《生活e5台语，台语e5生活》

 | | | 转寄

干细胞研究ê困惑

作者 戴正德 2006.05.28

Tùi九十年代后期干细胞ê发现kap其潜在ê多功能性被确认了后，生物科技m̄-nā tī phah开生命奥秘ê道路上向前勇猛迈进了一大步，也hō͘生命伦理学界一个难解ê新课题。Khiā-tī纯科学ê角度来讲，科学本身是中性ê，只要ē-tàng带hō͘人类福祉kap医治病疾ê科技，有什么bē-tàng研究ê neh？kiám无lóng值得鼓励？毕竟伊将协助人类解决身躯ê苦难，hō͘受病痛苦楚ê人恢复健康（这是美国长老教会支持干细胞研究ê声明，tī伦理学上，这kā伊称做效益论）。不过当人类ê能力超过了极限，换句话讲，企图取代上帝对生命ê主权，开始扮演创造者ê角色时，是m̄是人类该停落来思考生命ê意义，重新检讨人类kap「自然」ê关系，以及人类tī kui-ê创造里所应扮演ê角色kap任务？伦理学家tī面对科技向自然挑战，侵犯本来无属tī人类应该窥视ê奥秘领域，却又kā伊跨越phah破ê时，社会秩序kap生态环境将会受tio̍h严重ê冲击，就ná亲像当初人类始祖tam了禁果仝款，付出空前ê代价，怎样办？tī医治病痛，hō͘人类寿命无限延长，彧停止对生命基因排序ê改造kap探究来顺服自然ê分歧路上，人类该行向何方?

2005年12月中旬，美国koh有科学家宣布in培育出了大脑中含有0.01 ê人类脑细胞ê老鼠，加州ê科学家盖奇将十万个人类胚胎干细胞注入14工大ê老鼠胚胎，终于培育出「人脑鼠身」ê老鼠。加州史旦福ê研究人员koh-khah进一步将培育大脑含有百分之一人类细胞ê老鼠。人类kap老鼠之基因ê类似度有97.5%，chit-ê 0.01或0.1虽然看起来真微小，但其震撼力却是巨大ê。Chit-ê实验hō͘生物科技行上了失去控制ê危险边缘。虽然chit-ê比例bē致使老鼠「人性化」，但类似ê实验却继续增加中。也有科学家将人类DNA注入动物卵中来，制造出人类胚胎干细胞来申请专利neh！

史坦福大学医学伦理学家马克罗斯讲：「如果咱kā动物siuⁿ过人性化，就会超越了人kap动物ê界线。」不过iáu有科学家以医学研究为理由，继续对改造生命ê能事努力推进。譬如密西根州立大学ê科学家，就bat将家己面颊取落来ê细胞注入牛ê卵细胞里。明尼苏达州一间诊所培育了体内流人血ê猪。内华达大学培育出肝脏百分之八十组织kap人体相同ê绵羊，以便有一工ē-tàng用tī人类器官移植上。 Tùi促进人类健康福祉ê立场来讲，科学ê进步，带来疾病ê治疗kap生命ê延长，tī一个追求活得koh-khah久，食得koh-khah好，生做khah súi，爬得koh-khah高，走得koh-khah快，thàn得koh-khah chē，付得koh-khah少，sńg得koh-khah爽… ê社会里，iáu有什么bē-tàng ê neh？伦理学家应该开始忧心loh！因为超越人类界线ê科学研究对人类整体将会是威胁，人类岂thang无谨慎小心？人类tī 21世纪里，是m̄是又teh建造新ê巴别之塔了mah？

