《生活e5台语，台语e5生活》

 | | | 转寄

白话字ê活力（1885－1970年）

作者 张学谦 Tiuⁿ Ha̍k-khiam 2006.02.12

1885年到1970年间ē-tàng讲是白话字siōng有活力ê时期。chit-ê时期ê白话字，thèng-hó讲是hông「得tio̍h气力」（empowerment）ê文字，m̄-bat字ê人，透过伊真紧就学会晓父母话，thang好家己读圣经，领受上帝ê教示，得tio̍h信仰ê气力；mā ē-tàng对chia来得tio̍h教育ê启蒙，学算数来记账，写批联络感情，看教会公报来知影教会消息、世界大事，欣赏文学，读白话字注解ê汉文经典对汉文传统有批判ê了解，mā ē-tàng亲像蔡培火kâng款，行入社会启蒙ê工作，提升一般人ê读写能力。白话字ê功能m̄-nā 有宗教ê功能，koh有教育ê功能、文学ê功能、个人连络感情ê功能kah教会内部行政ê功能。chit-ê时期白话字ê活力表现tī文类、文献、信仰、社会关怀、文学、教育、人口kah学习chit几个层面。对语言保存ê观点来看，白话字留落来真重要ê读写基础建设，有辞典、教材、文献kah会晓白话字ê人才。

1970年以后，长老教会无亲像早期教会hiah-nih phah拼teh推sak白话字。对历史发展ê观点来看，长老教会对白话字ê推sak ē-tàng讲是「头á兴兴、尾á冷冷」。咱有讨论影响白话字发展ê政治kah社会文化因素，语言文字ê议题值得继续探讨，因为语言文字ê选用是传教一定会面对ê问题。Tī台湾各族群母语流失，giōng-beh完全徙对华语去。教会是beh tòe时势行，放sak母语、改用华语，ah是beh坚持母语传道、母语读圣经ê传统，hō͘母语得tio̍h「重头生koh活」ê生机？

若是beh坚持母语传统，白话字tio̍h ē-tàng扮演真重要ê角色。白话字tī教会ê使用有真重要ê意义。因为语言ê生存需要固定使用ê领域，有文字koh-khah有法度帮助语言保存。犹太人ê希伯来语有法度死--去koh活--tńg来，重新chiâⁿ做有生命力ê语言，就是因为in有tī宗教领域使用母语、母语文。希伯来语tī 二千冬前，就已经死--去，无koh是口语沟通ê工具，m̄-koh到20世纪初，soah起死回生，重新chiâⁿ做有生命力ê语言，tī各种领域使用。书面语ê存在kap使用是希伯来语重生ê重要因素。希伯来语ê口语消失beh二千gōa冬，m̄-koh书面语传统m̄-bat断过，希伯来文一直使用tī宗教领域，像祈祷、读圣经hām犹太法典（张学谦 2003）。张裕宏（2001：175；186）真强调白话字传统ê重要性，伊认为beh建立对台语ê信心，「就爱hō͘台湾人知影咱ê传统，hō͘台湾人知影家己有久长ê好传统来感觉骄傲，」就目前来讲，「白话字ê文献iáu是上丰富，占所有得会tio̍h ê台语文献ê大部分，所以白话字iáu是siōng重要，是负责台语传承ê大树身。」Chit种文化传承kah文化资源ê观点，是复兴白话字活力真重要ê理由。

Chit几年来，长老教会lú来lú关心母语ê保存kah发展。除了设立「台湾族群母语推行委员会」，人光出版社、教会公报社mā出「台文系列」，chit-má已经出十几本a。2005年人光出版社有出林俊育长老kah陈清俊长老合作翻写汉罗版ê《平民ê基督传》（林俊育 2005），chit本册650页。林长老tī「代序」讲：「台湾长老教会tùi保存台语有不可否认ê功劳，但he是咱前一代ê努力成果，咱chit代m̄-thang做台湾白话字ê杀手。」Chit-ê呼吁值得长老教会思考未来应当行ê路。

一百tang后，教会历史m̄知会án-chóaⁿ写咱chit-ê时代ê文字传道经过，是浪子chhōe无路thang tńg去，继续流浪，ah是浪子回头ê故事leh?