公务、公开演讲、公共场所、各级学校实施教育、大众传播等，lóng一定爱讲「标准国语」，若无tio̍h受罚。佳哉hit阵ê民意大大反对，chiah soah去！

今á日tī国民学校实施ê「母语教育」，一礼拜教四十分钟，算做啥贷？Hit当时国民党政府是用「重药」硬beh kā台湾各族母语thāu hō͘死！今á日，民进党政府若是有心，mā一定着用「重药」台湾各族语言chiah救会活。

今á日tī台湾，特别是tī大都市，无管你tī餐厅，公共汽车、捷运顶头，你kā听看bāi,学生、一般食头路人，到「社会精英」，in讲啥物话？甚至连七八十岁ê阿公阿妈kap in孙á mā讲hit号足无标准ê「中国ê普通话」，咱讲号做「国语」。可见，台湾chit-chūn ê强势语言，只有「中国ê普通话」咱讲ê「国语」一种niā-niā,台湾各族语言lóng mā是弱势语言。若是无认清chit点，犹tī各弱势语中间计较toh一种语khah强khah弱，台湾各族语言一定会tú-tio̍h共同ê危机：死！