但另外一方面来讲，新科技ê突破，干细胞研究hō͘人类对健康ê[憧憬]却是无限ê，譬喻讲糖尿病将thang完全被医治，老人痴呆症也bē是威胁，任何疾病lóng将由干细胞tī科技ê引chhōa下，取代腐败病变ê细胞，什么肝、心、肺、肾、胰、脑…ê病变lóng无koh thang惊，因为干细胞成做新ê武器，百战百胜，完全免费功夫。不过万能ê干细胞却必须tùi潜在ê生命胚胎里（受精5工）ê卵取得，而被取出ê囊胞胚胎将因为án-ne来枯萎死亡。换句话讲，人类为tio̍h医治一个病疾却必须去牺牲一个潜在ê生命，这合乎伦理mah？生命m̄是变成零件工具？而且弱者将永远被强者所利用kap奴役，生命失去公义平等kap尊严。所谓「上帝ê形象」无koh具有意义。为tio̍h谨慎，科学家开始用复制ê技术来获得新ê干细胞，或用动物来为人类生产新细胞。创世记里所讲「各照其类」ê无仝生命之分野，将完全被phah破。复制干细胞也必须由第一个真生命开始，á当咱分别真生命，准生命ê时，是m̄是已经hō͘生命变成物质而已？成人ê各器官虽lóng也含有干细胞，但chiah-ê已分化完成ê干细胞bē koh再分化成做其他ê器官，也to̍h是其潜在性ê利用价值只是单方面ê。 为tio̍h mài去违反生命神圣ê法则，对生命无仝ê定义也就出现loh。有科学家讲，生命iáu未形成前无算生命，体外受精ê，也bē合乎自然生命，因为伊只是一种物质而已，也讲tī脑神经发展完成前，iáu bē-sái称作生命。但koh有科学家认为生命就是生命，无所谓ê准生命kap真生命之别，tī精子kap卵子结合ê瞬间，生命就开始loh，而且生命ê主权在tī上帝，因此人类实在无应该kā「潜在生命」当玩具来舞弄实验，开生命尊严ê sńg笑。

干细胞ê研究应该开放mah？人类应该支持chit-ê可能带来医药革命、医治百病ê实验mah？假使干细胞也是生命，怎样ē-tàng用来实验，á无kā伊敬重小心维护？不过tī科技日新月异进步神速ê事实下，ài科学家停止chit-ê实验kap研究已差不多无可能，连基督教会lóng表示了支持，谁iáu挡能tiâu？今á日iáu坚持对干细胞研究有所疑忧ê(虽无全然反对)，非天主教莫属lah，因为教宗坚持生命ê主权在tī上帝，科学一定tio̍h tī无违反自然之下进行。台湾ê长老会neh？

有一个课题咱必须扪心自问深切反省ê就是：假使基督教伦理kap世俗伦理无koh有区别之时，咱iáu需要基督教伦理mah？假使基督教kap异教徒mā lóng仝款抱持相同ê生命观、价值观ê时，咱需要基督教信仰mah？是m̄是新ê上帝，也to̍h是人ê自我kap新科技已经出现，取代了真上帝，因为án-ne基督教kap异教徒也无koh有所差别loh？当然tī万民称呼耶和华为主，屈服tī伊ê荣耀下，用基督ê心为心ê时，上帝ê伦理就是全民ê伦理，将无koh有彼此之分loh，但chit-ê千禧之年并未来临。

Tī面对新科技ê挑战，不只基督徒，甚至全人类lóng应该以严谨ê心来思考咱ê科学ài行向何方ê问题，来严谨负责。强调管家思想ê生态神学家kap要求人类以负责任ê心来从事研究ê科学家kap伦理学家，tī面对干细胞chit-ê潜在ê人类福祉ê问题时，lóng tio̍h求应该以宗教般ê虔诚来从事科学，毕竟生命是神圣又koh奥秘ê。换句话讲，咱并无反对干细胞ê研究，但伊一定ài tī尊重生命ê前提上来从事。上帝将管理大地ê责任交hō͘人类，包含对生命健康ê维护，所以医学ê发展也是人ê职责。只要人tī无违反上帝ê主权下，「凡事lóng thang行，但无lóng有益处。」总是ài以荣耀上帝ê名为念。 (作者戴正德，中山医学大学医学伦理学教授，医学人文学院院长)