《生活e5台语，台语e5生活》

 | | | 转寄

母语是咱ê乡土感情

作者 Chuniok 2006.04.02

一个下港人来到台北，每工lóng真郁卒，因为lóng无听人讲台湾话。当伊来双连教会坐电梯ê时，欢喜kah大声hoah:「电梯讲台湾话！」M̄讲母语ê台湾人ah! 你thài hiah忍心害死家己ê同胞每工teh郁卒！？

一个年轻ê母亲tī台北上班，生一个婴á送tńg去下港hō͘老母io，阿妈kap孙á lóng讲台语。年轻ê母亲tńg去看囝ê时，kā婴á抱起来，就用华语讲：「我ê宝贝，妈妈很想念你！」婴á随大声哮。年轻ê母亲继续用华语讲：「我是你的妈妈呢, 怎么可以哭呢！？」婴á jú哭jú大声，因为伊听tio̍h华语真bē惯势。

外来政权统治者骗咱讲语言是沟通ê工具，顶面两个例证明语言是民族感情kap乡土感情ê表达。咱m̄好继续hō͘外来政权统治者骗去，tio̍h紧拯救咱ê母语。

双连教会庆祝九十周年ê节目中，我足欢喜青年ê节目头到尾lóng用台语，但主持人最后ê祈祷hō͘我非常gông-gia̍h,伊分bē清楚「咱」kap「阮」ê用法，kā伊kap上帝ê关系混淆不清。隔工我tú-tio̍h chit位青年ê父母，我kap in提起chit-ê问题，in讲in有责备in囝，但in囝骂in讲：「Lín无教我，我台语讲m̄-tio̍h,lín koh敢骂人！」做人ê父母ah！你m̄好bē记得做人父母ê责任！

我最近tńg来双连教会礼拜，司会者大部分使用「现代中文译本」读圣经，tú-tio̍h「我们」读做「阮」了后发现m̄-tio̍h,赶紧改嘴讲「咱」。若用白话字或台语汉字版来读，就无chit款ê[尴尬]场面。Koh讲，用中文版圣经读做台语tio̍h经过头壳翻译，若用台语版圣经读，kám m̄是直接爽快！？

真chē人感觉奇怪，前总统李登辉先生用台语演讲tiāⁿ-tiāⁿ thih-thih-thuh-thuh，m̄-koh若用日语to̍h真滑liū soah-phah。有人讲是因为伊受日本教育ê关系，其实最大ê原因是伊ê台语演讲用华语稿，日语演讲用日语稿。需要经过头脑翻译ê演讲是真痛苦ê代志，台语文运动ê领导者去拜访前总统李登辉先生ê时，伊随时下令群策会办理tàu推动台语文运动。

蒋介石为tio̍h beh达到伊「无母国」ê殖民统治台湾，伊违背联合国文教组织(UNESCO)宣言，无使用台湾母语教育，反转beh消灭台语。国民党ê「国语政策」 ē-sái讲是凶杀台湾母语ê元凶，tòe伊推sak「国语」ê人便是伊ê帮凶，你kám甘愿做消灭台语ê帮凶！？

双连教会是台湾教会界ê指标，咱tio̍h以十gōa年前从事盲人事工kap松年大学ê精神，来推动台湾文艺复兴ê台语文运动，tī社区中做光做盐，来荣光上帝ê名。

《M̄-thang嫌台湾》作词ê林央敏讲：「语言是思想ê媒介，所以是民族ê根，是民族文化siōng基本ê源头kap面象....台湾作家neh? chē-chē lóng受殖民化去，无觉悟tio̍h语言kap文学及文化ê关系，甚至逃避语言ê问题，koh khah严重ê是轻视家己ê母语。经过我ê自我反省了后，我认为做一个台湾人文学家，soah无法度用台语写作或是m̄用台语写作，he是对不起台湾kap对不起台湾人，mā是无为tio̍h台湾文化尽作家ê本份。」